រដ្ឋមន្រ្តីក្រសួងព័ត៌មានឥណ្ឌាលោក Ashwini Vaishnaw និយាយនៅថ្ងៃពុធនេះថា គណៈរដ្ឋមន្រ្តីឥណ្ឌា បានអនុម័តការពង្រីកកម្មវិធីឧបករណ៍ពាក់កណ្តាលចម្លងដ៏សំខាន់ជាមួយទុន ១៣,៣ពាន់លានដុល្លារ ។

រដ្ឋាភិបាលឥណ្ឌានិយាយនៅក្នុងសេចក្តីថ្លែងការណ៍ថា ទុននេះនឹងត្រូវបែងចែក ដើម្បីអភិវឌ្ឍកម្មសិទ្ធិបញ្ញា និងរចនាបន្ទះឈីប បង្កើតរោងចក្រផលិតបន្ថែមទៀត ហើយនិងជំរុញការស្រាវជ្រាវ និងការអភិវឌ្ឍ ។

ការប្រកាសនៅថ្ងៃពុធនេះដែរ បានកើតមានឡើង រយៈពេលប្រហែល ៥ឆ្នាំ ក្រោយឥណ្ឌាប្រកាសគម្រោងលើកទឹកចិត្តតម្លៃ ១០ពាន់លានដុល្លារ ដែលជាផ្នែកមួយនៃការជំរុញកាន់តែស៊ីជម្រៅ ដើម្បីធ្វើឲ្យប្រទេសមួយនេះ ក្លាយជាមជ្ឈមណ្ឌលផលិតគ្រឿងអេឡិចត្រូនិកសកល ។

លោក Vaishnaw និយាយថា គណៈរដ្ឋមន្រ្តីឥណ្ឌា បានអនុម័តផងដែរ ថវិកា ៦២៥ពាន់លានរូពី(ប្រហែល ៦,៤ពាន់លានដុល្លារ) សម្រាប់កម្មវិធីរយៈពេល ៥ឆ្នាំ ដែលមានគោលបំណងជំរុញការផលិតទូស័ព្ទដៃនៅក្នុងប្រទេសមួយនេះ ៕