ភ្នំពេញ៖ ក្រសួងពាណិជ្ជកម្ម នៅព្រឹកថ្ងៃទី៤ ខែឧសភា ឆ្នាំ២០២២នេះ រៀបចំពិធី​អបអរ​សាទរ​ព្រះរាជាណាចក្រកម្ពុជាទទួលបានពានរង្វាន់ប្រាក់ពិភពលោក ពីគណៈកម្មការរៀបចំ​ពិព័រណ៍​ពិភពលោក និងការិយាល័យពិព័រណ៍អន្តរជាតិ (BIE) ឆ្នាំ២០២២ ក្នុងឱកាសនៃការចូលរួម ពិព័រណ៍​ពិភពលោក ២០២០ ឌុយបៃ សហភាពអារ៉ាប់រួម។

ប្រភពពី​ក្រសួងពាណិជ្ជកម្មបានឲ្យដឹងថា ពិព័រណ៍ពិភពលោក ២០២០ ឌុយបៃ បានប្រព្រឹត្តទៅ​ចាប់​ពី​ថ្ងៃទី១ ខែតុលា ឆ្នាំ២០២១ ដល់ ថ្ងៃទី៣១ ខែមីនា ឆ្នាំ២០២២ ជាមួយប្រធានបទ ការ​តភ្ជាប់​គំនិត ដើម្បីស្ថាបនាអនាគត (Connecting Minds, Creating the Future) និងមាន​ប្រធាន​បទរងសំខាន់ចំនួនបី គឺ ៖ កាលានុវត្តភាព វឌ្ឍនភាព និងនិរន្តរភាព ត្រូវបានរៀបចំ ឡើង​នៅ​ទីក្រុងឌុយបៃ សហភាពអារ៉ាប់រួម នៅលើផ្ទៃដីចំនួន ៤៣៨ហិកតា ដោយ​មាន​ការ​ចូលរួម​ពី​ប្រទេស និងអង្គការ អន្តរជាតិធំៗ ចំនួន ១៩២។

ពិព័រណ៍ពិភពលោក ២០២០ ឌុយ ត្រូវបានបើកសម្ពោធ ជាផ្លូវការនៅថ្ងៃទី៣០ ខែកញ្ញា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់របស់ ព្រះអង្គម្ចាស់ ហ្សែគ មូហាម៉ត ប៊ីន រ៉ាស៊ីត ល ម៉ាកតុម អនុប្រធានាធិបតី ជានាយករដ្ឋមន្ត្រី និងជាអ្នកគ្រប់គ្រងទីក្រុងឌុយបៃ និងបើកឱ្យ ដំណើរ​ការគិតចាប់ពីថ្ងៃទី១ ខែតុលា ឆ្នាំ២០២១ ដល់ថ្ងៃទី៣១ ខែមីនា ឆ្នាំ២០២២ មាន​រយៈ​ពេល ៦ខែ ស្មើនឹង ១៨២ថ្ងៃ ដោយបានទាក់ទាញភ្ញៀវជាតិ និងអន្តរជាតិ ចូលទស្សនាបានចំនួន ២៤.១០២៩៦៧នាក់៕