អាជ្ញាធរមូលដ្ឋានបានឱ្យដឹង​នៅ​ថ្ងៃព្រហស្បតិ៍ (ទី​២៣ ខែកក្កដា ឆ្នាំ២០២៦) នេះ​ថា យ៉ាងហោចណាស់មនុស្ស ១៦នាក់ រួមទាំងអ្នករុករករ៉ែផងដែរ​ ត្រូវបានសម្លាប់ អំឡុង​ការវាយប្រហារចុងក្រោយបំផុត ដោយក្រុមឧទ្ទាមសម្ព័ន្ធ​កងកម្លាំងប្រជាធិបតេយ្យ (ADF) នៅភូមិមួយ ក្នុងខេត្ត Ituri ភាគខាងកើតនៃសាធារណរដ្ឋប្រជាធិបតេយ្យកុងហ្គោ។

មន្ត្រីមូលដ្ឋាន លោក Janvier Kinyongi បានប្រាប់អ្នកសារ​ព័ត៌មាននៅទីក្រុង​ Bunia ថា ការវាយប្រហារនេះ បានកើតឡើងកាលពី​រសៀលថ្ងៃពុធនៅភូមិ Mandeite ក្នុងដែន​ដី Mambasa ចម្ងាយ ១៦៥គីឡូម៉ែត្រ នៅ​ភាគនិរតីនៃរដ្ឋធានី Bunia ។

លោកបានបញ្ជាក់​ទៀត​ថា៖ «ជនរងគ្រោះជាច្រើន គឺជាអ្នករុករករ៉ែមាស។ ចំនួនអ្នកស្លាប់ គឺជា​តួលេខ​បណ្តោះអាសន្ន ខណៈដែលការវាយប្រហារនៅតែត្រូវបានរាយការណ៍ នៅក្នុងតំបន់ជុំវិញ»។

ការវាយប្រហារនេះបានកើតឡើងក្រោយ​ប៉ុន្មានថ្ងៃបន្ទាប់ពីសមាជិកក្រុម​ ADF ដែលសង្ស័យថា បានចាប់ពង្រត់មនុស្សជាច្រើន នៅក្នុងតំបន់ដូចគ្នា។ ADF នៅតែជាការគំរាមកំហែងដ៏ធំ​ដល់ប្រជាជនស៊ីវិល នៅ​កុងហ្គោ។

ក្រុមអ្នកឃ្លាំមើលសន្តិសុខ Kivu Security Tracker បានឱ្យដឹង​នៅក្នុងរបាយការណ៍មួយកាលពីសប្តាហ៍មុន​ថា ក្រុម​ឧទ្ទាមនេះ​បានសម្លាប់ជនស៊ីវិល ៦២នាក់ និងចាប់ពង្រត់មនុស្ស ៥៧នាក់ផ្សេងទៀត កាលពី​ខែមិថុនា៕