ប្រភពមួយនៅក្នុងក្រុមនេះដែលត្រូវបានដកស្រង់សម្តីដោយអ្នកផ្សាយព័ត៌មាន Al Mayadeen ដែលមានមូលដ្ឋាននៅលីបង់ បាននិយាយកាលពីថ្ងៃអាទិត្យថា ក្រុមហ៊ូទីនៅប្រទេសយេម៉ែនបានកំណត់គោលដៅលើនាវាដឹកប្រេងអារ៉ាប៊ីសាអ៊ូឌីតចំនួនបីគ្រឿងក្នុងរយៈពេល ៤៨ម៉ោង កន្លងមកនេះ។

ប្រភពនេះបាននិយាយថា ការវាយប្រហារទាំងនេះ គឺជាផ្នែកមួយនៃកិច្ចខិតខំប្រឹងប្រែងដើម្បីអនុវត្តការហាមឃាត់ការដឹកជញ្ជូនតាមផ្លូវសមុទ្ររបស់ក្រុមនេះលើការដឹកជញ្ជូនតាមផ្លូវទឹករបស់អារ៉ាប៊ីសាអ៊ូឌីត។

ប្រភពនេះអះអាងថា គ្មាននាវាដឹកប្រេងអារ៉ាប៊ីសាអ៊ូឌីតណាមួយបានឆ្លងកាត់ច្រកសមុទ្រ Bab al-Mandeb ដែលជាច្រកចូលភាគខាងត្បូងទៅកាន់សមុទ្រក្រហមនោះទេ ចាប់តាំងពីការបិទផ្លូវត្រូវបានដាក់កាលពីថ្ងៃចន្ទសប្តាហ៍មុន ដោយបញ្ជាក់ថា នាវាអារ៉ាប៊ីសាអ៊ូឌីតចំនួន ១៦ គ្រឿង ត្រូវបានបង្វែរត្រឡប់មកវិញ និងបដិសេធមិនឲ្យឆ្លងកាត់»។

ការអះអាងទាំងនេះមិនអាចផ្ទៀងផ្ទាត់ដោយឯករាជ្យបានទេ ហើយពុំមានការអត្ថាធិប្បាយភ្លាមៗពីអាជ្ញា ធរអារ៉ាប៊ីសាអ៊ូឌីត ឬក្រុមចម្រុះដឹកនាំដោយអារ៉ាប៊ីសាអ៊ូឌីតនោះទេ។

ក្រុមហ៊ូទីបាននិយាយកាលពីថ្ងៃព្រហស្បតិ៍ថា ខ្លួនបានកំណត់គោលដៅលើនាវាដឹកប្រេងអារ៉ាប៊ីសាអ៊ូឌីតចំនួនពីរគ្រឿងដែលរំលោភលើការហាមឃាត់ផ្លូវសមុទ្ររបស់ខ្លួននៅក្នុងសមុទ្រក្រហម។ ក្រោយមក ទីភ្នាក់ងារសារព័ត៌មានអារ៉ាប៊ីសាអ៊ូឌីតបានបញ្ជាក់ថា នាវាដឹកប្រេងដែលគ្រប់គ្រងដោយក្រុមហ៊ុនអារ៉ាប៊ីសាអ៊ូឌីត ត្រូវរងការវាយប្រហារ និងឆេះយ៉ាងសន្ធោសន្ធៅ៕