​បាល់ទាត់៖ ​ក្រុមបាល់ទាត់​ស្កុ​ត​ឡេ​ន Glasgow Rangers បាន​បន្ត​រដូវ​កាល​ដ៏​អស្ចារ្យ​របស់​ខ្លួន​ដោយ​បាន​ឈានឡើង​វគ្គ​ផ្តាច់ព្រ័ត្រ UEFA Europa League ក្រោយ​យកឈ្នះ​ក្រុម​អាល្លឺម៉ង់ RB Leipzig​។ ​​វគ្គ​ផ្តាច់ព្រ័ត្រ Europa League គឺជា​ការប៉ុនប៉ង​ចង់​ឈ្នះ​ពាននៅ​ក្រប​ខណ្ឌ​លើកដំបូង​ក្នុង​រយៈពេល ៥០​ឆ្នាំ​សំរាប់ Rangers ដែល​ស្ថិត​ក្រោម​ការដឹកនាំ​រប​ស់​គ្រូបង្វឹក​សញ្ជាតិ​ហូ​ឡង់ Giovanni van Bronckhorsht​។

​​បន្ទាប់ពី​ចាញ់​នៅ​ជើង​ទី១ ទឹកដី​អាល្លឺម៉ង់ ត្រលប់​មកកាន់​ទឹកដី​ស្កុ​ត​ឡេ​ន​វិញ​ត្រឹម ១៨​នាទី​ដំបូង Rangers ក៏​រកបាន​គ្រាប់​នាំមុខ​ដោយ James Tavernier មុន​ពេល​ដែល Glen Kamara បន្ថែម​មួយ​គ្រា​ប់​ទៀត​នៅ​នាទី​ទី​២៤​។ ​​ការប្រកួត​ហាក់​តានតឹង​នៅ​ពេល Christophe Nkunku ស៊ុត​បញ្ចូល​ទី​ឱ្យ Leipzig បាន​មួយ​គ្រាប់​ដែលជា​គ្រាប់​ទី៣២ របស់គេ​ក្នុង​រដូវ​កាល និង​មានន័យថា​ក្រុម​ទាំងពីរ​ស្មើគ្នា ២-២ សរុប​ទាំងពីរ​ជើង​។​ ​​នៅសល់តែ ១០នាទី​ទៀត​ចប់​ការប្រកួត John Lundstram គឺជា​អ្នកសំរេច​គ្រាប់​បាល់​ជ័យជំនះ​ឱ្យ Rangers យកឈ្នះ Leipzig ៣-១ និង​សរុប​ទាំងពីរ​ជើង ៣-២​។

​​ដោយ​ឡែក​មួយគូ​ទៀត​ក្រុម​អាល្លឺម៉ង់ Eintracht Frankfurt បានបញ្ចប់​ក្តី​ស្រមៃ​របស់ West Ham ហើយ​ក្រោយ​យកឈ្នះ​សរុប​ទាំងពីរ ៣-១​។ ​​ខ្សែការពារ West Ham, Aron Cresswell និង​អ្នកចាត់ការ​លោក David Moyes ត្រូវបានបណ្តេញចេញ​ទាំងពីរ​នាក់​នៅ​នាទី​ទី១៩ បន្ទាប់ពី​កំហុស​របស់ Cresswell ទទួលបាន​កាត​លឿង តែ VAR ធ្វើឱ្យ​កាត​លឿង​ប្រែ​ទៅជា​កាត​ក្រហម​។ ​​បន្ទាប់ពី​ឈ្នះ​ជើង​ទី១ នៅ​ទឹកដី​អង់គ្លេស ២-១ រួចហើយនោះ Frankfurt បាន​យកឈ្នះ​នៅ​ជើង​ទី២ នេះ​ទៀត ១-០ ដោយ​គ្រាប់​បាល់​របស់ Rafael Borre ខណៈ​ការប្រកួត​បញ្ចប់​ទៅដោយ​អ្នកគាំទ្រ Frankfurt បាននាំគ្នា​រត់​ចូល​ទីលាន ​ដើម្បី​អបអរសាទរ​ក្រុម​របស់ខ្លួន​ឡើង​វគ្គ​ផ្តាច់ព្រ័ត្រ​ក្របខណ្ឌ​អឺរ៉ុប​ លើកដំបូង​តាំងពី​ឆ្នាំ១៩៨០​។ ​​វគ្គ​ផ្តាច់ព្រ័ត្រ​នឹងធ្វើ​ឡើង​នៅ​ថ្ងៃទី១៨ ខែឧសភា​នេះនៅ​ទីក្រុង Seville ប្រទេស​អេ​ស្ប៉ា​ញ​ជំនួប​រវាង Frankfurt និង Rangers៕

​អត្ថបទ​៖​នាង សុភា​វុ​ធ