ភ្នំពេញ៖ បច្ចុប្បន្នការចុះចាក់វ៉ាក់សាំងបង្ការកូវីដ-១៩ នៅតាមទីផ្សារនៅតែបន្ត សម្រាប់ចាក់ជូនប្រជាពលរដ្ឋទូទៅទាំងអស់ដែលនៅសេសសល់ ទោះមានភាពស្ងប់ស្ងាត់យ៉ាងណាក្ដី។ ការបន្តចាក់វ៉ាក់សាំងនៅទីតាំងផ្សារជាទីប្រជុំជននេះ គឺដើម្បីផ្ដល់ភាពងាយស្រួលកាន់តែច្រើនសម្រាប់ប្រជាពលរដ្ឋ។

ក្រុមគ្រូពេទ្យនៅតែបន្តប្រចាំការតាមផ្សារគោលដៅមួយចំនួន សម្រាប់ចាក់វ៉ាក់សាំងបង្ការកូវីដ-១៩ជូនប្រជាពលរដ្ឋ ទាំងអ្នកចាក់ដូសមូលដ្ឋាន និងដូសជំរុញ។

ជាក់ស្ដែងសម្រាប់ខណ្ឌដូនពេញ ខណៈពេលនេះ គឺមានក្រុមគ្រូពេទ្យស្ម័គ្រចិត្តសម្ដេចពិជ័យសេនា ទៀ បាញ់ ចំនួន៣ក្រុម បន្តរង់ចាំចាក់វ៉ាក់សាំង នៅទីតាំងផ្សារចំនួន ៣ គឺផ្សារធំថ្មី ផ្សារកណ្ដាល និងផ្សារចាស់។

លោក ឆាយ គឹមឆេង ជាក្រុមគ្រូពេទ្យប្រចាំការ នៅទីតាំងផ្សារកណ្ដាល នាព្រឹកនេះ លើកឡើងថា ក្រុមការងារបានចាប់ផ្ដើមចុះវ៉ាក់សាំងតាំងពីចុងខែ មេសាមកម្លេះ។ ​គិតមកទល់ពេលនេះ គឺ​ក្រុមការងារបានចាក់វ៉ាក់សាំងជូនប្រជាពលរដ្ឋប្រមាណ ៥០០ទៅ៦០០នាក់ ហើយក្រុមការងារ​ក៏​នឹងបន្តរង់ចាំចាក់ជូនពលរដ្ឋគ្រប់វ័យរហូតដល់ថ្ងៃទី ១៦​ ខែឧសភាខាងមុខ ទោះបីប៉ុន្មានថ្ងៃចុង​ក្រោយ​នេះ ចំនួនប្រជាពលរដ្ឋមកទទួលការចាក់វ៉ាក់សាំងមានការធ្លាក់ចុះក្ដី។

ចំពោះការមកចាក់វ៉ាក់សាំងលើកទី ៤នៅព្រឹកនេះ ពលរដ្ឋ លើកឡើងថា ​ទោះស្ថានភាពឆ្លងកូវីដ-១៩ ទូទាំងប្រទេស ​ធ្លាក់ចុះស្ទើរតែគ្មានករណីឆ្លងយ៉ាងណាក្ដី ក៏លោកនៅតែមកចាក់វ៉ាក់សាំងឱ្យ​បាន​គ្រប់​ដូសតាមការកំណត់។ លោកថា ការចាក់វ៉ាក់សាំងបានគ្រប់ដូស គឺដើម្បីការពារខ្លួន ហើយ​លោក​ក៏សំណូមពរឱ្យ ​ពលរដ្ឋដែលមិនទាន់បានចាក់ ​ត្រូវរួសរាន់​មកចាក់វ៉ាក់សាំងផងដែរ។

ពាក់ព័ន្ធនឹងការចាក់វ៉ាក់សាំងកូវីដ-១៩ គ្រប់ដូសតាមការកំណត់​លោក ជំទាវ ឱ វណ្ណឌីន អ្នកនាំពាក្យ​ក្រសួងសុខាភិបាល ​ក៏បានពន្យល់នាពេលថ្មីៗនេះថា ​ការចាក់វ៉ាក់សាំងច្រើនដូស ពុំប៉ះពាល់​ដល់សុខភាពនោះទេ ​ផ្ទុយទៅវិញជួយឱ្យប្រព័ន្ធការពារកាន់តែខ្លាំង៕ អត្ថបទ៖ គឹមហុក