ភ្នំពេញ៖ កម្ពុជាមិនបន្តផ្តល់គម្រោងអភិវឌ្ឍន៍ថាមពលដើរដោយធ្យូងថ្មទៀតនោះទេ ក្រៅពីគម្រោងដែលរដ្ឋាភិបាលបានសម្រេចរួច ដោយជំរុញឱ្យមានការកែប្រែរោងចក្រធ្យូងថ្មទាំងនេះ ទៅជារោងចក្រដើរដោយឧស្ម័ន LNG វិញ។

ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល លើកឡើងនៅក្នុងជំនួបពិភាក្សាការងារជាមួយ ឯកឧត្តម Jyri Jarviaho ឯកអគ្គរដ្ឋទូតថ្មី នៃប្រទេសហ្វាំងឡង់ប្រចាំកម្ពុជា នៅថ្ងៃទី ៥ ខែឧសភា ឆ្នាំ២០២២ នេះថា សម្រាប់ជំហររបស់កម្ពុជា ក្នុងការអភិវឌ្ឍវិស័យថាមពលនាពេលអនាគត កម្ពុជា មានគម្រោងអភិវឌ្ឍបន្ថែមតែប្រភពផលិតថាមពលស្អាត ទៅក្នុងថាមពលចម្រុះ។

កម្ពុជា ក៏បានបេ្តជ្ញាចិត្តខ្ពស់ ក្នុងការចូលរួមប្រយុទ្ធប្រឆាំងការបំរែបំរួលអាកាសធាតុជាមួយអង្គការ​សហប្រជាជាតិ ​ដោយកម្ពុជាមិនបន្តផ្តល់គម្រោងអភិវឌ្ឍន៍ថាមពលដើរដោយធ្យូងថ្មទៀតនោះទេ បច្ចុប្បន្នចំពោះវិស័យថាមពល ប្រទសកម្ពុជាគឺជាប្រទេសមួយ ដែល​បញ្ចេញ​ឧស្ម័ន​កាបូនតិចតួច​បំផុត។

ឯកឧត្តមរដ្ឋមន្រ្តី បានលើកឡើងបន្តថា ជុំវិញវិស័យការអភិវឌ្ឍអគ្គិសនីនេះ, បច្ចុប្បន្នក្រសួងរ៉ែ និងថាមពល ​បានរៀបចំផែនការមេអភិវឌ្ឍវិស័យថាមពលវែង រហូតដល់ឆ្នាំ ២០៤០ ហើយបាន​គិតគូរ​គ្រប់ជ្រុងជ្រោយ​ ក្នុងគោលដៅ​ផ្គត់ផ្គង់​ថាមពលអគ្គិសនីនៅកម្ពុជា ​ឱ្យបានគ្រប់គ្រាន់ មាន​គុណភាព ស្ថេរភាព និងតម្លៃសមរម្យ ​ជាមួយនឹងការអភិវឌ្ឍថាមពលស្អាត។

ឯកឧត្តម Jyri Jarviaho ឯកអគ្គរដ្ឋទូត ​បានវាយតម្លៃខ្ពស់ ចំពោះវឌ្ឍនភាព​នៃការអភិវឌ្ឍវិស័យ​ថាមពល​របស់កម្ពុជា ​ដែលសម្រេចបានស្របតាម​គោលដៅ​អភិវឌ្ឍន៍​ ព្រោះវិស័យថា​មពល គឺជា​វិស័យមួយដែលមានសារៈសំខាន់ ​ដើម្បីការរស់នៅរបស់ប្រជាជន និងការចូលរួមអភិវឌ្ឍន៍​សេដ្ឋកិច្ចដើម ៕អត្ថបទ៖ សុន រ៉ាឌី