ភ្នំពេញ៖​ ការទទួលបាននិទ្ទេស A មិនមានន័យថា ត្រូវតែ​បន្តការ​សិក្សា​នៅ​សាកល​វិទ្យាល័យ​នោះ​ទេ។​ ជាក់ស្តែង យុវជន ខន ភក្ដី បានជ្រើសរើសសិក្សាជំនាញអេឡិចត្រូនិក នៅវិទ្យាស្ថាន​ជាតិ​ពហុ​បច្ចេកទេសកម្ពុជា (NPIC) ​ ព្រោះមើលឃើញឱកាសការងារខ្ពស់ ស្របនឹង​ចំណង់​ចំណូល​ចិត្ត ​និងអាចកសាងអាជីពបាន​លឿន។

ភក្តីបានលើកឡើងថា៖ «ខ្ញុំជ្រើសរើសជំនាញអេឡិចត្រូនិក ព្រោះជាជំនាញដែលខ្ញុំចូលចិត្ត ហើយ​ខ្ញុំ​មើលឃើញថា មានទីផ្សារការងារធំទូលាយ។ ពេលរៀនចប់ យើងមានឱកាសការងារខ្ពស់ និង​អាច​មា​នគោលដៅអាជីពច្បាស់លាស់ ដើម្បីជួយគ្រួសារបាន»។

អតីតសិស្សនិទ្ទេស A រូបនេះបានកោតសរសើរថា វិទ្យាស្ថានជាតិពហុបច្ចេកទេសកម្ពុជា (NPIC) មាន​ទីធ្លាធំទូលាយ បរិយាកាសល្អ អនាម័យ និងបរិស្ថានបៃតង បំពាក់ទៅ​ដោយ​ឧបករណ៍​បច្ចេក​ទេស​ទំនើប​ៗ សម្រាប់សិស្ស-និស្សិតអនុវត្តផ្ទាល់ ធ្វើឱ្យរៀនឆាប់ចេះ ងាយយល់ ព្រោះគ្រូ​មាន​គុណភាព​។

បន្ទាប់ពីទទួលបានអាហារូបករណ៍ ១០០% សម្រាប់សិក្សាលើជំនាញដែលខ្លួនស្រឡាញ់ ភក្តី បាន​បញ្ជាក់​ថា អាហារូបករណ៍នេះមិនត្រឹមតែជួយសម្រាលបន្ទុកហិរញ្ញវត្ថុរបស់គ្រួសារប៉ុណ្ណោះទេ ប៉ុន្តែ​ថែមទាំងជាកម្លាំងចិត្ត និងធ្វើ​ឱ្យ​ក្រុម​គ្រួសារ​មាន​មោទនភាព​ចំពោះ​សមិទ្ធ​ផល​ដែល​លោក​សម្រេច​បាន​ផងដែរ។

ជាចុងក្រោយ ភក្ដី បានអំពាវនាវដល់យុវជនកម្ពុជាងាកមកចាប់អារម្មណ៍សិក្សាជំនាញ TVET ព្រោះ​វា​ផ្តល់ទាំងចំណេះដឹង ជំនាញ ការអនុវត្តជាក់ស្តែង និងឱកាសការងារខ្ពស់។ លោក​ក៏​បាន​លើក​ទឹក​ចិត្តឱ្យយុវជនហ៊ានដើរតាមក្តីស្រមៃ និងជ្រើសរើសជំនាញដែលសមស្របនឹងសមត្ថភាព និង​ចំណង់ចំណូលចិត្តរបស់ខ្លួន ដើម្បីកសាងអនាគតប្រកបដោយជោគជ័យ៕