អ៊ុយក្រែន៖ ប្រទេសអ៊ុយក្រែនបានទទួលការសន្យាសម្រាប់ជំនួយមនុស្សធម៌ចំនួន ៦.៥ពាន់លានដុល្លារបន្ថែមទៀតកាលពីថ្ងៃព្រហស្បតិ៍ នៅក្នុងសន្និសីទម្ចាស់ជំនួយអន្តរជាតិនៅទីក្រុងវ៉ាសាវី (Warsaw) ក្នុងបំណងស្តារប្រទេសឡើងវិញបន្ទាប់ពីសង្គ្រាម។
នាយករដ្ឋមន្ត្រីប៉ូឡូញលោក Mateusz Morawiecki ដែលជាសហប្រធាននៃសន្និសីទបានប្រកាសអំពីតួលេខមូលនិធិនេះ ដោយទទួលបានការសាទរពីមេដឹកនាំ និងមន្ត្រីផ្សេងទៀតដែលចូលរួមក្នុងកិច្ចប្រជុំរយៈពេលមួយថ្ងៃ រួមទាំងតំណាងមកពីអង្គការសហប្រជាជាតិ និងក្រុមហ៊ុនដូចជា Google ជាដើម។ ការសន្យានេះបានមកពីបណ្ដាប្រទេស និងធុរកិច្ចដែលភាគច្រើនបានចូលរួមសន្និសីទ នៅពហុកីឡាដ្ឋានជាតិទីក្រុងវ៉ាសាវីដោយផ្ទាល់ ហើយប្រទេសផ្សេងទៀតបានសន្យាពីចម្ងាយ។ សហប្រធានរបស់លោកគឺនាយករដ្ឋមន្ត្រីស៊ុយអែតលោកស្រី Magdalena Andersson បាននិយាយថា តួលេខចំនួនសរុបលើសពីការរំពឹងទុករបស់ពួកគេ។
ប្រទេសភាគច្រើនលើពិភពលោកបានឆ្លើយតប ទៅនឹងសង្គ្រាមនៅអ៊ុយក្រែនដោយការគាំទ្រផ្នែកមនុស្សធម៌។ ប៉ុន្តែខណៈសង្គ្រាមនៅតែអូសបន្លាយ តម្រូវការមនុស្សធម៌នៅអ៊ុយក្រែនកាន់តែធ្ងន់ធ្ងរទៅៗ។ ក្រៅពីមនុស្សរាប់ពាន់នាក់បានស្លាប់ មនុស្សរាប់លាននាក់ផ្សេងទៀតបានភៀសខ្លួន។ នាយករដ្ឋមន្ត្រីប៉ូឡូញលោក Morawiecki បាននិយាយថា អ៊ុយក្រែនត្រូវការជំនួយមនុស្សធម៌ជាង ១២,០០០តោនជារៀងរាល់ថ្ងៃ ប៉ុន្តែមានតែ ៣,០០០តោនប៉ុណ្ណោះដែលកំពុងទទួលបាន។ ប្រធានគណៈកម្មការអឺរ៉ុបលោកស្រី Ursula von der Leyen បាននិយាយថា ការវិនិយោគ និងកំណែទម្រង់គឺចាំបាច់ដើម្បីស្តារប្រទេសអ៊ុយក្រែនឡើងវិញ និងត្រួសត្រាយផ្លូវសម្រាប់ការចូលជាសមាជិកសហភាពអឺរ៉ុប៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
