ឯកឧត្តម វង សូត អនុប្រធានទី២រដ្ឋសភា និងជាតំណាងរាស្ត្រមណ្ឌលខេត្តត្បូងឃ្មុំ អម​ដំណើរ​ដោយ​ឯកឧត្តម លោកជំទាវ តំណាងរាស្ត្រមណ្ឌលខេត្តត្បូងឃ្មុំ ឯកឧត្តម ឡុង ធាម ប្រធាន​ក្រុម​ប្រឹក្សា​ខេត្ត និងឯកឧត្តម ប៉ែន កុសល្យ អភិបាលខេត្តនៃគណៈអភិបាលខេត្តត្បូងឃ្មុំ ព្រម​ទាំង​និង​ថ្នាក់​ដឹក​នាំពាក់ព័ន្ធ បានអញ្ជើញជួបសំណេះសំណាលជាមួយប្រធានភូមិ ក្រុមប្រឹក្សាឃុំ ក្រុម​ប្រឹក្សា​ស្រុក អតីតយុទ្ធជន និងនិវត្តជន ក្នុងស្រុកពញាក្រែក ខេត្តត្បូងឃ្មុំ សរុប ៤៩២ នាក់។

ក្នុងឱកាសនោះឯកឧត្តម វង សូត បានពាំនាំការផ្តាំផ្ញើសួរសុខទុក្ខ និង​សេចក្តី​នឹក​រលឹក​ពី​សំណាក់​សម្តេច​ពញាចក្រី ហេង សំរិន សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្ត្រីជូនដល់អាជ្ញាធរមូលដ្ឋាន និវត្តជន និងអតីតយុទ្ធជន ដោយ​គូស​បញ្ជាក់​ថា ថ្នាក់ដឹកនាំ តែងតែយកចិត្តទុកដាក់ចំពោះសុខទុក្ខ និងជីវភាពរស់នៅរបស់មន្ត្រីរាជការ និវត្តជន ​និងអតីតយុទ្ធជនជានិច្ច។

ឯកឧត្តម​បន្តថា ការចុះជួបសំណេះសំណាលនេះ មានគោល​បំណង​ពង្រឹង​ប្រសិទ្ធ​ភាព​ការងារ​នៅ​មូល​ដ្ឋាន ដោយជំរុញឱ្យអាជ្ញាធរគ្រប់លំដាប់ថ្នាក់ បន្តលើកកម្ពស់ការបំពេញភារកិច្ច និងការផ្តល់​សេវា​សាធារណៈជូនប្រជាពលរដ្ឋ ប្រកបដោយតម្លាភាព ប្រសិទ្ធភាព និងឆាប់រហ័ស ព្រមទាំង​យក​ចិត្ត​ទុកដាក់ដោះស្រាយបញ្ហា និងសំណូមពររបស់ប្រជាពលរដ្ឋឱ្យបានទាន់ពេលវេលា ។ ក្នុង​នោះ​អាជ្ញាធរមូលដ្ឋាន ត្រូវបន្តសហការយ៉ាងជិតស្និទ្ធជាមួយសមត្ថកិច្ចពាក់ព័ន្ធ ក្នុងការអនុវត្ត​ច្បាប់​ស្តី​ពីការប្រឆាំងការឆបោកតាមប្រព័ន្ធបច្ចេកវិទ្យា និងពង្រឹងការអនុវត្តគោលនយោបាយភូមិ-ឃុំមានសុវត្ថិភាព ដោយផ្តោតលើការទប់ស្កាត់ និងបង្ក្រាបបទល្មើសគ្រប់ប្រភេទ ជាពិសេសបទល្មើសគ្រឿងញៀន ល្បែងស៊ីសង និងបទល្មើសដែលប៉ះពាល់ដល់សន្តិសុខ សណ្តាប់ធ្នាប់សង្គម។

ទន្ទឹមនឹងនេះ ឯកឧត្តមបានអំពាវនាវឱ្យអាជ្ញាធរមូលដ្ឋាន បន្តយកចិត្តទុកដាក់សួរសុខទុក្ខ និងជួយឧបត្ថម្ភគាំទ្រនិវត្តជន និងអតីតយុទ្ធជនដែលជួបការលំបាក ព្រមទាំងបានកោតសរសើរចំពោះកិច្ចខិតខំប្រឹងប្រែងរបស់អាជ្ញាធរមូលដ្ឋាន គ្រប់លំដាប់ថ្នាក់ ដែលបានរួមចំណែកថែរក្សាសន្តិសុខ សណ្តាប់ធ្នាប់សង្គម និងជំរុញការអភិវឌ្ឍមូលដ្ឋានឱ្យមានការរីកចម្រើនជាបន្តបន្ទាប់បន្ថែមទៀត៕ អត្ថបទ៖ សេងឡុង