អនុប្រធានក្រុមការងារគណបក្សប្រជាជនកម្ពុជាចុះជួយខេត្ត ឯកឧត្តម កឹង ឃន និងជាប្រធានក្រុមការងារចុះជួយចុះ ស្រុកកំពង់រោទិ៍ ខេត្តស្វាយរៀង បានណែនាំដល់មន្ត្រីបក្ស ត្រូវធ្វើគំរូល្អ ក្នុងការដឹកនាំពលរដ្ឋអនុវត្តគោលនយោបាយភូមិឃុំមានសុវត្តិភាព រក្សាការពារ សន្តិសុខ សណ្ដាប់ធ្នាប់សង្គម និងធ្វើការអភិវឌ្ឍន៏មូលដ្ឋាន។

ការថ្លែងនិងមានប្រសាសន៍លើកឡើងរបស់ ឯកឧត្តម ក្រុមការងារចុះជួយមូលដ្ឋានបែបនេះបានធ្វើឡើងក្នុងពិធីសំណេះសំណាល ជាមួយថ្នាក់ដឹកនាំបក្សមូលដ្ឋាន ឃុំព្រះពន្លា ស្រុកកំពង់រោទិ៍ ខេត្តស្វាយរៀង ថ្ងៃទី១ខែសីហាឆ្នាំ២០២៦នេះ។

ឯកឧត្តមប្រធានក្រុមការងារគណបក្សចុះជួយស្រុកក៏បានសំដែងអបអរសាទរផងដែរចំពោះលោក លោកស្រី ពិសេសក្រុមការងារគណបក្សថ្នាក់កណ្ដាល ថ្នាក់ខេត្ត និងថ្នាក់ស្រុកចុះជួយឃុំដែលកន្លងមកបានរួមដឹកនាំពលរដ្ឋអនុវត្តគោលនយោបាយភូមិឃុំ មានសុវត្ថិភាពរក្សាបានសន្តិសុខនិងការអភិវឌ្ឍន៍មូលដ្ឋានលើស្រុកវិស័យ។

ទាក់ទងទិសដៅចំពោះមុខ ឯកឧត្តម ប្រធានក្រុមការងារ បានជំរុញដល់ថ្នាក់ដឹកនាំបក្ស ដែលមានតំណែងក្នុងមន្ត្រីឃុំ ត្រូវចុះផ្សព្វផ្សាយអប់រំពលរដ្ឋអោយយល់ ពីសកម្មភាព ល្បិចឆបោក តាមប្រពន្ធ័សង្គម របស់ពួកក្រុមសង្គមងងិត សំដៅបញ្ជៀសពលរដ្ឋ កុំអោយចាញ់បោកតាមរយះសន្យា ជួលផ្ទះ និងមធ្យោបាយផ្សេងៗដែលនាំអោយប៉ះពាល់សន្តិសុខផ្ទាល់ខ្លួននិងទ្រព្យសម្បត្តិ។

ឯកឧត្តមប្រធានក្រុមការងារក៏បានណែនាំដល់មន្ត្រីបក្សបន្តចុះសិក្សាស្វែងយល់ពីតម្រូវការ សេដ្ឋកិច្ចនិងជីវភាពគ្រួសារបច្ចុប្បន្ន និងធ្វើការឆ្លើយតបដល់ពួកគាត់ជាបន្ទាន់ក្នុងករណីចាំបាច់ដែលពួកគាត់មានតម្រូវការចំពោះមុខក្នុងរដូវវស្សានេះផងដែរ៕