ថ្នាក់ដឹកនាំមន្ត្រីរាជការមន្ទីរនិងការិយាល័យអប់រំយុវជននិងកីឡាខេត្ត ស្រុក ក្រុង នាយក នាយិកា គ្រឹះស្ថានសិក្សាសាធារណៈក្នុងខេត្តពោធិ៍សាត់ជាង៥០០នាក់ បានចូលរួមផ្សព្វផ្សាយព្រះរាជក្រឹត្យស្តីពីលក្ខន្តិកៈនៃអង្គគ្រូបង្រៀនដែលបានប្រារព្ធធ្វើនៅបណ្តាល័យសាមគ្គីវិទ្យាល័យពោធិ៍សាត់នារសៀលថ្ងៃទី៣១ខែកក្កដា ឆ្នាំ២០២៦ ក្រោមអធិបតីភាព ឯកឧត្តមខូយ រីដា អភិបាលនៃគណៈអភិបាលខេត្តព្រមទាំងមានការចូលរួមពីលោកអភិបាលរងខេត្ត កងកម្លាំងប្រដាប់អាវុធទាំង៣ រដ្ឋបាលស្រុក ក្រុងនិងថ្នាក់ដឹកនាំមន្ទីរអង្គភាពជុំវិញខេត្ត។

លោក លឹម វុទ្ធី ប្រធានមន្ទីរ អប់រំយុវជននិងកីឡាខេត្ត ថ្លែងថាពិធីផ្សព្វផ្សាយព្រះរាជក្រឹត្យស្តីពីលក្ខន្តិកៈនៃអង្គគ្រូ បង្រៀននាពេលនេះគឺធ្វើឡើងក្នុងគោលបំណងឆ្លើយតបទៅនឹងទិសដៅកែទម្រង់ស៊ីជម្រៅលើវិស័យអប់រំរបស់រាជរដ្ឋាភិបាល សំដៅបញ្រ្ជាបការយល់ដឹងឱ្យកាន់តែច្បាស់ជូនដល់ថ្នាក់ដឹកនាំ មន្ត្រីអប់រំ នាយក នាយិកាលោកគ្រូ អ្នកគ្រូនិងអ្នក ពាក់ព័ន្ធ។ព្រះរាជក្រឹត្យដ៏មានសារៈសំខាន់នេះគឺជាឯកសារបទដ្ឋានគតិយុត្តិដ៏រឹងមាំក្នុងការកំណត់អំពីសិទ្ធ កាតព្វកិច្ចនិងក្រមសីលធម៌វិជ្ជាជីវៈរបស់គ្រូបង្រឿន លក្ខខណ្ឌនៃការជ្រើសរើស ការតែងតាំងការតម្លើងថ្នាក់ ឋានន្តរសក្កិនិងការគ្រប់គ្រងមុខតំណែងព្រមទាំងរបបគោលនយោបាយ ការលើកទឹកចិត្តផ្សេងៗ ដើម្បីធានានូវយុត្តិធម៌ តម្លាភាព និងកិត្យា នុភាពនៃអាជីពជាគ្រូបង្រៀន។

ឯកឧត្តម ខូយ រីដា អភិបាលនៃគណៈអភិបាលខេត្តបានថ្លែងក្នុងពិធីបើកនោះថា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃនិងប៉ិនប្រសប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានកំណត់យក ការអភិវឌ្ឍធនធានមនុស្ស ជាអាទិភាពទី១នៅក្នុងយុទ្ធសាស្ត្របញ្ចកោណដំណាក់កាលទី១។ ក្នុងនោះគ្រូបង្រៀនគឺជាសសរទ្រូងនិងជាតួអង្គស្នូលក្នុងការលើកកម្ពស់គុណភាពអប់រំក្នុងការបណ្តុះបណ្តាលធនធានមនុស្សប្រកបដោយចំណេះដឹងសមត្ថភាព ចរិយាធម៌និងបំណិនជីវិត ឆ្លើយតបទៅនឹងការអភិវឌ្ឍសង្គម សេដ្ឋកិច្ចក្នុងយុគសម័យឌីជីថល។ ការប្រកាសឱ្យប្រើព្រះរាជក្រឹត្យនេះ គឺជាសក្ខីភាពនិងជាសាក្សីប្រវត្តិសាស្ត្រថ្មីមួយទៀតក្នុងការលើកកម្ពស់កិត្តិយស តម្លៃនិងកិត្យានុភាពនៃ អាជីពជាគ្រូបង្រឿន។

ក្នុងនាមរដ្ឋបាលខេត្តឯកឧត្តម ខូយ រីដា បានបញ្ជាក់ថា ព្រះរាជក្រឹត្យនេះមិនត្រឹមតែជាលិខិតបទ ដ្ឋានគតិយុត្តិសម្រាប់គ្រប់គ្រងមន្ត្រីរាជការនៃអង្គគ្រូបង្រៀនប៉ុណ្ណោះទេប៉ុន្តែថែមទាំង ១-ធានានូវសមធម៌ និងតម្លាភាព ២-លើកកម្ពស់ជីវភាពនិងការលើកទឹកចិត្ត និង៣-ពង្រឹងកាតព្វកិច្ចនិងវិជ្ជាជីវៈសារវន្ត។ដូច្នេះមន្ទីរអប់រំ យុវជននិងកីឡាខេត្តស្រុក ក្រុង នាយក នាយិកាគ្រឹះស្ថានសិក្សាសាធារណៈត្រូវសិក្សាស្វែងយល់ស៊ីជម្រៅនិងក្តាប់ឱ្យជាប់នូវបទប្បញ្ញត្តិទាំង ឡាយដែលមានចែងក្នុងព្រះរាជក្រឹត្យដើម្បីយកទៅដឹកនាំ និងគ្រប់គ្រងប្រកបដោយយុត្តិធម៌ព្រមទាំងជួយតម្រង់ទិស លុបបំបាត់ភាពអសកម្ម និងលើកទឹកចិត្តគ្រូមានស្នាដៃ។ជាមួយគ្នានោះដែរសូមបន្តពង្រឹងសមត្ថភាពផ្ទាល់ខ្លួនទាំងផ្នែកវិធី  សាស្ត្របង្រៀន បច្ចេកវិទ្យានិងចំណេះដឹងទូទៅ ប្រកាន់ខ្ជាប់នូវក្រមសីលធម៌វិជ្ជាជីវៈគ្រូបង្រៀនឱ្យសក្តិសមជាកុលបុត្រ កុលធីតា ដែលសង្គមជាតិផ្តល់ទំនុកចិត្តនិងគោរពព្រមទាំងរក្សាបាននូវអត្ថប្រយោជន៍នានារបស់អង្គគ្រូបង្រៀន៕