កីឡាករចាស់វស្សា ធារី ចន្ថាប៊ីន ទូតសុច្ឆន្ទៈ CJ Coaching Cambodia បានសម្ដែងការគាំទ្រការបង្កើតឲ្យមានពានកម្រិតយុវជន CJ Summer League លើកដំបូង ដោយលោកចាត់ទុកជាវេទិកាដើម្បីផ្ដល់ឱកាសដល់យុវជនបញ្ចេញ និងអភិវឌ្ឍន៍ខ្លួន ឈានទៅចាប់ក្ដីស្រម៉ៃក្លាយជាកីឡាករអាជីពនាថ្ងៃអនាគត។

លោក សុខ ឡេង អ្នកគ្រប់គ្រងពាននេះ បានឲ្យដឹងថា ការប្រកួតបានប្រព្រឹត្តទៅរយៈពេល ៥សប្ដាហ៍ ដោយមានបេក្ខភាព ៦ក្រុមចូលរួម និងធ្វើការប្រកួតសន្សំពិន្ទុ ២ជុំ ដើម្បីស្វែងរកក្រុមលេខ១ ដល់លេខ៣ ឡើងវគ្គបន្ដ រហូតរកឃើញក្រុមជ័យលាភី ដែលបានទៅក្រុម NOVA FT ក្រោយយកឈ្នះក្រុមអង្គការហេភីហ្វូតបាល់កម្ពុជាអូស្ដ្រាលី នៅវគ្គផ្ដាច់ព្រ័ត្រ។

គោលបំណងនៃការរៀបចំពានកម្រិតអាយុក្រោម ១៨ឆ្នាំនេះ គឺដើម្បីផ្ដល់ឱកាសដល់យុវជនមិនសូវមានឱកាសលេង ពិសេសឱកាសលេងពានរង្វាន់នានា បានចូលរួមបង្ហាញសមត្ថភាព និងទេពកោសល្យរបស់ខ្លួន ជាមួយការរៀបចំស្ដង់ដារ ៧នាក់ទល់ ៧នាក់ ដែលមានអាជ្ញាកណ្ដាលត្រឹមត្រូវ អមជាមួយរង្វាន់លើកទឹកចិត្តបន្ថែមទៀត។

ជុំវិញការរៀបចំនេះ កីឡាករ ធារី ចន្ថាប៊ីន បានលើកឡើងថា នេះជាឱកាសល្អ ពិសេសកំឡុងពេលសម្រាកពីការសិក្សារបស់សិស្សានុសិស្ស ដែលអាចចូលរួមលេង និងបង្ហាញសមត្ថភាព ហើយក៏ជាវេទិកាមួយដ៏ល្អ ដើម្បីអភិវឌ្ឍន៍ធនធានកីឡាករវ័យក្មេង និងអនាគតបាល់ទាត់កម្ពុជាផងដែរ។

ចំណែកយុវជន វណ្ណនី វិបុត្រ បានសម្ដែងក្ដីរីករាយ ដែលមានឱកាសបង្ហាញសមត្ថភាព និងជួយក្រុមលើកពាន។ កីឡាករវ័យ ១៧ឆ្នាំនេះថា នេះជាជំហានថ្មីមួយ សម្រាប់យុវជនគ្រប់រូប អាចអភិវឌ្ឍន៍ខ្លួន ឆ្ពោះទៅរកកម្រិតពាក់កណ្ដាលអាជីព ឬអាជីពនាថ្ងៃអនាគត ក៏ដូចជាឱកាសប្រកួតលក្ខណៈអន្ដរជាតិផងដែរ។

យោងតាមគណៈកម្មការរៀបចំ ក្រោយទទួលបានជោគជ័យក្នុងការប្រកួតពានរង្វាន់ CJ Summer League ថ្នាក់ដឹកនាំគ្រោងនឹងរៀបចំឲ្យមានការប្រកួតពានរង្វាន់ផ្សេងៗទៀត ដែលអាចឈានដល់ការអញ្ជើញក្រុមបរទេសចូលរួម ដើម្បីបង្កើនឱកាសប្រកួតប្រជែងផង ផ្សារភ្ជាប់ជាមួយទេសចរណ៍ និងជំរុញដល់សេដ្ឋកិច្ចជាតិ តាមរយៈក្រុមចូលរួមដែលមកពីក្រៅប្រទេសផង៕ អត្ថបទ លី ឈុនឡា