ឧត្ដរមានជ័យ៖ អភិបាលខេត្តឧត្តរមានជ័យ ថ្លែងថា បងប្អូនពលករ ដែលបានឆ្លងដែនមកពីប្រទេសថៃ ដែលពុំបានទទួលការចាក់​វ៉ាក់សាំងនោះ ត្រូវតែចូលរួមទទួលយកការចាក់វ៉ាក់សាំងឲ្យបានគ្រប់ៗគ្នា នៅនឹងច្រកព្រំដែនមុននឹងបងប្អូនវិលទៅស្រុកកំណើតរបស់ខ្លួនវិញ។

ឯកឧត្តម ប៉ែន កុសល្យ អភិបាលខេត្តឧត្តរមានជ័យ បន្តថា ការ​ដែល​អាជ្ញាធរ​តម្រូវ​ឲ្យពលករ​ត្រូវ​តែចាក់វ៉ាក់សាំងនោះ គឺដើម្បីការពារអាយុជីវិត​និង​សុខភាព​របស់បងប្អូនប៉ុណ្តោះ។

គូសបញ្ជាក់ថា វ៉ាក់សាំង​ដែល​បាន​ចាក់​ជូន​បងប្អូន​ពលករ​នៅ​ច្រកព្រំដែននោះ​រួមមាន៖ ប្រភេទវ៉ាក់សាំង​ស៊ីណូហ្វាក់ នឹងអាត្រាស៊ីណីកា ចំពោះ​ពលករ​ដែល​ទើប​នឹង​ចាក់ដូសទី១ ​គឺ​ត្រូវ​ធ្វើ​ចត្តាឡីស័ក១សប្តាហ៍ ទើប​អាច​ត្រលប់​ទៅ​មូលដ្ឋានបាន។ក្នុងករណីបងប្អូនពុំមានកាត ឬប័ណ្ណចាក់​វ៉ាក់​សាំង​នោះ ​បងប្អូន​មិន​អាចវិលត្រលប់​ទៅប្រទេសថៃវិញបានឡើយ​ ដោយ​ខាងភាគថៃ​រាល់​ការចេញចូលបច្ចុប្បន្ននេះ ​គឺ​តម្រូវឲ្យបងប្អូន​ឆ្លងដែនត្រូវមាន​ឯកសារត្រឹមត្រូវ​រួមទាំង​កាតចាក់វ៉ាក់សាំង​ផងដែរ ​ទើបអាចធ្វើដំណើរស្របច្បាប់​ដោយមិនមាន​ការ​ព្រួយបារម្ភអ្វីឡើយ ។

អត្ថបទ៖ ឃិន សារិទ្ធ