ក្លិបបាល់ទាត់ Renaissance Berkane ដែលមានមូលដ្ឋាននៅប្រទេសម៉ារ៉ុក បានប្រកាសជាផ្លូវការពីការតែងតាំងលោក Bubista ជាគ្រូបង្វឹកថ្មីរបស់ក្លិប បន្ទាប់ពីគ្រូបង្វឹកជនជាតិកាប់វែររូបនេះ ដឹកនាំក្រុមជម្រើសជាតិរបស់ខ្លួនបង្កើតប្រវត្តិសាស្ត្រក្នុងការបង្ហាញខ្លួនជាលើកដំបូងនៅព្រឹត្តិការណ៍បាល់ទាត់ពិភពលោក ២០២៦។

លោក Bubista ដែលមានឈ្មោះពិត Pedro Leitao Brito បានចុះកិច្ចសន្យារយៈពេល ២ រដូវកាលជាមួយ Renaissance Berkane បន្ទាប់ពីការចរចាអូសបន្លាយអស់មួយរយៈ។ ដំបូងមានការពិភាក្សាថា លោកអាចបន្តដឹកនាំក្រុមជម្រើសជាតិកាប់វែរ និងធ្វើការងារទាំងពីរតំណែងក្នុងពេលតែមួយ ប៉ុន្តែទីបំផុតលោកបានសម្រេចលាលែងពីតំណែងជាគ្រូបង្វឹកក្រុមជម្រើសជាតិ។ ការសម្រេចចិត្តនេះក៏ត្រូវបានសហព័ន្ធបាល់ទាត់កាប់វែរបញ្ជាក់ជាផ្លូវការផងដែរ។

គ្រូបង្វឹកវ័យ ៥៦ ឆ្នាំរូបនេះ ត្រូវបានជ្រើសរើសជាគ្រូបង្វឹកឆ្នើមប្រចាំទ្វីបអាហ្វ្រិកឆ្នាំ២០២៥ បន្ទាប់ពីដឹកនាំកាប់វែរ ឡើងទៅកាន់ FIFA World Cup ជាលើកដំបូងក្នុងប្រវត្តិសាស្ត្ររបស់ប្រទេស។

នៅក្នុង World Cup ឆ្នាំនេះកាប់វែរ បានធ្វើឱ្យពិភពបាល់ទាត់ភ្ញាក់ផ្អើល ដោយស្មើជាមួយអេស្ប៉ាញ និងអ៊ុយរូហ្គាយ ក្នុងវគ្គចែកពូល មុនពេលចាញ់អាហ្សង់ទីនក្នុងម៉ោងបន្ថែម នៅវគ្គ ៣២ ក្រុមចុងក្រោយ។

សម្រាប់ Renaissance Berkane វិញ ក្លិបបានឈ្នះជើងឯកលីគកំពូលម៉ារ៉ុកនៅឆ្នាំ២០២៥ ហើយបានបញ្ចប់ត្រឹមជើងឯករងរដូវកាលមុន។ លើសពីនេះ ក្លិបក៏បានឡើងដល់វគ្គពាក់កណ្តាលផ្តាច់ព្រ័ត្រ CAF Champions League រដូវកាលមុនផងដែរ ហើយនឹងបន្តចូលរួមការប្រកួតក្លិបកំពូលប្រចាំទ្វីបអាហ្វ្រិកម្តងទៀតនៅរដូវកាលថ្មី៕ អត្ថបទ៖នាង សុភាវុធ