ភ្នំពេញ៖ កម្ពុជា-ចិន រួមគ្នា​សម្ពោធដាក់ដំណើរការជាផ្លូវ​ការកម្មវិធីបណ្តុះបណ្តាល «នាវាសន្តិភាព​មេគង្គ-ឡានឆាង» ក្រោមមូលបទ៖ "មេគង្គដើម្បីប្រជាជន សន្តិភាព និងវិបុលភាព" នាព្រឹកថ្ងៃទី៥ ខែសីហា ឆ្នាំ២០២៦ នៅលើនាវាក្នុងទន្លេចតុមុខ រាជធានីភ្នំពេញ។ កម្មវិធីនេះ អញ្ញើញចូលរួមជាអធិបតី ដោយ ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា និងជាប្រធានក្រុមរដ្ឋសភាកម្ពុជា នៃសភាវ័យក្មេង, លោកបណ្ឌិត ឆេង គឹមឡុង ប្រធានវិទ្យាស្ថានចក្ខុវិស័យអាស៊ី (AVI),​ឯកឧត្តម Wang Wenbin ឯកអគ្គរដ្ឋទូតសាធារណរដ្ឋប្រជាមានិតចិន ប្រចាំនៅកម្ពុជា។

ឯកឧត្តម សួស យ៉ារ៉ា បានឱ្យដឹងថា តាមរយៈ​កម្មវិធីបណ្តុះបណ្តាលនាវាសន្តិភាព មេគង្គ-ឡានឆាង នឹងជំរុញឱ្យមានការកសាងទំនាក់ទំនងកាន់តែជិតស្និតជាមួយបណ្តាប្រទេសជាសមាជិកមេគង្គ-ឡានឆាង។ ក្នុងរយៈពេល ១០​ឆ្នាំកន្លងមកនេះ ប្រទេសកម្ពុជាទទួលបាន ១០០ គម្រោងនៃ​កិច្ចសហប្រតិបត្តិការមេគង្គ-ឡានឆាង ដែលថវិការសរុបជាង ៣០លាន​ដុល្លារអាមេរិក។ គម្រោងទាំងនោះ បាន​ផ្តោតទៅលើការកសាងធនធានមនុស្ស, បរិស្ថាន, ថាមពល, និងស្បៀងអាហារ។

កម្មវិធីបណ្តុះបណ្តាល«នាវាសន្តិភាពមេគង្គ-ឡានឆាង» គឺជាគម្រោងមួយដែលអនុវត្តដោយវិទ្យាស្ថានចក្ខុវិស័យអាស៊ី (AVI) ដែលបាន​គាំទ្រពីមូលនិធិពិសេសសហប្រតិបត្តិការមេគង្គ-ឡានឆាង ឆ្នាំ២០២៥ នៃសាធារណរដ្ឋប្រជាមានិតចិន (PRC)។ ឯកឧត្តម វ៉ាង វិនពីន (Wang Wenbin) បានបញ្ជាក់ថា ដោយមានការគាំទ្រពីមូលនិធិពិសេសនៃកិច្ចសហប្រតិបត្តិការឡានឆាង-មេគង្គ «នាវាសន្តិភាពឡានឆាង-មេគង្គ» បានចេញដំណើរម្តងទៀត ដោយផ្តល់នូវវេទិកាដ៏មានប្រយោជន៍ និងឱកាសដ៏មានតម្លៃសម្រាប់ការសន្ទនា និងការផ្លាស់ប្តូរក្នុងចំណោមយុវជននៃប្រទេសទាំងប្រាំមួយ។ «នាវា​សន្តិភាព​ឡានឆាង-មេគង្គ» ដែល​ជាឈ្មោះដាក់​តាម​ទូក​មួយ តំណាងឱ្យ​វាសនា​រួមគ្នា និង​សាមគ្គីភាព​របស់​យុវជន​ប្រទេស​ទាំង​ប្រាំមួយ នៅពេល​ពួកគេ​ជិះ​ទូក​ជាមួយគ្នា​នៅលើ​ទន្លេមេគង្គ ដែលជា​ការពណ៌នា​យ៉ាង​រស់រវើក​អំពី​វាសនា​រួមគ្នា និង​ការគាំទ្រ​ទៅវិញទៅមក​របស់​តំបន់។

លោកបណ្ឌិត ឆេង គឹមឡុង ប្រធានវិទ្យាស្ថានចក្ខុវិស័យអាស៊ី (AVI) បាន​បញ្ជាក់ថា កម្មវិធីបណ្តុះបណ្តាលនេះបម្រើជាវេទិកាសម្រាប់អ្នកប្រាជ្ញ, អ្នកស្រាវជ្រាវ, អ្នកធ្វើគោលនយោបាយ, មន្ត្រីរដ្ឋាភិបាល, និងអ្នកសារព័ត៌មានមកពីប្រទេសកម្ពុជា, ចិន, ឡាវ, មីយ៉ាន់ម៉ា, ថៃ, និងវៀតណាម ដើម្បីពង្រីក និងពង្រឹងការយល់ដឹងអំពីកិច្ចការទន្លេមេគង្គ និងទំនាក់ទំនងអន្តរជាតិ, បង្កើនការយល់ដឹងអំពីវប្បធម៌, លើកកម្ពស់ការតភ្ជាប់, និងពង្រីកសហគមន៍សិក្សាក្នុងតំបន់របស់បុគ្គលម្នាក់ៗ ដើម្បីភាពសុខដុមរមនា និងការរួមរស់ជាមួយគ្នា។

កម្មវិធីបណ្តុះបណ្តាលនេះនឹងត្រូវបានធ្វើឡើងក្នុងទម្រង់ជាក់ស្តែងក្នុងរយៈពេលមួយសប្តាហ៍ ចាប់ពីថ្ងៃទី ៥ ដល់ថ្ងៃទី ១១ ខែសីហា ឆ្នាំ ២០២៦ នៅលើនាវាទេសចរណ៍ដែលធ្វើដំណើរតាមដងទន្លេមេគង្គពីភ្នំពេញទៅកាន់ខេត្តកំពង់ចាម និងខេត្តក្រចេះ នៃប្រទេសកម្ពុជា។​ កម្មវិធីនេះនឹងប្រមូលផ្តុំអ្នកហ្វឹកហាត់ប្រហែល 25 នាក់ រួមទាំងអ្នកប្រាជ្ញ អ្នកស្រាវជ្រាវ អ្នកធ្វើគោលនយោបាយ មន្ត្រីរដ្ឋាភិបាល និងអ្នកសារព័ត៌មានមកពីប្រទេសកម្ពុជា ចិន ឡាវ មីយ៉ាន់ម៉ា ថៃ និងវៀតណាម៕ អត្ថបទ៖ ធូ វិរៈ