ភ្នំពេញ ៖ ក្រសួងឧស្សាហកម្ម វិទ្យាសាស្ត្រ និងបច្ចេកវិទ្យា និងនវានុវត្តន៍ បានប្រកាសជាផ្លូវការណ៍របាយ-ការណ៍ ស្តីពីស្ថានភាពទីផ្សារអាជីវកម្មបរិយាប័ន្នកម្ពុជា។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សហការជាមួយដៃគូជាតិ និងអន្តរជាតិ បានបង្ហាញអំពីជំហានវិវត្តន៍នៃការជំរុញគាំទ្រដល់ការរៀបចំយុទ្ធសាស្ត្រអាជីវកម្មបរិយាប័ន្ន សម្រាប់កម្ពុជា ដែលត្រៀមនឹងស្នើសុំ ការឯកភាពពីរាជរដ្ឋាភិបាលក្នុងពេលឆាប់ៗខាងមុខ។
ការប្រកាសនេះ ធ្វើឡើងនៅក្នុងកម្មវិធីតាមប្រព័ន្ធអនឡាញ ដែលរៀបចំឡើងកាលពីថ្ងៃទី១៨កន្លងទៅ នៅក្រោមអធិបតីភាព ឯកឧត្តម ចម ប្រសិទ្ធ ទេសរដ្ឋមន្ត្រី និងរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយមានការចូលរួមពីថ្នាក់ដឹកនាំជាន់ខ្ពស់ពីអន្តរក្រសួង ស្ថាប័ន វិស័យឯកជន ដៃគូអភិវឌ្ឍន៍ សមាគមអាជីវកម្ម ក្រុមហ៊ុនអាជីវកម្មបរិយាប័ន្ន វិនិយោគិន។
នៅក្នុងកិច្ចប្រជុំ ឯកឧត្តម ចម ប្រសិទ្ធ មានប្រសាសន៍ថា អាជីវកម្មបរិយាប័ន្ន គឺជាបណ្តាញអាជីវកម្មប្រកបដោយលក្ខណពិសេស ដែលឈរលើគោលការណ៍បែបពាណិជកម្ម ហើយពោរពេញដោយភាពច្នៃប្រឌិតខ្ពស់ និងមានប្រាក់ចំណូលគួរឱ្យកត់សំគាល់។ អាជីវកម្មបរិយាប័ន្ន រួមចំណែកយ៉ាងសំខាន់ក្នុងការផ្តល់នូវដំណោះស្រាយលើការផ្តល់ចំណូល និងលើកកម្ពស់ជីវភាពរបស់បណ្តាប្រជាជនក្រីក្រ និងចំណូលទាប ជាលក្ខណៈប្រព័ន្ធ និងមានចីរភាព។
ឯកឧត្តម ចម ប្រសិទ្ធ បន្តថា មូលហេតុនេះហើយ ដែលយើងចាំបាច់ត្រូវការជំរុញលើកទឹកចិត្តដល់បណ្តាក្រុមហ៊ុនអាជីវកម្មបរិយាប័ន្ន ក្នុងដំណើររួមចំណែកដើម្បីប្រែក្លាយជាប្រទេសចំណូលមធ្យមកម្រិតខ្ពស់ត្រឹមឆ្នាំ២០៣០។
ឯកឧត្តម ចម ប្រសិទ្ធ បញ្ជាក់ថា រាជរដ្ឋាភិបាលកម្ពុជា ជាប្រទេសទី១ ក្នុងតំបន់អាស៊ាន ដែលអនុវត្តតាមគោលការណ៍ណែនាំសម្រាប់ការជំរុញអាជីវកម្មបរិយាប័ន្ន ក្នុងអាស៊ាន ដែលត្រូវបានអនុម័តដោយរដ្ឋមន្ត្រីសេដ្ឋកិច្ចអាស៊ាន កាលពីខែកញ្ញា ឆ្នាំ២០២០៕
អត្ថបទ ៖ សន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
