ភ្នំពេញ៖ ឯកឧត្តមបណ្ឌិត អ៊ុន ឃាង រដ្ឋលេខាធិការក្រសួ​ងការបរទេស និងសហប្រតិបត្តិការ​អន្តរជាតិ​ បានអញ្ជើញជាភ្ញៀវកិត្តិយស ក្នុងពិធីសម្ពោធស្ថានកុងស៊ុលកិត្តិយសស្រីលង្កា នៅ​សណ្ឋាគារ​ Raffles Hotel Le Royal រាជធានីភ្នំពេញនៅព្រឹកថ្ងៃទី០៥ ខែសីហា ឆ្នាំ២០២៦។

ពិធីសម្ពោធនេះ ក៏មានការអញ្ជើញចូលរួមពីលោកជំទាវ E.A.S. Wijayanthi Edirisinghe ឯក​អគ្គ​រដ្ឋ​ទូតស្រីលង្កាប្រចាំព្រះរាជាណាចក្រកម្ពុជា និង លោក Pily WONG កុងស៊ុល​កិតិ្តយស​តែង​តាំង​ថ្មី ​ស្រីលង្កាប្រចាំព្រះរាជាណាចក្រកម្ពុជា ព្រមទាំងថ្នាក់ដឹកនាំ និងមន្ត្រីជាន់ខ្ពស់​ពី​ក្រសួង​ការ​បរទេស និងសហប្រតិបត្តិការអន្តរជាតិ ក្រសួងពាណិជ្ជកម្ម និងក្រសួងមហាផ្ទៃ។

ក្នុង​សុន្ទរកថាបើកក្នុងពិធី ឯកឧត្តមបណ្ឌិត អ៊ុន ឃាង បានគូស​បញ្ជាក់​អំពី​សារៈ​សំខាន់​នៃ​ការ​ជំរុញ​មិត្តភាព និងទំនាក់ទំនងទ្វេភាគីរវាងកម្ពុជា និងស្រីលង្កា។ ការបង្កើតស្ថាន​កុងស៊ុល​កិត្តិយស​ស្រីលង្កា គឺជាជំហានថ្មីមួយទៀតក្នុងការពង្រឹងទំនាក់ទំនងរវាងកម្ពុជា និងស្រីលង្កា បន្ថែម​ទៀត។ លើសពីនេះ ស្ថានកុងស៊ុលកិត្តិយសនេះ នឹងដើរតួនាទី​ជាស្ពាន​ដ៏​មាន​ប្រសិទ្ធ​ភាព​ក្នុង​ការ​កម្ពស់កិច្ចសហប្រតិបត្តិការសេដ្ឋកិច្ច ការសម្រួលដល់អាជីវកម្ម និងទេសចរណ៍ ការ​ជំរុញ​ការ​ផ្លាស់​ប្តូររវាងប្រជាជននៃប្រទេសទាំងពីរ និងផ្តល់ការគាំទ្រលើកិច្ចការកុងស៊ុល ដល់ប្រជា​ពលរដ្ឋ​នៃ​ប្រទេសទាំងពីរ។

ឯកឧត្តមបណ្ឌិត អ៊ុន ឃាង ក៏បានគូសបញ្ជាក់ផងដែរថា ក្រសួងការបរទេសនៃប្រទេសទាំងពីរ កំពុង​ពិភាក្សាស្វែងរកពេលវេលាសមស្រប ដើម្បីរៀបចំកិច្ចពិគ្រោះយោបល់ទ្វេភាគីលើកទី១ ឱ្យ​បាន​ឆាប់​បំផុតតាមដែលអាចធ្វើទៅបាន៕