ភ្នំពេញ៛ នៅថ្ងៃទី០៧ ខែឧសភា ឆ្នាំ២០២២នេះ នាយករដ្ឋមន្ត្រីម៉ាឡេស៊ី ឯកឧត្តម អុីស្មាអីល សាប្រ៊ី យ៉ាកុប បានផ្ញើសារមកកាន់សម្តេចតេជោ ហ៊ុន សែន តាមរយៈបណ្តាញសង្គមWhat’sApp ចូលរួមរំលែកទុក្ខចំពោះមរណភាព ឯកឧត្តម ហ៊ុន ណេង ជាបងប្រុសបង្កើតរបស់សម្តេចតេជោ។ 

ឯកឧត្តម អុីស្មាអីល សាប្រ៊ី យ៉ាកុប បានគោរពជូនសម្តេចតេជោថា រូបឯកឧត្តមបានសរសេរសារនេះ ព្រមជាមួយសេចក្តីសោកសង្រែងជាពន់ពេក សូមចូលរួមរំលែកទុក្ខដ៏ធំដែលបងប្រុសរបស់សម្តេចគឺ ឯកឧត្តម ហ៊ុន ណេង បានទទួលមរណភាពកាលពីម្សិលមិញ។ ក្រុមគ្រួសាររបស់គាត់ និង ប្រជាជននៃខេត្តកំពង់ចាមបានបាត់បង់ថ្នាក់ដឹកនាំដ៏ល្អមួយរូប។

 ឯកឧត្តមបន្តថា ភាពសោកសៅនៃការបាត់បង់ភ្លាមៗនូវសមាជិកគ្រួសារដ៏ជិតស្និទ្ធគឺជាការមួយដែលលំបាកទទួលយកបានបំផុត។ ឯកឧត្តមសូមចូលរួមរំលែកទុក្ខជាមួយភរិយា បុត្រា បុត្រី និង ញាត្តិមិត្តទាំងអស់របស់ឯកឧត្តមហ៊ុនណេង និងសួមបួងសួងសូមសេចក្តីសុខ ជូនចំពោះសម្តេចតេជោផ្ទាល់ក៏ដូចជាជូនចំពោះក្រុមគ្រួសារសព ក្នុងពេលវេលាដ៏លំបាកនេះ។ ឯកឧត្តមក៏សូមជូនពរអោយពិធីបុណ្យសពប្រព្រឹត្តិទៅដោយដោយល្អប្រសើរតាមការគ្រោងទុកនៅថ្ងៃទី ៩ ឧសភាខាងមុខ។