អតីតខ្សែប្រយុទ្ធឆ្នើមរបស់អ៊ុយរូហ្គាយ Diego Forlán ត្រូវបានតែងតាំងជាគ្រូបង្វឹកថ្មីរបស់ក្រុមជម្រើសជាតិអ៊ុយរូហ្គាយ បន្ទាប់ពី Marcelo Bielsa ចាកចេញពីតំណែង ក្រោយយុទ្ធនាការ World Cup 2026 ដែលមិនទទួលបានលទ្ធផលតាមការរំពឹងទុក។

Forlan វ័យ ៤៧ឆ្នាំ នឹងដឹកនាំទាំងក្រុមជម្រើសជាតិធំ និងក្រុមអាយុក្រោម ២០ ឆ្នាំដោយកិច្ចព្រមព្រៀងដំបូងគ្រោងធ្វើឡើងរហូតដល់ខែ មីនាឆ្នាំ ២០២៧។ លោកនឹងចាប់ផ្តើមការងារភ្លាមៗ និងត្រូវរៀបចំក្រុមសម្រាប់ការប្រកួតមិត្តភាពក្នុងអំឡុង FIFA Days ចាប់ពីខែកញ្ញាដល់ខែវិច្ឆិកា។

Diego Forlan ត្រូវបានចាត់ទុកជាវីរបុរសម្នាក់ក្នុងប្រវត្តិសាស្ត្របាល់ទាត់អ៊ុយរូហ្គាយ ដោយក្នុងនាមជាកីឡាករ បង្ហាញខ្លួនបាន ១១២ប្រកួត និងស៊ុតបាន ៣៦គ្រាប់ សម្រាប់ជម្រើសជាតិ។

អតីតខ្សែប្រយុទ្ធ Manchester United រូបនេះ មានតួនាទីសំខាន់ក្នុងយុទ្ធនាការ World Cup 2010 ដោយឈ្នះពាន Golden Ball ក្នុងនាមជាកីឡាករល្អបំផុតប្រចាំព្រឹត្តិការណ៍ ហើយបានជួយអ៊ុយរូហ្គាយឈ្នះ Copa América 2011។

ការតែងតាំង Forlan កើតឡើងនៅពេលអ៊ុយរូហ្គាយត្រូវការចាប់ផ្តើមដំណើរថ្មី បន្ទាប់ពីការចាកចេញរបស់ Bielsa និងការធ្លាក់ចេញពី World Cup 2026 នៅវគ្គសន្សំពិន្ទុក្នុងពូល។

ទោះបីបទពិសោធន៍ជាគ្រូបង្វឹករបស់ Forlan នៅមានកម្រិតក៏ដោយ ដោយធ្លាប់ដឹកនាំ Penarol និង Atenas ក៏ដោយ ក៏កេរ្តិ៍ឈ្មោះ និងបទពិសោធន៍របស់គាត់ជាវីរបុរសជម្រើសជាតិ អាចជួយឱ្យគាត់ទទួលបានការគោរពពីកីឡាករជំនាន់ថ្មី៕ អត្ថបទ៖នាង សុភាវុធ