ខ្សែប្រយុទ្ធជម្រើសជាតិបែលហ្ស៊ិក Romelu Lukaku កំពុងខិតជិតផ្ទេរចេញពី Napoli ទៅកាន់ក្លិបយក្សតួកគី Fenerbahçe បន្ទាប់ពីក្លិបទាំងពីរបានឈានដល់កិច្ចព្រមព្រៀងនឹងគ្នា។

ការផ្លាស់ប្តូរនេះកើតឡើងបន្ទាប់ពីអនាគតរបស់ Lukaku នៅ Napoli មានភាពមិនច្បាស់លាស់ក្នុងរដូវក្តៅនេះ។ កាលពីមុន ខ្សែប្រយុទ្ធវ័យ ៣៣ឆ្នាំរូបនេះធ្លាប់បង្ហាញបំណងចង់បន្តនៅ Napoli ប៉ុន្តែស្ថានភាពបានផ្លាស់ប្តូរ ហើយពេលនេះគាត់កំពុងខិតជិតទៅរកការចាកចេញ។

Lukaku បានផ្ទេរជាអចិន្ត្រៃយ៍ពី Chelsea មក Napoli នៅខែសីហា ឆ្នាំ២០២៤ ក្នុងតម្លៃប្រមាណ ៣០ លានអឺរ៉ូ ជួយ Napoli ឈ្នះជើងឯក Serie A រដូវកាល ២០២៤/២៥ ដោយរកបានគ្រាប់បាល់សំខាន់ៗក្នុងយុទ្ធនាការរបស់ក្រុម។

ប៉ុន្តែរដូវកាលបន្ទាប់ Lukaku បានជួបបញ្ហារបួសដែលធ្វើឱ្យគេអវត្តមានរយៈពេលយូរ។

ប្រសិនបើការផ្ទេរត្រូវបានសម្រេចជាផ្លូវការ Lukaku នឹងចូលរួមជាមួយ Fenerbahçe ដើម្បីបន្ថែមកម្លាំងប្រយុទ្ធ និងបទពិសោធន៍ដ៏សម្បូរបែបសម្រាប់ក្រុម។

សម្រាប់ Lukaku វានឹងក្លាយជាជំពូកថ្មីមួយទៀតក្នុងអាជីពដែលធ្លាប់ឆ្លងកាត់ក្លិបធំៗជាច្រើននៅអឺរ៉ុប ដូចជា Chelsea, Manchester United, Inter Milan, Roma និង Napoli៕ អត្ថបទ៖នាង សុភាវុធ