ភ្នំពេញ៖ គិតចាប់ពីថ្ងៃទី ៣ខែឧសភា មកទល់ពេលនេះ ខណ្ឌដង្កោ កំពុងបន្តការចុះចាក់វ៉ាក់សាំងបង្ការកូវីដ-១៩ នៅតាមសាលារៀន សម្រាប់សិស្សប្រមាណ ៧០០០នាក់ ដែលពុំទាន់បានចាក់ដូសជំរុញ។

សម្រាប់ថ្ងៃទី ៩ខែឧសភាឆ្នាំ ២០២២នេះ មន្រ្តីការិយាល័យអប់រំខណ្ឌដង្កោ និងក្រុមគ្រូពេទ្យស្ម័គ្រ​ចិត្តសម្ដេចពិជ័យសេនា ទៀ បាញ់ កំពុងបន្តការចុះចាក់វ៉ាក់សាំងនៅទីតាំង ​សាលាបឋមសិក្សា ត្រពាំងសិលា ស្ថិតក្នុងភូមិសាស្រ្តខណ្ឌដង្កោ។ចំពោះការចាក់វ៉ាក់សាំងនៅតាមសាលារៀនដោយផ្ទាល់នេះ គឺនឹងធ្វើឡើងចាប់ពីសាលារៀន​ដែល​មានចំនួនសិស្សច្រើន។ នេះជាការលើកឡើងរបស់លោក ស្រ៊ាង ម៉េងលី អនុប្រធានការិយាល័យអប់រំ ខណ្ឌដង្កោ។

លោកបន្តថា សម្រាប់ទូទាំងខណ្ឌដង្កោ គឺមានចំនួនសិស្សប្រមាណ ៧០០០នាក់ ដែលត្រូវ​ទទួលការ​ចាក់ ខណ:ដែលក្រុមគ្រូពេទ្យផ្លាស់ប្ដូរពីទីតាំងសាលារៀនមួយ ទៅទីសាលារៀនមួយ។

ចំពោះការជូនកូនមកចាក់វ៉ាក់សាំងនៅព្រឹកនេះ លើកឡើងជាភាពសប្បាយចិត្តដែលក្រុមគ្រូពេទ្យ បានចុះមកចាក់ផ្ទាល់នៅទីតាំងសាលារៀន។ ពួកគាត់ថា ការចាក់វ៉ាក់សាំងគ្រប់ដូសតាមការកំណត់ ជារឿងចាំបាច់ ដើម្បីការពារសុវត្ថិភាពកូនៗរបស់ពួកគាត់។

បច្ចុប្បន្ននេះ ទីតាំងចាក់វ៉ាក់សាំងបានកើនឡើងកាន់តែច្រើន កាន់តែងាយស្រួលសម្រាប់ពលរដ្ឋ។ ជាក់ស្ដែងគឺមានការចុះចាក់វ៉ាក់សាំងនៅទីតាំង រោងចក្រ ទីប្រជុំជន ទីផ្សារ សាលារៀន និង​តាមការដ្ឋាន​សំណង់ជាដើម៕ អត្ថបទ គឹមហុន