កណ្ដាល៖ ឯកឧត្តម ហេង រតនា ប្រធានក្រុមការងាររាជរដ្ឋាភិបាលចុះជួយស្រុកលើកដែក ខេត្តកណ្ដាល បានរំលឹកទៅប្រជាពលរដ្ឋដែលមានឈ្មោះក្នុងបញ្ជីបោះឆ្នោត ត្រូវពិនិត្យមើលឯកសារ ឲ្យបានច្បាស់លាស់ និងមានគ្រប់តាមតម្រូវការ របស់គណៈកម្មាធិការជាតិរៀបចំការបោះឆ្នោត (គជប) ដើម្បីមានសិទ្ធិបោះឆ្នោត ។

ក្នុងពិធីសំណេះសំណាលជាមួយសមាជិកបក្ស និងកម្មកររោងចក្រ សរុបជិត១០០០នាក់ នៅឃុំកំពង់ភ្នំ និងឃុំព្រែកទម្លាប់ ស្រុកលើកដែក កាលពីថ្ងៃទី៨ ខែឧសភា ឆ្នាំ២០២២ ឯកឧត្តម ហេង រតនា មានប្រសាសន៍ថា ការបោះឆ្នោតជ្រើសរើសក្រុមប្រឹក្សាឃុំសង្កាត់ កាន់តែខិតជិតមក​ដល់ហើយ ដូច្នេះអ្នកមានឈ្មោះបោះឆ្នោតត្រូវត្រៀមឯកសារឲ្យបានគ្រប់គ្រាន់ ដើម្បីបានបំពេញ​កាតព្វកិច្ច​ជាពលរដ្ឋម្នាក់ ​គឺបានចូលរួមបោះឆ្នោតគ្រប់គ្នា ។

ឯកឧត្តម បន្តថា សម្រាប់សមាជិកគណបក្សប្រជាជនកម្ពុជា (CPP) ត្រូវបន្ត​ពង្រឹង​សាមគ្គី​បក្ស​ប្ដូរផ្ដាច់​បោះឆ្នោតឲ្យបានទទួលជ័យជំនះបន្តទៀត ដើម្បី CPP ​មានឱកាសបន្តបម្រើប្រជាពលរដ្ឋ និងអភិវឌ្ឍប្រទេសជាតិ​ ឲ្យកាន់តែមានភាពរីកចម្រើន ។

ឯកឧត្តម ហេង រតនា សង្កត់ធ្ងន់​ថា សមាជិក​បក្ស​ត្រូវពង្រឹង​ស្មារតី​និងឆន្ទៈ ហើយ​បោះឆ្នោតជូន​បេក្ខជន​ឈរឈ្មោះរបស់គណបក្សប្រជាជនកម្ពុជា ​ដោយគោរពស្មោះត្រង់ តាមគោលការណ៍​គណបក្ស “សមាជិកគណបក្សម្នាក់ បោះឆ្នោតជូនគណបក្សប្រជាជនមួយសន្លឹក!” ។

ជាមួយគ្នានេះ​ ឯកឧត្តមប្រធានក្រុមការងារ ​បានជំរុញទៅសមាជិកគណបក្សប្រជាជន​ទាំងអស់ ទោះជា​មន្ត្រីអាជ្ញាធរ ​និងពលរដ្ឋធម្មតា ​ត្រូវបន្តធ្វើអំពើល្អ ​លើពលរដ្ឋផ្សេងៗ ​ដោយ​មិន​មានការ​រើសអើង​និន្នាការ​នយោបាយ ​ហើយត្រូវ​បន្តអនុវត្តនូវវិធានការ​ទប់ស្កាត់ ការឆ្លងរាលដាល​នៃជំងឺកូវីដ១៩ ​មាន៣ការពារ ៣កុំ ឲ្យបាន​ខ្ជាប់ខ្ជូន ​៕ អត្ថបទ បាន សុខរិទ្ធិ