ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍នៅថ្ងៃសៅរ៍ ទី១៥ ខែសីហានេះ ថា ប្រធានាធិបតីរុស្ស៊ី លោក Vladimir Putin បានប្រាប់មេដឹកនាំកូរ៉េខាងជើង លោក Kim Jong Un ថា ទីក្រុង មូស្គូ និងទីក្រុងព្យុងយ៉ាង កំពុងសហការគ្នាលើគ្រប់វិស័យ និងសម្របសម្រួលកិច្ចខិតខំប្រឹងប្រែងដើម្បីធានាសន្តិសុខ និងស្ថិរភាពក្នុងតំបន់។

ប្រព័ន្ធផ្សព្វផ្សាយ KCNA បាននិយាយថា លោកPutin បាននិយាយនៅក្នុងសារមួយទៅកាន់លោកKim ក្នុងឱកាសរំលឹកខួបនៃការរំដោះកូរ៉េចេញពីការគ្រប់គ្រងអាណានិគមជប៉ុនថា លោកមានទំនុកចិត្តថា រុស្ស៊ី និងកូរ៉េខាងជើង នឹងបន្ត «ការងាររួមគ្នាប្រកបដោយស្ថាបនា» លើបញ្ហាទ្វេភាគី និងអន្តរជាតិ។

របាយការណ៍ KCNA បានរាយការណ៍ថា លោកKim បានធ្វើទស្សនកិច្ចនៅប៉មរំដោះក្នុងទីក្រុងព្យុងយ៉ាងកាលពីថ្ងៃសុក្រ ដើម្បីគោរពវិញ្ញាណក្ខន្ធដល់ទាហានសូវៀតដែលបានប្រយុទ្ធជាមួយជប៉ុនក្នុងសង្គ្រាមលោកលើកទី២។ កម្រងផ្កានៅប៉មមានពាក្យអំណានថា «យើងមិនភ្លេចស្នាដៃរបស់ទុក្ករបុគ្គលកងទ័ពសូវៀតទេ»។

សារនិងដំណើរទស្សនកិច្ចរបស់លោក Kim បញ្ជាក់ពីចំណងមិត្តភាពកាន់តែស៊ីជម្រៅរវាងទីក្រុងមូស្គូ និងទីក្រុងព្យុងយ៉ាង ដែលបានធ្វើឲ្យមានការព្រួយបារម្ភជាអន្តរជាតិជុំវិញការគាំទ្ររបស់កូរ៉េខាងជើងចំពោះសង្គ្រាមរបស់រុស្ស៊ីនៅអ៊ុយក្រែន។

ប្រធានាធិបតីអ៊ុយក្រែន លោក Volodymyr Zelenskyy បាននិយាយដដែលៗថា រុស្ស៊ីប្រើប្រាស់មីស៊ីលរបស់កូរ៉េខាងជើងប្រឆាំងប្រទេសអ៊ុយក្រែន ហើយបានចោទប្រកាន់ទីក្រុងព្យុងយ៉ាង ថា បានផ្គត់ផ្គង់មីស៊ីល និងគ្រាប់រំសេវដល់ទីក្រុងមូស្គូ ហើយបានសន្យាផ្តល់កងទ័ពបន្ថែមទៀតសម្រាប់កិច្ចខិតខំប្រឹងប្រែងក្នុងសង្គ្រាម៕