អ្នកបើកបរត្រូវបានគេមើលឃើញតម្រង់ជួរនៅតាមស្ថានីយប្រេង និងឧស្ម័ន នៅក្នុងទីក្រុងមូស្គូ ស្របពេលដែលវិបត្តិប្រេងបានវិលត្រឡប់មកវិញនៅក្នុងរដ្ឋធានីប្រទេសរុស្ស៊ីមួយនេះ ក្រោយការវាយប្រហារយានដ្រូនអ៊ុយក្រែនលើហេដ្ឋារចនាសម្ព័ន្ធថាមពល ។ អ្នកបើកបករ បានរាយការណ៍ពីកង្វះខាតប្រេង ជាពិសេសគឺប្រេងធម្មតា ។

លោក Dmitry គឺជាអ្នកស្រុកមួយរូបរស់នៅក្នុងទីក្រុងមូស្គូ និយាយថា លោកឈររង់ចំានៅទីនេះអស់រយៈពេលកន្លះម៉ោង ហើយដូចអ្នកឃើញស្រាប់ហើយថា មាននូវរថយន្ត ៥គ្រឿងទៀតនៅមុខលោក ។ លោកបន្តថា លោកប្រហែលជាត្រូវរង់ចាំរយៈពេល ២០នាទីទៀត ទើបអាចចាក់ប្រេងរថយន្តបាន ។

គួរឲ្យដឹងថា រលកដំបូងនៃកង្វះខាតប្រេង បានកើតឡើងកាលពីចុងខែមិថុនា ហើយនិងដើមខែកក្កដា ក្រោយការវាយប្រហារយានដ្រូនអ៊ុយក្រែន មានគោលដៅលើរោងចក្រចម្រាញ់ប្រេងទីក្រុងមូស្គូ និងរោងចក្រចម្រាញ់ប្រេងផ្សេងទៀតនៅទូទាំងប្រទេសរុស្ស៊ី ។ ស្ថានភាពនៅក្នុងរដ្ឋធានីប្រទេសរុស្ស៊ីមួយនេះមានស្ថិរភាពភាគច្រើននៅពាក់កណ្តាលខែកក្កដា ។

អ្នកស្រី Nadezhda គឺជាអ្នកស្រុកមួយរូបទៀតរស់នៅក្នុងទីក្រុងមូស្គូនិយាយដែរថា វាគឺជារឿងមិនរំពឹងគិតដល់ ពីព្រោះថាពួកយើងបានធូរស្បើយរួចទៅហើយ ហើយអ្វីៗក៏ល្អប្រសើរផងដែរ ប៉ុន្តែថ្ងៃនេះបញ្ហាបានវិលត្រឡប់មកវិញ ។

សូមបញ្ជាក់ថា ស្ថានីយប្រេងមួយចំនួន បានបិទ ខណៈស្ថានីយខ្លះទៀត មានលក់តែប្រេងម៉ាស៊ូតប៉ុណ្ណោះ ។ បញ្ហាផ្គត់ផ្គង់ប្រេង បានកើតមានឡើងម្តងទៀតនៅតាមតំបន់ជាច្រើនរបស់រុស្ស៊ី រួមទាំងតំបន់ Tula, Tambov និងតំបន់ Kaluga ក៏ដូចជានៅដែនដី Primorsky និងដែនដី Krasnodar ៕