យ៉ាងហោចណាស់មានជនស៊ីវិល ១៤នាក់ បានស្លាប់ និងរាប់សិបនាក់រងរបួស កាលពីថ្ងៃសុក្រ នៅក្នុងការវាយប្រហារមួយលើតំបន់ Um Arada ចម្ងាយប្រហែល ១៥ គីឡូម៉ែត្រភាគនិរតីនៃ រដ្ឋធានី El Obeid រដ្ឋ Kordofan ខាងជើង នៅកណ្តាលប្រទេសស៊ូដង់។ នេះបើយោងតាមប្រភពព័ត៌មានស៊ូដង់។

ក្រុមអ្នកស្ម័គ្រចិត្ត បាននិយាយនៅក្នុងសេចក្តីថ្លែងការណ៍មួយថា កងកម្លាំងគាំទ្ររហ័ស (RSF) បានបើកការវាយប្រហារ ដោយព័ត៌មានដំបូងបង្ហាញថា យ៉ាងហោចណាស់មានជនស៊ីវិល ១៤នាក់ បានស្លាប់ និងរាប់សិបនាក់ រងរបួស។

ក្រុមនេះបាននិយាយថា ជនស៊ីវិលកំពុងរត់គេចខ្លួនចេញពីតំបន់នេះ បន្ទាប់ពីការវាយប្រហារ ដោយសារតែការភ័យខ្លាច និងស្ថានភាពមនុស្សធម៌កាន់តែអាក្រក់ឡើងៗ ដោយបន្ថែមថា ការវាយប្រហារនេះ បានកើតឡើង ចំពេលមានប្រតិបត្តិការយោធាជាបន្តបន្ទាប់រវាង RSF និងកងកម្លាំងប្រដាប់អាវុធស៊ូដង់ (SAF) នៅក្នុងរដ្ឋKordofan ខាងជើង។

ប្រភពពីមន្ទីរពេទ្យ El Obeid បានប្រាប់សារព័ត៌មានស៊ីនហួថា មន្ទីរពេទ្យនេះ បានទទួលសាកសពមនុស្សយ៉ាងហោចណាស់ ១២នាក់ និងអ្នករងរបួសប្រហែល ១៥នាក់ បន្ទាប់ពីការវាយប្រហារ ដោយមានអ្នកស្លាប់ និងរងរបួសជាច្រើនទៀត កំពុងបន្តមកដល់៕