នារសៀលថ្ងៃទី១៥ ខែសីហា ឆ្នាំ២០២៦ ឯកឧត្តម ហ៊ុន ម៉ានី សមាជិក​គណៈអចិន្រ្តៃយ៍​គណៈ​កម្មាធិការ​កណ្តាល និងជាអគ្គលេខាធិការនៃគណៈចលនាមហាជន តំណាងដ៏ខ្ពង់ខ្ពស់​សម្ដេច​កិត្តិ​សង្គហ​បណ្ឌិត​ ម៉ែន សំអន អនុប្រធានគណបក្សប្រជាជន និងជាប្រធានគណៈចលនាមហាជន នៃ​គណៈកម្មាធិការកណ្ដាលគណបក្សប្រជាជនកម្ពុជា បានអញ្ជើញជាអធិបតីក្នុង ពិធី​បិទ​វ​គ្គ​បណ្ដុះ​បណ្ដាល «ជនបង្គោលលើ ការងារមហាជន ក្រុង ស្រុក ឃុំ សង្កាត់» ខេត្តកំពង់ស្ពឺ។

ពិធីនេះមានការអញ្ចើញចូលរួមពីសំណាក់ ឯកឧត្តម លោកជំទាវ លោក លោកស្រី សមាជិក សមាជិកា គណៈចលនាមហាជន ប្រធានគណៈចលនាជំនាញ អគ្គលេខាធិការរង ប្រធាន​គណៈ​ចលនាមហាជនខេត្ត និងសិក្ខាកាមដែលបានទទួលវគ្គបណ្តុះបណ្តាលប្រមាណជាង ៤៣០នាក់ ដែល​បាន​ប្រព្រឹត្តទៅនៅមន្ទីរគណបក្សខេត្តកំពង់ស្ពឺ។

ជាកិច្ចចាប់ផ្តើម ឯកឧត្តម ជាម ច័ន្ទសោភ័ណ ប្រធានគណៈចលនា​មហាជន​គណបក្ស​ខេត្ត​កំពង់ស្ពឺ ​បានឡើងថ្លែងមតិស្វាគមន៍ចំពោះវត្តមានដ៏ខ្ពង់ខ្ពស់របស់ ឯកឧត្តម ហ៊ុន ម៉ានី ព្រម​ទាំង​បាន​រាយ​ការណ៍អំពីវឌ្ឍនភាពនៃការរៀបចំវគ្គ​បណ្ដុះបណ្ដាល​ជន​បង្គោល​ការងារ​មហា​ជន​គណបក្ស​ខេត្ត​កំពង់ស្ពឺ ដែលបានបញ្ជាប់ទៅដោយជោគជ័យ។ ឯកឧត្តមបានបញ្ជាក់ផងដែរថា តាមរយៈវគ្គបណ្ដុះបណ្ដាលនេះ ជនបង្គោលការងារមហាជនទាំងអស់ទទួលបានចំណេះដឹង និង​ការ​យល់​ដឹងកាន់តែច្បាស់អំពីតួនាទី ភារកិច្ច រចនាសម្ព័ន្ធ និងយន្តការ​ការងារ​របស់​គណៈ​ចលនា​មហាជន​គ្រប់​ថ្នាក់ ព្រមទាំងពង្រឹងសមត្ថភាពក្នុងការប្រាស្រ័យទាក់ទង សម្របសម្រួល និង​ចុះ​អនុវត្ត​ការងារជាក់ស្តែងនៅមូលដ្ឋាន។ សូមបញ្ជាក់ថា វគ្គបណ្ដុះបណ្ដាលនេះត្រូវបានរៀប​ចំ​ឡើង​ចំនួន​ ០៧ វគ្គ ដោយក្នុងមួយវគ្គមានរយៈពេល ០២ ថ្ងៃ។ ចាប់ពីវគ្គទី១ រហូតដល់វគ្គទី៧ វគ្គ​បណ្ដុះ​បណ្ដាល​ត្រូវបានបើកជាបន្តបន្ទាប់ ចាប់ពីខែមករា រហូតដល់ខែកក្កដា ឆ្នាំ២០២៦ ហើយ​បាន​បញ្ចប់​ដោយជោគជ័យ ស្របតាមកម្មវិធី និងផែនការដែលបានគ្រោងទុក៕