ទីភ្នាក់ងារព័ត៌មានរដ្ឋ KCNA រាយការណ៍នៅថ្ងៃអាទិត្យនេះថា មេដឹកនាំកូរ៉េខាងជើងលោក Kim Jong Un បានបញ្ជាក់ឡើងវិញពីការពង្រឹងទំនាក់ទំនងជាមួយរុស្ស៊ីនៅក្នុងសារទៅកាន់ប្រធានាធិបតីរុស្ស៊ីលោក Vladimir Putin ស្របពេលដែលទីក្រុងព្យុងយ៉ាង ប្រារព្ធខួបឯករាជ្យពីការគ្រប់គ្រងអាណានិគមរបស់ជប៉ុន ។

នេះគឺជាការឆ្លើយតបចំពោះសារអបអរសាទរពីលោក Putin នៅថ្ងៃប្រារព្ធខួបលើកទី ៨១នៃការសុំចុះចាញ់សង្រ្គាមលោកលើកទី ២របស់ទីក្រុងតូក្យូ ។

ប្រធានាធិបតីរុស្ស៊ីនិយាយថា ចំណងមិត្តភាពបានបង្កើតឡើង ពេលដែលទាហានសូវៀត ច្បាំងជាមួយជប៉ុន ហើយកិច្ចសហប្រតិបត្តិការនឹងបន្តលើគ្រប់វិស័យទាំងអស់ ។

លោក Kim និយាយនៅក្នុងសុន្ទរកថាទៅកាន់លោក Putinថា លោកតែងតែមានមោតភាព កាលដែលអាចរំពឹងដល់អនាគតដ៏ល្អប្រសើរជាងនេះនៃទំនាក់ទំនងទ្វេភាគី តាមរយៈការដឹកនាំ ដើម្បីរួបរួមជាមួយអ្នក ទំនាក់ទំនងកូរ៉េខាងជើង-រុស្ស៊ីបានបន្តដំណើរប្រវត្តិសាស្ត្រនៃការតស៊ូរួមគ្នា ដើម្បីយុត្តិធម៌ និងប្រពៃណីដ៏មានតម្លៃនៃមិត្តភាព ។

សូមបញ្ជាក់ថា ទំនាក់ទំនងរបស់កូរ៉េខាងជើងជាមួយរុស្ស៊ី កាន់តែជិតស្និតជាងមុន ចាប់តាំងពីរដ្ឋឯកោមួយនេះ បានចាប់ផ្តើមដាក់ពង្រាយទាហាន និងអាវុធរបស់ខ្លួន ដើម្បីគាំទ្រសង្រ្គាមរុស្ស៊ី ជាមួយអ៊ុយក្រែន នៅក្នុងការជាប់ពាក់ព័ន្ធដ៏ធំបំផុតមួយរបស់ទីក្រុងព្យុងយ៉ាងនៅក្នុងសង្រ្គាម ចាប់តាំងពីទសវត្សរ៍ឆ្នាំ ១៩៥០ ៕