លោក មីន អោងឡាំង មេដឹកនាំប្រទេសមីយ៉ាន់ម៉ា នឹងអញ្ជើញទស្សនកិច្ចផ្លូវរដ្ឋនៅព្រះរាជាណាចក្រកម្ពុជានៅដើមខែកញ្ញា ឆ្នាំ២០២៦ ខាងមុខនេះ។ ដំណើរទស្សនកិច្ចរបស់មេដឹកនាំមីយ៉ាន់ម៉ាមកកម្ពុជា នេះ គឺដើម្បីពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរឲ្យបានតែស៊ីជម្រៅបន្ថែមទៀត។

ឯកឧត្តម ជា ធីរិទ្ធ អ្នកនាំពាក្យព្រឹទ្ធសភានៃព្រះរាជាណាចក្រកម្ពុជា បានថ្លែងប្រាប់ BTV ថា៖ លោក មីន អោងឡាំង នឹងអញ្ជើញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា គឺនៅដើមខែកញ្ញាខាងមុខនេះ ដែលជាដំណើរទស្សនកិច្ចដើម្បីរិតចំណងមិត្តភាពរវាងកម្ពុជា និងមីយ៉ាន់ម៉ាឲ្យកាន់តែរឹងមាំ និងកាន់តែស៊ីជម្រៅបន្ថែមទៀត។ ហើយនៅក្នុងអំឡុងពេលទស្សនកិច្ច លោក មីន អោងឡាំង ក៏គ្រោងនឹងជួបជាមួយថ្នាក់ដឹកនាំកំពូលៗរបស់កម្ពុជាជាបន្តបន្ទាប់ផងដែរ។

អ្នកនាំពាក្យព្រឹទ្ធសភាបានបញ្ជាក់ថា ៖ «លោក មីន អោងឡាំង នឹងអញ្ជើញទស្សនកិច្ចផ្លូវរដ្ឋនៅក្នុងប្រទេសកម្ពុជា គឺនៅដើមខែកញ្ញា ខែក្រោយនេះ ដែលជាដំណើរទស្សនកិច្ចដើម្បីរិតចំណងមិត្តភាពរវាងកម្ពុជា និងមីយ៉ាន់ម៉ាឲ្យកាន់តែរឹងមាំនឹងកាន់តែស៊ីជម្រៅបន្ថែមទៀត។ ហើយនៅក្នុងអំឡុងពេលទស្សនកិច្ចលោកក៏គ្រោងជួបជាមួយថ្នាក់ដឹកនាំកំពូលៗរបស់កម្ពុជាផងដែរ»។

សូមជម្រាបថា មេដឹកនាំប្រទេសមីយ៉ាន់ម៉ាលោក មីន អោងឡាំង កំពុងបង្កើនយុទ្ធនាការការទូតដោយបំពេញទស្សនកិច្ចនៅតាមបណ្ដាប្រទេសក្នុងតំបន់ និងប្រទេសធំៗដូចជាចិន ឥណ្ឌា និងរុស្ស៊ី។ បើនិយាយដំណើរទស្សនកិច្ចនៅក្នុងតំបន់អាស៊ានមេដឹកនាំប្រទេសមីយ៉ាន់ម៉ាលោក មីន អោងឡាំង ដែលកើតចេញពីការបោះឆ្នោតចុងឆ្នាំ២០២៥ បានបំពេញទស្សនកិច្ចផ្លូវរដ្ឋជាលើកដំបូងគេបង្អស់នៅប្រទេសឡាវនាដើមខែកក្កដា និងបំពេញទស្សនកិច្ចនៅថៃ កាលពីដើមខែសីហា រួចហើយទើបបំពេញទស្សនកិច្ចនៅកម្ពុជា​ នាខែកញ្ញាខាងមុខ៕ អត្ថបទ៖ វង្ស សុភាព