ប្រដាល់សកល៖ កីឡាករ-កីឡាការិនីប្រដាល់សកលជម្រើសជាតិកម្ពុជា បានបង្ហាញទំនុកចិត្តរៀងៗខ្លួនសម្រាប់ការត្រៀមចូលរួមប្រកួតកីឡាស៊ីហ្គេមលើកទី៣១ នៅទីក្រុងហាណូយនាពេលខាងមុខ បន្ទាប់ពីពួកគេបានបោះជុំរុំហ្វឹកហាត់ក្រៅស្រុកនាពេលកន្លងមក។
កីឡាករ វី សុភ័ស និង ទូច ដេវីត ដែលទើបត្រឡប់មកពីហ្វឹកហាត់នៅប្រទេសថៃកាលពីថ្មីៗបានបញ្ជាក់ថា ក្រៅបោះជុំរុំហ្វឹកហាត់នៅថៃជាង ១ខែ ពួកគេសម្គាល់ឃើញមានភាពរីកចម្រើនច្រើន ដែលធ្វើឲ្យពួកគេមានជំនឿចិត្តខ្ពស់លើខ្លួនឯងសម្រាប់ត្រៀមការប្រកួតកីឡាស៊ីហ្គេមនាពេលខាងមុខ ពិសេសកីឡាករ វី សុភ័ស ទោះបីរបួសរបស់គេមិនទាន់សះស្បើយ ១០០% ក៏ដោយ។ ចំណែកកីឡាការិនី វី ស្រីស្រស់ និងកីឡាករ នៅ សុខទី ដែលទើបត្រឡប់មកពីហ្វឹកហាត់នៅសាធារណៈរដ្ឋកូរ៉េបានលើកឡើងស្រដៀងគ្នាថា ការហ្វឹកហាត់នៅកូរ៉េ ១ខែ ពួកគេក៏មានការរីកចម្រើនច្រើនដែរពិសេសលើកម្លាំង ដែលជំរុញឲ្យពួកគេកាន់តែមានការប្ដេជ្ញាចិត្តខ្ពស់ សម្រាប់ការត្រៀមបង្ហាញខ្លួនលើកដំបូងក្នុងព្រឹត្តិការណ៍កីឡាប្រចាំតំបន់នេះ។
សូមបញ្ជាក់ថា ការលើកឡើងរបស់កីឡាករ-កីឡាការិនីប្រដាល់សកលជម្រើសជាតិកម្ពុជា ធ្វើឡើងក្នុងជំនួបសំណេះសំណាលក្រោមវត្តមានលោកសាស្ដ្រាចារ្យវេជ្ជបណ្ឌិត ឆឹង យ៉ៅយ៉េន ប្រធានសហព័ន្ធកីឡាប្រដាល់សកលកម្ពុជា រួមជាមួយថ្នាក់ដឹកនាំសហព័ន្ធកាលពីថ្ងៃទី០៩ ខែឧសភាម្សិលមិញ មុនប្រតិភូ និងអត្តពលិកប្រដាល់សកលកម្ពុជាចាកចេញពីមាតុភូមិនាថ្ងៃទី១២ ខែឧសភាខាងមុខ។ ក្នុងជំនួបសំណេះសំណាលនោះដែរ ក្រៅពីការផ្ដាំផ្ញើ និងការលើកទឹកចិត្ត លោក ខេស៊ី បាណេត អនុប្រធានសហព័ន្ធក៏បានឧបត្ថម្ភប្រតិភូ គ្រូបង្វឹក និងកីឡាករ-កីឡាការិនីប្រដាល់សកលក្នុងម្នាក់ៗ ២០០ដុល្លារ រួមជាមួយលោក Masahiro Isobe នាយកប្រតិបត្តិគណៈកម្មការប្រដាល់សកលអាជីពក៏បានឧបត្ថម្ភការថវិកា ៤០០ដុល្លារដល់កីឡាករ-កីឡាការិនីប្រដាល់សកលកម្ពុជាទាំង ៨រូបផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
