ភ្នំពេញ ៖ ដំណើរការចាក់វ៉ាក់សាំងការពារជំងឺកូវីដ-១៩ នាពេលនេះ គឺបន្តដំណើរការជាធម្មតាសម្រាប់ការចាក់ជូនដល់ក្រុមគោលដៅជាលើកទី២ និងការចាក់ជូនដល់ពលរដ្ឋដែលមានអាយុចាប់ពី៦០ ឆ្នាំឡើងទៅ ។ ជាទិដ្ឋភាពរួមនៅមន្ទីរពេទ្យបង្អែកដង្កោ និងនៅមណ្ឌលសុខភាពជើងឯក នាថ្ងៃនេះ មានការរៀបចំបានល្អប្រសើរ និងពុំមានការកកស្ទះ ដូចពេលកន្លងនោះទេ។
សម្រាប់ការចាក់វ៉ាក់សាំងនៅទីតាំងមន្ទីរពេទ្យបង្អែកដង្កោ នាព្រឹកនេះគឺមានការរៀបចំការរក្សាគម្លាតបានល្អប្រសើរ និងមានការជួយសម្រួលការងារជាច្រើនពីមន្ត្រីខណ្ឌដង្កោផងដែរ។ ជាទិដ្ឋភាពរួមនៅថ្ងៃនេះ ក្រុមគោលដៅដែលមកទទួលការចាក់វ៉ាក់សាំងលើកទី២ គឺមានចំនួនតិចតួច រីឯចំនួនពលរដ្ឋដែលអាយុចាប់ពី ៦០ឆ្នាំឡើងទៅគឺមានចំនួនជាក់លាក់ ដោយពួកគាត់សុទ្ធតែមានភ្ជាប់មកជាមួយនូវប័ណ្ណពីឃុំ-សង្កាត់ដែលផ្ដល់ជូន។ ចំណុចទាំងនេះ បានផ្ដល់ភាពងាយស្រួលដល់ក្រុមគ្រូពេទ្យជំនាញ និងមិនបង្ករឱ្យមានការកកស្ទះ ពិបាកក្នុងការរក្សាគម្លាតដូចពេលកន្លងនោះទេ។ នេះជាការបញ្ជាក់របស់លោក វេជ្ជបណ្ឌិត ឆឹម ជីវី ប្រធានមន្ទីរពេទ្យបង្អែកដង្កោ។
សម្រាប់ការមកទទួលការចាក់វ៉ាក់សាំងនៅថ្ងៃនេះ ពលរដ្ឋដែលមានអាយុចាប់ពី ៦០ឆ្នាំឡើងទៅ ក៏បានបង្ហាញភាពសប្បាយរីករាយ និងថ្លែងអំណរគុណដល់រាជរដ្ឋាភិបាលផងដែរ។
ក្នុងខណៈពេលនេះ មណ្ឌលសុខភាពជើងឯក ស្ថិតក្នុងខណ្ឌដង្កោ ក៏បានក្លាយជាទីតាំងថ្មីមួយទៀតរៀបចំឡើងសម្រាប់ការចាក់ជូនដល់ក្រុមគោលដៅប្រឈមខ្ពស់ គឺកម្មករប្រមូលសំរាមក្នុងរាជធានីភ្នំពេញ។ ដោយមើលឃើញពីភាពប្រឈមរបស់កម្មករប្រមូលសំរាម សាលារាជធានីភ្នំពេញ បានអន្តរាគមន៍ភ្លាមៗ និងអនុញ្ញាតឱ្យកម្មករប្រមូលសំរាមអាចបន្តចាក់វ៉ាក់សាំង AstraZeneca ជំនួសវិញ ស្របពេលដែលវ៉ាក់សាំង Sinopharm ត្រូវបានផ្អាកសម្រាប់ការចាក់លើកទី១ ។ កម្មករប្រមូលសំរាមដែលបានបន្តមកចាក់នៅថ្ងៃនេះ ក៏បានអរគុណដល់រាជរដ្ឋាភិបាលដែលយកចិត្តទុកដាក់ពីភាពប្រឈមក្នុងការបំពេញការងាររបស់ពួកគាត់។
ថ្មីៗនេះ រាជរដ្ឋាភិបាលក៏បានបញ្ជាក់ឱ្យមានការចាក់វ៉ាក់សាំងការពារជំងឺកូវីដ-១៩ ឱ្យបានត្រឹមត្រូវផងដែរ ។ ក្នុងអនុសាសន៍របស់សម្ដេច នាយករដ្ឋមន្ត្រី បានបញ្ជាក់ថា មន្ទីរពេទ្យត្រូវចាក់វ៉ាក់សាំងឱ្យត្រឹមត្រូវតាមការកំណត់ ពោលគឺ AstraZeneca ត្រូវចាក់សម្រាប់តែពលរដ្ឋអាយុចាប់ពី៦០ឆ្នាំឡើងប៉ុណ្ណោះ ។ រីឯក្រុមគោលដៅផ្សេងទៀតត្រូវបន្តរង់ចាំ វត្តមានវ៉ាក់សាំងថ្មី Sinovac ចំនួន ១លាន៥សែនដូស ដែលអាចមកដល់ថ្ងៃទី ២៦ មីនាខាងមុខនេះ៕
អត្ថបទ ៖ គឹម ហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
