ភ្នំពេញ៖ រាជរដ្ឋាភិបាលនីតិកាលទី៧ នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានជំរុញឱ្យពាណិជ្ជកម្មអន្តរជាតិរបស់កម្ពុជាបន្តកើនពីប្រមាណ ៤៧,៩ ពាន់លានដុល្លារ ក្នុងឆ្នាំ២០២៣ ដល់ជាង ៦៥,២ ពាន់លានដុល្លារ ក្នុងឆ្នាំ២០២៥ ដែលស្មើនឹងកំណើនជាង ៣៦% ក្នុងរយៈពេលត្រឹមតែ ២ឆ្នាំ ខណៈទំហំពាណិជ្ជកម្មក្នុងរយៈពេល ៧ខែដំបូងឆ្នាំ២០២៦ បានឈានដល់ប្រមាណ ៤៥,៥ពាន់លានដុល្លារ កើនជាង ២៣% បើធៀបនឹងរយៈពេលដូចគ្នាកាលពីឆ្នាំ២០២៥ ដែលឆ្លុះបញ្ចាំងពីការបន្តពង្រីកសកម្មភាពពាណិជ្ជកម្មរបស់កម្ពុជា ជាមួយទីផ្សារក្នុងតំបន់ និងអន្តរជាតិ។

ឯកឧត្តម តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការការបរទេស និងសហប្រតិបត្តិការអន្តរជាតិ បានលើកឡើងដូចនេះ នៅក្នុងវេទិកាសារព័ត៌មានលើកទី៩ ស្តីពី «សមិទ្ធផល ៣ឆ្នាំនៃរាជរដ្ឋាភិបាលនីតិកាលទី៧ ទោះជាមានឧបសគ្គធំៗចំពោះមុខ ដំណើរឆ្ពាះទៅសម្រេចចក្ខុវិស័យកម្ពុជាឆ្នាំ២០៥០ នៅតែបន្ត» នៅរសៀលថ្ងៃទី ២១ ខែសីហា ឆ្នាំ២០២៦នេះ។

ឯកឧត្តម ថ្លែងទៀតថា ការកើនឡើងទំហំពាណិជ្ជកម្មអន្តរជាតិរបស់កម្ពុជានាពេលនេះគឺជាផ្នែកមួយរបស់រាជរដ្ឋាភិបាលនីតិកាលទី៧ នៃរដ្ឋសភាក្នុងការ​រក្សាបានស្ថិរភាពនយោបាយ និងគោលនយោបាយគាំទ្រការវិនិយោគ ព្រមទាំងជួយទាក់ទាញអ្នកវិនិយោគ និងជំរុញសកម្មភាពពាណិជ្ជកម្មរបស់សម្តេចធិបតី តាមរយៈ​ជួបសំណេះសំណាលដោយផ្ទាល់រវាង សម្តេចធិបតី និងបណ្តាក្រុមហ៊ុនបរទេស ខ្នាតតូច មធ្យម និងធំ ទាំងក្នុងប្រទេសស្រុក និងក្រៅប្រទេស។

ឯកឧត្តម មានប្រសាសន៍ថា រាល់ដំណើរទស្សនកិច្ចផ្លូវការទៅក្រៅប្រទេសនានា សម្តេចធិបតី ហ៊ុន ម៉ាណែត តែងតែបញ្ចុះបញ្ចូលឱ្យធុរជន និងវិនិយោគិនបរទេស បង្កើនទុន ឬមកដាក់ទុនរកស៊ីនៅកម្ពុជា ហើយ កម្ពុជាស្វាគមន៍ទាំងអស ក្រុមហ៊ុន និងវិនិយោគិន មកពីគ្រប់ទ្វីប មកពីគ្រប់ប្រទេស ដោយកម្ពុជាមិនរើសអើងឡើយ ជាពិសេសនៅលើវិស័យសេដ្ឋកិច្ច, ពាណិជ្ជកម្ម, និងវិនិយោគ, ពីព្រោះកម្ពុជា ក៏ដឹងដូចប្រទេសនានាដទៃនៅលើពិភពលោកដែរថា នៅក្នុងទំនាក់ទំនងអន្តរជាតិ លុយនៅតែជាលុយ ប្រយោជន៍នៅតែជាប្រយោជន៍។

ឯកឧត្តម បានគូសបញ្ជាក់ទៀតថា ដោយឡែក ចំនួនគម្រោងវិនិយោគដែលត្រូវបានអនុម័ត បានកើនពី ២៦៨គម្រោង ក្នុងឆ្នាំ២០២៣ ដល់ ៦៣០គម្រោង ក្នុងឆ្នាំ២០២៥ ខណៈដែល ទំហំទុនវិនិយោគបានកើនពី ៤,៦ពាន់លានដុល្លារអាមេរិក នៅឆ្នាំ២០២៣ ដល់ ប្រមាណ១០ពាន់លានដុល្លារអាមេរិក ក្នុងឆ្នាំ២០២៥។ សន្ទុះនេះ នឹងបន្តកើនឡើង នៅឆ្នាំ២០២៦ទៀត ដោយក្នុងរយៈពេល៧ ខែដំបូងនៃឆ្នាំនេះ កម្ពុជាបានអនុម័តគម្រោងថ្មីចំនួន ៣០៩ គម្រោង ក្នុងទំហំទុនវិនិយោគប្រមាណ ៥,២ពាន់ លានដុល្លារអាមេរិក៕អត្ថបទ៖ ធូ វិរៈ