ស្របពេលដែលវិទ្យាសាស្រ្តកុំព្យូរទ័រ កំពុងក្លាយជាជំនាញដែលយុវជនកម្ពុជាចាប់អារម្មណ៍ ក៏ដូចជាការឆ្លើយតបភាពរីកចម្រើននៃសង្គមជាតិ វិទ្យាស្ថានជាតិពហុបច្ចេកទេសកម្ពុជា (NPIC) បានពង្រីកការបណ្តុះបណ្តាលផ្នែកបច្ចេកវិទ្យាព័ត៌មានទៅកាន់ជំនាញថ្មីៗ ដូចជា៖ បញ្ញាសិប្បនិម្មិត (AI), Machine Learning, Cybersecurity និង Digital Art ខណៈជំនាញទាំងនេះកំពុងក្លាយជាផ្នែកសំខាន់នៃសេដ្ឋកិច្ចឌីជីថល និងទីផ្សារការងារ។

នៅក្នុងបទសម្ភាសន៍ជាមួយ លោក អ៊ុំ សៅកុសល ប្រធានមហាវិទ្យាល័យវិទ្យាសាស្ត្រកុំព្យូទ័រ នៃវិទ្យាស្ថាន NPIC លោកបានឱ្យព័ត៍មាន ប៊ីធីវី ដឹងថា មហាវិទ្យាល័យដែលដំបូងមានតែ ២ដេប៉ាតឺម៉ង់ បានពង្រីកដល់ ៤ដេប៉ាតឺម៉ង់ ដើម្បីឆ្លើយតបនឹងតម្រូវការថ្មីៗនៃវិស័យបច្ចេកវិទ្យា។ បច្ចុប្បន្ន មហាវិទ្យាល័យមានដេប៉ាតឺម៉ង់ វិទ្យាសាស្ត្រកុំព្យូទ័រ ព័ត៌មានវិទ្យា សុវត្ថិភាពព័ត៌មានវិទ្យា និងសិល្បៈឌីជីថល។ លោកបន្តថា ក្នុងដេប៉ាតឺម៉ង់វិទ្យាសាស្ត្រកុំព្យូទ័រ មានជំនាញវិស្វកម្ម សូហ្វវែរ ដែលផ្តោតលើការសរសេរកូដ និងបង្កើ​តកម្មវិធីផ្សេងៗ។ ចំណែកជំនាញ MIS ផ្តោតលើការវិភាគទិន្នន័យ AI និង Machine Learning ដែល​កំពុងក្លាយជាជំនាញមានតម្រូវការខ្ពស់។

លោកប្រធានមហាវិទ្យាល័យ បានអំពាវនាវឱ្យសិស្សានុសិស្សចាប់អារម្មណ៍លើជំនាញនេះ ដោយសារអាចផ្តល់ចំណេះដឹងដែលស្របតាមការវិវត្តនៃបច្ចេកវិទ្យា និងតម្រូវការរបស់អាជីវកម្មនាពេលបច្ចុប្បន្ន។ សម្រាប់ដេប៉ាតឺម៉ង់ព័ត៌មានវិទ្យាវិញ ការបណ្តុះបណ្តាលផ្តោតលើបណ្តាញ Network ដោយមានទាំងកម្មវិធីថ្នាក់បរិញ្ញាបត្រ និងបរិញ្ញាបត្ររង។ ការបណ្តុះបណ្តាលក៏ផ្តោតសំខាន់លើការអនុវត្តផ្ទាល់ ឬ Hands-on Skills ដើម្បីឱ្យនិស្សិតអាចយកចំណេះដឹងទៅប្រើប្រាស់ក្នុងការងារជាក់ស្តែងផងដែរ។

លោកបានបញ្ជាក់ថា ការពង្រីកជំនាញទាំងនេះបង្ហាញថា ការបណ្តុះបណ្តាល IT នៅ NPIC មិនបានផ្តោតតែលើការសរសេរកូដទៀតទេ ប៉ុន្តែបានពង្រីកទៅកាន់ផ្នែកទិន្នន័យ បញ្ញាសិប្បនិម្មិត សន្តិសុខឌីជីថល បណ្តាញ និងបច្ចេកវិទ្យារូបភាព ដែលសុទ្ធតែជាផ្នែកសំខាន់សម្រាប់សេដ្ឋកិច្ចឌីជីថល។ ហើយសាលាក៏កំពុងពង្រឹងទំនាក់ទំនងជាមួយក្រុមហ៊ុន និងដៃគូអប់រំ ដើម្បីបង្កើតឱកាសការងារ និងការសិក្សាបន្តសម្រាប់និស្សិត។ សិស្សដែលមានសមត្ថភាពខ្ពស់អាចត្រូវបានបញ្ជូនទៅក្រុមហ៊ុនដៃគូ ខណៈសិស្សមួយចំនួនទៀតអាចទទួលបានអាហារូបករណ៍ ឬឱកាសបន្តការសិក្សានៅក្រៅប្រទេស។

សម្រាប់ការចូលរៀនឆ្នាំសិក្សាថ្មី វិទ្យាស្ថានជាតិពហុបច្ចេកទេសកម្ពុជា (NPIC) បានចាប់ផ្តើមទទួលពាក្យហើយ ខណៈការប្រឡងចូលរៀន ត្រូវបានគ្រោងធ្វើនៅថ្ងៃទី៣០ ខែវិច្ឆិកា ឆ្នាំ២០២៦ ប្រសិនបើមិនមានការផ្លាស់ប្តូរ។ ជាមួយនេះ វិទ្យាស្ថាន បានលើកទឹកចិត្តដល់យុវជន ជាពិសេសការអំពាវនាវដល់សិស្សានុសិស្សដែលជាប់ ឬមិនជាប់បាក់ឌុប ព្រមទាំងអ្នកដែលមានសញ្ញាបត្រសមមូល ឱ្យពិចារណាចាប់យកជំនាញបច្ចេកទេសទាក់ទងនឹងកុំព្យូទ័រ ដើម្បីបង្កើនសមត្ថភាព និងឱកាសការងារនាពេលអនាគត៕ អត្ថបទ៖ ឈិត បូរ៉ាវី