ភ្នំពេញ៖ ក្រុមការងារគ្រូពេទ្យប្រចាំការិយាល័យស្រុកប្រតិបតិ្តពោធិ៍សែនជ័យ នៃមនី្ទរសុខាភិបាលរាជធានីភ្នំពេញ បានបន្តចុះចាក់វ៉ាក់សាំងបង្ការជំងឺកូវីដ១៩ ដូសមូលដ្ឋាន ដូសជំរុញទី៣ និងដូសជំរុញទី៤ ជូនបងប្អូនប្រជាពលរដ្ឋ នៅតំបន់ងាយរងគ្រោះសហគមន៍ពង្រសែនជ័យ ក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ នាព្រឹកថ្ងៃទី១១ ខែឧសភា ឆ្នាំ២០២២នេះ។

លោក ចាប សុវណ្ណ ប្រធានកម្មវិធីផ្តល់ថ្នាំបង្ការនៃការិយាល័យស្រុកប្រតិបតិ្តពោធិ៍សែនជ័យ បានប្រាប់BTV ព័ត៌មានថា ក្រុមការងារ​គ្រូពេទ្យប្រចាំការិយាល័យស្រុកប្រតិបតិ្តពោធិ៍សែនជ័យ ចុះផ្តល់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋដែលខកខាន ឬមិនទាន់បានចាក់វ៉ាក់សាំង ចាប់ពី​ដូសមូលដ្ឋាន ដូសជំរុញទី៣ និងដូសជំរុញទី៤ នៅក្នុងមូលដ្ឋានសហគមន៍ពង្រសែនជ័យ ហើយនឹងនៅតាមទីផ្សារ តំបន់រោងចក្រ និងខ្នងផ្ទះ ដោយចាក់វ៉ាក់សាំងបង្ការជំងឺកូវីដ-១៩ ប្រភេទ ស៊ីណូវ៉ាក់-អស្រ្តាហ្សេនីកា-Pfizer) ចំណែកនៅតាមសាលារៀន ចាក់វ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់។

យុទ្ធនា​ការចុះចាក់វ៉ាក់សាំងដើរពីសហគមន៍មួយ ទៅសហគមន៍មួយទៀត ចាប់ផ្តើមកាល​ពីថ្ងៃទី២៥ ​ខែមេសា ឆ្នាំ២០២២ រហូតដល់ប្រជាពលរដ្ឋក្នុងមូលដ្ឋានខណ្ឌពោធិ៍សែនជ័យ ​ទទួលបានវ៉ាក់សាំងគ្រប់ៗគ្នា។

ជាមួយគ្នានោះ បងប្អូនប្រជាពលរដ្ឋ ក្មេង ចាស់ ប្រុស ស្រី រស់នៅក្នុងតំបន់ងាយរងគ្រោះក្នុង​សហគមន៍​ពង្រសែនជ័យ មកចូលរួមទទួលវ៉ាក់សាំងបង្ការជំងឺកូវីដ-១៩ បានបង្ហាញ​ពីការសប្បាយ​រីករាយ ដែលវត្តមានរបស់ក្រុមគ្រូពេទ្យ ចុះមកចាក់វ៉ាក់សាំងផ្ទាល់​ ក្នុងសហគមន៍របស់ពួកគាត់។

បើតាមឯកឧត្តមវេជ្ជបណ្ឌិត ងី មានហេង ​ប្រធាន​មនី្ទរសុខាភិបាលរាជធានីភ្នំពេញ បានឲ្យដឹងនា​ថ្ងៃនេះថា ​គិតត្រឹមយប់ថ្ងៃទី១០​ ខែឧសភា ឆ្នាំ២០២២ ​នៅក្នុងមូលដ្ឋានរាជធានីភ្នំពេញ ក្នុងចំណោម​ប្រជាពលរដ្ឋ​អាយុចាប់ពី១៨ឆ្នាំឡើង មានចំនួន១លាន ​៤១ម៉ឺន ពីរពាន់នាក់ បាន​ចាក់​វ៉ាក់សាំង​បង្ការ​ជំងឺកូវីដ-១៩ ដូសជំរុញទី៣ បានចំនួន១០៣,៥% រីឯដូសជំរុញទី៤ បានចំនួន៧៤%៕

អត្ថបទ៖ រដ្ឋា