ភ្នំពេញ៖ ក្រសួងទេសចរណ៍ បានឲ្យដឹងថា មកដល់ពេលនេះ មគ្គុទេសក៍ទេសចរណ៍មួយចំនួន បានចាប់ផ្តើមត្រឡប់ចូលមកបំរើការងាររកចំណូលពីការបកប្រែភាសានាំភ្ញៀវទេសចរអន្តរជាតិដើរកម្សាន្តទស្សនានៅកម្ពុជា។

លោក ឈុន មករា ប្រធាននាយកដ្ឋានទីភ្នាក់ទេសចរណ៍ ដឹកជញ្ជូន និងមគ្គុទេសក៍​ទេសចរណ៍ នៃក្រសួងទេសចរណ៍ បានថ្លែងប្រាប់BTV នៅថ្ងៃទី១១ ខែឧសភានេះថា នៅក្នុងអំឡុងពេលកម្ពុជា ជួបការរាតត្បាតកូវីដ១៩ រយៈពេលជាង២ឆ្នាំកន្លងមកនេះ មគ្គុទេសក៍ទេសចរណ៍ប្រមាណតែ ១២០នាក់ បានស្នើសុំព្យួរអាជ្ញាប័ណ្ឌផ្អាកអាជីវកម្មខ្លួន ហើយមានអាជីវកម្មមគ្គុទេសក៍​ទេសចរណ៍​បានប្រមាណ ជាង ៦ ៦០០ នាក់ បានបន្តសុពលភាព​អាជ្ញាប័ណ្ណ​ខ្លួន​ដើម្បី​បន្តអាជីវកម្មផ្តល់​មគ្គុទេសក៍​ទេសចរណ៍ជាធម្មតា ​បើទោះកម្ពុជា​មានភ្ញៀវទេសចរអន្តរជាតិ​តិចតួច​មក​ទស្សនាក៏ដោយ។

លោក បន្តថា ជាការកត់សំគាល់នៅក្នុងអំឡុងពេលដែលអាជីវកម្មមគ្គុទេសក៍ទេសចរណ៍ ពុំមានសកម្មភាពនាំភ្ញៀវដើរកម្សាន្ត មគ្គុទេសក៍ទេសចរណ៍ភាគច្រើន បាន​ផ្លាស់ប្តូរមុខរបរ​ទៅប្រកបអាជីវកម្មរកចំណូលផ្សេងក្រៅពីវិស័យទេសចរណ៍ ។

សម្រាប់​លោក ឈិន ដាវីន ប្រធានសមាគមន៍មគ្គុទេសក៍ទេសចរណ៍នៅរាជធានីភ្នំពេញ ថ្លែងថា ដោយសាររាជរដ្ឋាភិបាលកម្ពុជា ​បានផ្តល់ការលើកទឹកចិត្តគឺបាន​ធ្វើអោយ​អ្នក​មគ្គុទេសក៍​ទេសចរណ៍​ស្ទើតែទំាងអស់បានធ្វើអាជ្ញាប័ណ្ណបន្តសុពលភាពអាជីវកម្មពីរឆ្នាំម្តង​ដោយមិនមានបង់ពន្ធ និង​យក​កម្រៃធ្វើអាជីវកម្ម ​ហើយរហូតមកនេះ​រូបលោកផ្ទាល់​ ក៏ដូចអ្នកមគ្គុទេសក៍​ទេសចរណ៍នានាទៀត បាន​កំពុងត្រៀមត្រឡប់ទៅរកចំណូលពីវិស័យទេសចរណ៍ ​ខណៈភ្ញៀវទេសចរអន្តរជាតិជាច្រើន​បានមកទស្សនាកម្ពុជា​ច្រើនឡើងវិញ ​នៅនៅចាប់ពីខែកក្តដាខាងមុខនេះតទៅ។

សូមបញ្ជាក់ថា បច្ចុប្បន្ននៅកម្ពុជា ​មានមគ្គុទេសទេសចរណ៍បកប្រែភាសា​នាំ​ភ្ញៀវ​ទេសចរ​អន្តរជាតិ​ដើរ​កម្សាន្តចំនួន ១៣ភាសា សរុបចំនួនជាង ៦៦០៦នាក់​ ក្នុងនោះ​មាន​មគ្គុទេសក៍​ទេសចរណ៍ ជាប់កិច្ចសន្យាធ្វើការជាមួយក្រុមហ៊ុន​ការីទេសចរណ៍ ខណៈមានមគ្គុទេសក៍​ទេសចរណ៍​ជាច្រើនទៀត​កំពុងធ្វើការជាការងារFree Land ​រង់ចាំនាំភ្ញៀវដើរកម្សាន្តជាលក្ខណៈឯកជន៕

អត្ថបទ ស៊ុម សុខជា