បាត់ដំបង៖ បើទោះបីប្រទេសកម្ពុជា និងប្រទេសថៃ កំពុងមានការរឆ្លងរាលដាលនៃជំងឺកូវីដ១៩ នៅក្នុងសហគមន៍ ប៉ុន្តែ ក្នុងគោលបំណងឲ្យវិស័យពាណិជ្ជកម្មនៃប្រទេសទាំងពីរ នៅតែបន្តនោះ អាជ្ញាធរខេត្តបាត់ដំបង នៃព្រះរាជាណាចក្រកម្ពុជា និងអាជ្ញាធរប្រទេសថៃ បានសម្រេចបើកច្រកទ្វារព្រំដែនថ្នាក់តំបន់ចំនួន២កន្លែង ស្ថិតក្នុងភូមិសាស្ត្រខេត្តបាត់ដំបង ខណៈច្រកតំបន់មួយទៀត គឺច្រក៤០០ ស្ថិតក្នុងនៅស្រុកសំឡូត ក៏គ្រោងឲ្យបើកដំណើរការឡើងវិញផងដែរ។
ដោយច្រកតំបន់ចំនួន២ ដែលបានបើកដំណើរការឡើងវិញនោះ មានច្រកអូរអន្លក់ ស្ថិតនៅស្រុកកំរៀង និងច្រកអូររំដួល ស្ថិតក្នុងស្រុកភ្នំព្រឹក ដែលការបើកនេះ ធ្វើឡើងនៅថ្ងៃទី២២ ខែមិនា ឆ្នាំ២០២១ ហើយច្រកទាំងពីរនេះ ទល់នឹងស្រុកសយដាវ ខេត្តចាន់បុរី។
ក្នុងលិខិតមួយច្បាប់ចុះហត្ថលេខាដោយឯកឧត្ដម ងួន រតនៈ អភិបាលខេត្តបាត់ដំបង ចុះថ្ងៃទី១៩ ខែមិនា ឆ្នាំ២០២១ បានឲ្យដឹងថា ការបើកឲ្យឆ្លងកាត់នេះ សម្រាប់តែការដឹកទំនិញចេញចូលតែប៉ុណ្ណោះ ដែលក្នុងមួយរថយន្ត អនុញ្ញាតឲ្យមានមនុស្សតែ២នាក់ និងតម្រូវឲ្យមានការវាស់កម្តៅ ត្រួតពិនិត្យសុខភាព មិនអនុញ្ញាតឲ្យមនុស្សចាកចេញពីរថយន្តរបស់ខ្លួនឡើយ។
ក្នុងលិខិតដដែលបានបន្តថា ចំពោះទីតាំងត្រូវដោះដូរទំនិញ និងលើកដាក់ទំនិញត្រូវធ្វើឡើងក្នុងបរិវេណច្រកទ្វារព្រំដែននីមួយៗ ដោយការដឹកទំនិញចេញចូល និងឆ្លងកាត់ច្រកទ្វារព្រំដែនគិតចាប់តាំងពីម៉ោង៨ព្រឹក ដល់ម៉ោង៥ល្ងាច។
បើតាមលោក នាង ច័ន្ទថារ៉ា ប្រធានច្រកអូររំដួល ស្រុកភ្នំព្រឹក បានឲ្យដឹងថា នៅថ្ងៃទី២២ ខែមិនានេះ ភាគីទាំងពីរ បានធ្វើតេស្តដំណើរការសាកល្បង ពីនីតិវិធីបែបបទ នៃការបំពេញឯកសារចេញចូលតាមច្រករបស់ខ្លួន ដើម្បីត្រៀមបើកឲ្យដំណើការពេញលេញ នៅថ្ងៃទី២៣ ខែមិនា តាមគោលការណ៍កំណត់ជាក់លាក់ ពីអាជ្ញាធរនៃរដ្ឋបាលខេត្តបាត់ដំបង និងខេត្តពាក់ព័ន្ធរបស់ភាគីថៃ ដែលបានឯកភាពគ្នា កាលពីពេលថ្មីៗកន្លងទៅនោះ។
លោក សឿម ប៊ុនរិទ្ធ អភិបាលរងខេត្ត និងជាអ្នកនាំពាក្យរដ្ឋបាលខេត្តបាត់ដំបង បានឲ្យដឹងថា សម្រាប់ច្រកទ្វារតំបន់៤០០ ស្ថិតក្នុងស្រុកសំឡូត ទល់នឹងស្រុកបរ៉ៃ ខេត្តត្រាត នៃប្រទេសថៃ មិនទាន់ចាប់ដំណើរការទេ ដោយសារតែខាងភាគីនៃប្រទេសទាំងពីរ នៅមិនទាន់មានការជួបប្រជុំរៀបចំឲ្យដំណើរការនៅឡើយ ប៉ុន្តែ ជាគោលការណ៍ច្រកនេះ ក៏គ្រោងបើកដំណើរការឡើងវិញនៅពេលឆាប់ៗខាងមុខនេះ។
គួរបញ្ជាក់ថា ច្រកទ្វារអន្តរជាតិ និងច្រកតំបន់ ស្ថិតក្នុងភូមិសាស្ត្រខេត្តបាត់ដំបង ជាប់នឹងប្រទេសថៃ ត្រូវបានបិទលែងឲ្យមានការឆ្លងកាត់ កាលពីឆ្នាំ២០២០ ដោយសារបញ្ហាវិបត្តិកូវីដ១៩ ប៉ុន្តែ ច្រកខ្លះ ត្រូវបានអនុញ្ញាតឲ្យមានការដឹកទំនិញចេញចូល៕ អត្ថបទ៖ បាន សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
