កំពង់ធំ៖ ស្ពានបេតុង ទំនប់បង្ហៀរទឹក និងផ្លូវក្រាលក្រួសក្រហម នៅភូមិម្រាក(ក) ឃុំទួលគ្រើល ស្រុកប្រាសាទបល្ល័ង្ក ខេត្តកំពង់ធំ ត្រូវបានកសាងនិងដាក់ឲ្យប្រើប្រាស់ ដើម្បីបម្រើផលប្រយោជន៍ប្រជាពលរដ្ឋនៅតំបន់នោះ។
ឯកឧត្តម ងួន រតនៈ អភិបាលខេត្តកំពង់ធំ កាលពីថ្ងៃទី១០ ខែឧសភាម្សិលមិញ ក្នុងពិធីសម្ពោធដាក់ឲ្យប្រើប្រាស់ ស្ពានបេតុង ទំនប់បង្ហៀរទឹក និងផ្លូវក្រាលក្រួសក្រហម នៅម្រាក(ក) បានលើកឡើងថា ប្រមុខរាជរដ្ឋាភិបាលកម្ពុជា បានដាក់ចក្ខុវិស័យអភិវឌ្ឍប្រទេស ទាំងហេដ្ឋារចនាសម្ព័ន្ធផ្លូវថ្នល់ និងធារាសាស្រ្ត។
ក្នុងនោះការធ្វើទំនប់បង្ហៀរទឹកនេះ ពិតមានសារសំខាន់ណាស់សម្រាប់ជួយសម្រួលដល់ការដឹកជញ្ជូនកសិកផល និងវត្ថុផ្សេងៗ របស់ប្រជាពលរដ្ឋ ដែលកាលពីមុន ទីតាំងនេះ មានតែស្ពានឈើ ត្រូវជួសជុលធ្វើដោយកម្លាំងសាមគ្គីជាញឹកញាប់ទើបអាចធ្វើដំណើរបាន។
ឯកឧត្ដម បានបញ្ជាក់ថា ប៉ុន្តែក្រោយពីសាងសង់ទំនប់បង្ហៀរទឹកនេះរួចរាល់ ប្រជាពលរដ្ឋទាំងអស់នឹងមានភាពងាយស្រួល ទាំងរដូវប្រាំង និងរដូវវស្សា។ ហើយតាំងនេះដែរ ក៏ជាកន្លែងលេងកម្សាន្តរបស់ប្រជាពលរដ្ឋជិតឆ្ងាយ នៅរដូវវស្សា ដែលមានទឹកហូរកាត់។
ឯកឧត្តម បានអបអរសាទរជាមួយនឹងប្រជាពលរដ្ឋចំពោះសមិទ្ធផលថ្មីនេះ និងដើម្បីឲ្យសមិទ្ធផលនេះប្រើប្រាស់បានយូអង្វែង ប្រជាពលរដ្ឋ ត្រូវចូលរួមថែរក្សាទាំងអស់គ្នា ចាត់ទុកទ្រព្យសម្បត្តិសាធារណៈដូចទ្រព្យសម្បត្តិរបស់ខ្លួន។
ឯកឧត្តម អភិបាលខេត្តកំពង់ធំ បានធ្វើការអំពាវនាវផងដែរដល់ប្រជាពលរដ្ឋ ដែលមិនទាន់បានចាក់វ៉ាក់សាំងកូវីដ-១៩ ទាំងដូសមូលដ្ឋានក្តី ដូសជំរុញក្តី ត្រូវប្រញាប់រួសរាន់ទៅចាក់ទាំងអស់គ្នា។ ទន្ទឹមនោះ ដើម្បីបំពេញកាតព្វកិច្ចជាពលរដ្ឋល្អ ប្រជាពលរដ្ឋទាំងអស់ ត្រូវត្រៀមលក្ខណៈទៅបោះឆ្នោតជ្រើសរើសក្រុមប្រឹក្សាឃុំសង្កាត់ នៅថ្ងៃទី៥ ខែមិថុនា ខែក្រោយនេះ ឱ្យបានគ្រប់ៗគ្នា ដើម្បីជ្រើសរើសមេដឹកនាំមូលដ្ឋាន ដែលខ្លួនស្រឡាញ់ តាមបែបលទ្ធិប្រជាធិបតេយ្យ៕
អត្ថបទ៖ លី សាងស៊ីន