ប្រតិភូជាន់ខ្ពស់សភាមកពីបណ្ដាប្រទេសនានា បានបង្ហាញការស្ងើច​សរសើរ​ចំពោះ​ភាព​ជា​អ្នកដឹកនាំ និងសុន្ទរកថារបស់សម្ដេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា​នៃ​ព្រះរាជាណាចក្រកម្ពុជា និងជាប្រធាន សន្និសីទប្រធានសភា នៃអន្តរសភា លើកទី២ (ISC-2) ដែលកម្ពុជាធ្វើជាម្ចាស់ផ្ទះរៀបចំនៅរាជធានីភ្នំពេញនៅថ្ងៃទី២៦-២៨ ខែសីហា ឆ្នាំ២០២៦នេះ។

ឯកឧត្តម ជា ធីរិទ្ធ អ្នកនាំពាក្យ ព្រឹទ្ធសភា និងជាអ្នកនាំពាក្យ សន្និសីទប្រធានសភា នៃអន្តរសភា លើកទី២ (ISC-2) បានថ្លែងតាមរយៈសន្និសីទសារព័ត៌មានស្ដីពីលទ្ធផលនៃន្និសីទនេះថា ក្នុងសន្និសីទនេះសម្ដេចតេជោ ហ៊ុន សែន មានជំនួបទ្វេភាគីជាមួយនឹងបណ្ដាប្រតិភូជាន់ខ្ពស់សភាមកពីបណ្ដាប្រទេសនានារហូតទៅដល់ ៩ ជំនួបផ្សេងគ្នា។

ក្នុងជំនួបទាំង៩នោះ សម្ដេចតេជោ និងប្រតិភូជាន់ខ្ពស់សភាមកពីបណ្ដាប្រទេសនានា បានជជែកគ្នាពីទំនាក់ទំនងទ្វេភាគី និងតួនាទីរបស់កម្ពុជានៅលើឆាកអន្តរជាតិ ជាពិសេសការពង្រីកនូវតួនាទីរបស់ សន្និសីទប្រធានសភា នៃអន្តរសភា (ISC) ដែលពេលនេះកំពុងតែដើរតួនាទីយ៉ាងសំខាន់ ដែលសម្ដេចតេជោ បានលើកឡើងថា ជាតួនាទីមួយអចិន្រ្ដៃយ៍សម្រាប់ជួយដោះស្រាយបញ្ហារបស់ពិភពលោក។

ក្នុងនោះសម្ដេចតេជោ ក៏មានជំនួបទ្វេភាគីជាមួយប្រធានព្រឹទ្ធសភារបស់ឥណ្ឌូណេស៊ី ដោយបានជជែកពីកិច្ចសហប្រតិបត្តិការទ្វេភាគីរួមទាំងតួនាទីរបស់ ISC ដែលប្រទេសឥណ្ឌូណេស៊ីនឹងត្រូវធ្វើជាម្ចាស់ផ្ទះនៅក្នុងសន្និសីទលើកទី៣ នៅឆ្នាំ២០២៧ខាងមុខ ដោយភាគីទាំងពីរបានជជែកផ្លាស់ប្ដូរយោបល់គ្នាចំពោះការរៀបចំសន្និសីទនេះឱ្យស្របទៅនឹងពេលវេលារបស់ឥណ្ឌូណេស៊ីនាពេលខាងមុខផងដែរ។

ឯកឧត្តម ជា ធីរិទ្ធ បញ្ជាក់ថា៖«...នៅពេលដែលប្រតិភូនៃតំណាងសភាតាមបណ្ដាប្រទេសនានាបានជួបសម្ដេចតេជោ គឺសុទ្ធតែកោតសរសើរចំពោះសម្ដេចអគ្គមហាសេនាបតីតេជោ ហ៊ុន សែន ដែលលោកបានពលិកម្មគ្រប់បែបយ៉ាង ហើយជាពិសេសគឺនយោបាយឈ្នះឈ្នះ ហើយជាពិសេសនោះប្រតិភូស្ទើតែទាំងអស់បានបង្ហាញនូវការចាប់អារម្មណ៍ចំពោះសុន្ទរកថាបើករបស់សម្ដេចតេជោកាលពីម្សិលមិញ ដែលជាសុន្ទរកថាដ៏មានការចាប់អារម្មណ៍»។

ឯកឧត្តម ធីរិទ្ធ បានលើកឡើងនៅប្រសាសន៍របស់ ឧត្ដម Farah Maalim, សមាជិកសភានៃសាធារណរដ្ឋកេនយ៉ា បានលើកឡើងថា សុន្ទរកថារបស់សម្ដេចតេជោ គឺជាសុន្ទរកថាល្អឥតខ្ចោះ ដែលលោកខានបានស្ដាប់រាប់ឆ្នាំមកហើយ មិនដែលឃើញសុន្ទកថាណាល្អបែបនេះនោះទេ។

សូមជម្រាបថា ក្រោយបញ្ចប់សន្និសីទសន្និសីទប្រធានសភានៃអន្តរសភាលើកទី២ (ISC-2) នៅរាជធានីភ្នំពេញ ព្រះរាជាណាចក្រកម្ពុជា ចាប់ពីថ្ងៃទី២៦ ដល់ថ្ងៃទី២៨ ខែសីហា ឆ្នាំ២០២៦, អង្គសន្និសីទ បានចេញសេចក្តីប្រកាសទីក្រុងភ្នំពេញស្ដីពីសាមគ្គីភាពដើម្បីសន្តិភាព និងវិបុលភាពរួម៖ ពង្រឹងច្បាប់អន្តរជាតិ និងដោះស្រាយជម្លោះដោយសន្តិវិធី។ តាមរយៈសន្និសីទនេះ ប្រធានសភា និងតំណាងសភាមកពីតំបន់ផ្សេងៗជុំវិញពិភពលោក ពិចារណាឃើញថា សហគមន៍អន្តរជាតិនៅតែបន្តប្រឈមមុខនឹងបញ្ហាប្រឈមដ៏ស្មុគស្មាញជាច្រើន រួមមាន ជម្លោះ ភាពតានតឹងភូមិសាស្ត្រនយោបាយ ភាពមិនប្រាកដប្រជាផ្នែកសេដ្ឋកិច្ច ការរំខានដល់លំហូរពាណិជ្ជកម្ម ការប្រែប្រួលអាកាសធាតុ អសន្តិសុខស្បៀង និងថាមពល ការរំខានផ្នែកបច្ចេកវិទ្យា និងការគំរាមកំហែងតាម ប្រព័ន្ធបច្ចេកវិទ្យា វិបត្តិមនុស្សធម៌ និងវិសមភាពដែលកំពុងតែរីកធំឡើង ដូច្នេះបណ្ដាប្រតិភូជាន់ខ្ពស់សភាបានបញ្ជាក់ជាថ្មី នូវការប្តេជ្ញាចិត្តចំពោះអធិបតេយ្យ បូរណភាពទឹកដី ឯករាជ្យភាពនយោបាយ ការមិនជ្រៀតជ្រែកកិច្ចការផ្ទៃក្នុងរបស់រដ្ឋនីមួយៗ និងការដោះស្រាយវិវាទដោយសន្តិវិធី ស្របតាមច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិ ដោយភាពពេញលេញ និងភាពប្រទាក់ក្រឡាគ្នា៕