ភ្នំពេញ៖ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បាន​ណែ​នាំ​កម្លាំង​ជំនាញ​ពង្រឹង​កិច្ច​សហការ​ឱ្យ​បាន​ជិត​ស្និទ្ធ​ជាមួយ​អាជ្ញាធរ​មាន​សមត្ថ​កិច្ច​ពាក់​ព័ន្ធ​ទាំង​ថ្នាក់ជាតិ និងអន្តរជាតិ (ច្រកទ្វារព្រំដែនគោក ទឹក និងផ្លូវអាកាស) ក្នុងការផ្លាស់​ប្តូរ​ព័ត៌មាន​សម្ងាត់ ដើម្បីទប់ស្កាត់ និងបង្រ្កាបខ្សែបណ្តាញជួញដូរគ្រឿងញៀន ដោយមិនលើកលែង សំដៅ​ធានា​សន្តិសុខ សុវត្ថិភាពជូនប្រជាពលរដ្ឋ និងសង្គមជាតិ។ ជាមួយគ្នានេះ ការពង្រឹងវិន័យ ក្រម​សីលធម៌ ជំនាញ វិជ្ជាជីវៈ រួមនិងការកសាងសមត្ថភាពតាមរយៈវគ្គបណ្តុះបណ្តាល គឺជា​កត្តា​សំខាន់​មិន​អាចខ្វះបាន។

ការណែនាំនេះ ក្នុងកិច្ចប្រជុំបូកសរុបលទ្ធផលការងារប្រចាំខែសីហា និងលើក​ទិស​ដៅ​ការ​ងារ​អនុវត្ត​បន្ត​សម្រាប់ខែកញ្ញា ឆ្នាំ២០២៦ នាព្រឹកថ្ងៃចន្ទ ទី៣១ ខែសីហា ឆ្នាំ២០២៦។

កិច្ចប្រ​ជុំនេះ ប្រារព្ធធ្វើនៅសាលប្រជុំមន្ទីរប្រឆាំងបទល្មើសគ្រឿងញៀន ដោយមានការចូលរួមពី លោកឧត្តមសេនីយ៍ទោ សំ សម្បត្តិ ប្រធានលេខាធិការដ្ឋាន នៃនាយកដ្ឋាន​កណ្តាល​នគរបាល​យុត្តិធម៌, លោក លោកស្រីឧត្តមសេនីយ៍ វរសេនីយ៍ នាយករងមន្ទីរ, លោក លោកស្រីវរសេនីយ៍ នាយ នាយរងការិយាល័យ និងមន្ត្រីជំនាញពាក់ព័ន្ធជាច្រើនរូបទៀត។

បន្ទាប់​ពីបានស្តាប់របាយការណ៍បូកសរុបលទ្ធផលការងារខែសីហា រួចមក ឯកឧត្តម ឧត្តម​សេនីយ៍​ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បានថ្លែងនូវការកោតសរសើរ និង​វាយ​​តម្លៃខ្ពស់ចំពោះស្មារតីលះបង់ ប្រកបដោយទំនួលខុសត្រូវខ្ពស់របស់ថ្នាក់ដឹកនាំ និងមន្ត្រី​នគរបាល​ជាតិ​ទាំងអស់ ចំណុះមន្ទីរប្រឆាំងបទល្មើសគ្រឿងញៀន ដែលបានខិតខំ​ប្រឹង​ប្រែង​យ៉ាង​សកម្ម​ក្នុង​ការស្រាវជ្រាវ បង្ក្រាប និងទប់ស្កាត់​បទ​ល្មើស​គ្រឿង​ញៀន​យ៉ាង​មាន​ប្រសិទ្ធ​ភាព​នា​ពេល​កន្លង​មក​។ ជាពីសេសបានស្រាវជ្រាវ និងបើកប្រតិបត្តិការបង្ក្រាបបទល្មើសគ្រឿងញៀនឆ្លងដែន និង​ការ​លួចលាក់កែច្នៃសារធាតុញៀន ដោយចាប់ខ្លួនជនសង្ស័យ និងចាប់​យក​វត្ថុ​តាង​សារធាតុ​ញៀន​បាន​ជាច្រើនគីឡូក្រាម បញ្ជូនទៅតុលាការចាត់ការតាមនីតិវិធីច្បាប់។

ឯកឧត្តម ឧត្តមសេនីយ៍ឯក នាយកមន្ទីរ ក៏មិនភ្លេចណែនាំឱ្យកម្លាំងជំនាញបង្កើនការងារអប់រំ ផ្សព្វ​ផ្សាយ ដោយសហការជាមួយភាគីពាក់ព័ន្ធ ជំរុញ​ការ​ផ្សព្វ​ផ្សាយ​អំពី​គ្រោះ​ថ្នាក់​នៃ​គ្រឿង​ញៀន​ដល់​ស​ហគមន៍ សាលារៀន និងស្រទាប់យុវវ័យ។

ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន ក៏​បាន​ផ្តាំ​ផ្ញើ​ដល់​កង​កម្លាំងទាំងអស់ ត្រូវបន្តស្មារតីប្រុងប្រយ័ត្នខ្ពស់ និងបង្កើនកិច្ចខិតខំប្រឹងប្រែងទ្វេដង ក្នុង​ការ​បង្ការ ទប់ស្កាត់ និងបង្រ្កាបបទល្មើសគ្រឿង ដើម្បីធានាសន្តិសុខ សុវត្ថិភាព និង​ភាព​សុខ​សាន្ត​ជូន​ប្រជា​ពលរដ្ឋ និងសង្គមជាតិ៕