អតីតសិស្សប្រឡងធ្លាក់បាក់ឌុប កាលពីឆ្នាំ២០២៥ បានប្រែក្លាយការខកចិត្ត និងការឈឺចាប់ព្រោះថៃឈ្លានពាន មកខិតខំសិក្សា រហូតប្រឡងជាប់និទ្ទេស A នៅឆ្នាំ២០២៦នេះ ដោយដាក់គោលដៅកសាងសមត្ថភាពដើម្បីអភិវឌ្ឍជាតិ។

យុវជន វ៉ាន សែនវ៉ា បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៦ ជាប់និទ្ទេស A បានប្រាប់ BTV នៅថ្ងៃទី៣ ខែកញ្ញា ឆ្នាំ២០២៦នេះ ថា កាលពីឆ្នាំ២០២៥ លោកប្រឡងធ្លាក់ ព្រោះការសិក្សាមិនបានពេញលេញ ដោយសារមានវិបត្តិគ្រួសារ។ យុវជនរូបនេះបញ្ជាក់ថា ក្រោយពេលទទួលលទ្ធផលប្រឡងមិនល្អ ក្រុមគ្រួសារ បងៗ ពិសេសម្ដាយធំ បានលើកទឹកចិត្ត ឱ្យបន្តការសិក្សា ដើម្បីប្រឡងម្ដងទៀត។ តាមរយៈការលើកទឹកចិត្តនេះ រួមផ្សំនឹងការខិតខំ នៅទីបំផុតយុវជនរូបនេះ ប្រឡងជាប់ ដោយទទួលបានជ័យលាភី និទ្ទេស A នៅឆ្នាំនេះ។

យុវជន វ៉ាន សែនវ៉ា លើកឡើងថា «ខ្ញុំសូមអរគុណដល់អ៊ំស្រីរបស់ខ្ញុំ គាត់ត្រឹមជាសាច់ថ្លៃ​ តែគាត់ស្រឡាញ់ក្មួយ។ គាត់លើកទឹកចិត្ត ឱ្យខ្ញុំចូលរៀនប្រឡងថ្នាក់ទី១២ម្ដងទៀត ហើយគាត់ថា គាត់ជឿជាក់លើខ្ញុំ ដែលធ្វើឱ្យខ្ញុំមានស្មារតីចង់ចូលរៀនឡើងវិញ។ ហើយចំណុចមួយទៀតដែលជំរុញទឹកចិត្តខ្ញុំខ្លាំងបំផុតនោះ គឺថ្ងៃទៅចូលរួម រង់ចាំទទួលវីរៈកងទ័ព នៅខាងមុខអាកាសយានដ្ឋានអន្ដរជាតិភ្នំពេញ ដែលថៃ ដោះលែងមកវិញ កាលពីថ្ងៃទី៣១ ខែធ្នូ ឆ្នាំ២០២៥ ពេលនោះខ្ញុំចងចាំពាក្យពូកងទ័ពគាត់ថា ក្មួយៗខំរៀនទឹកដីមាតុភូទុកឱ្យពូៗការពារ។ ហើយខ្ញុំក៏តាំងចិត្តរៀនដើម្បីឱ្យមានសមត្ថភាពការពារប្រទេសជាតិ ខ្ញុំជឿថា ពេលប្រទេសជាតិយើងមានធនធានមនុស្ស ដែលមានសមត្ថភាព ប្រទេសគេក៏មិនហ៊ានឈ្លានពានយើងដែរ»។

ម្ចាស់ជ័យលាភី និទ្ទេស A ឆ្នាំ២០២៦នេះ ដែលជាអតីតសិស្សធ្លាក់បាក់ឌុប កាលពីឆ្នាំមុន អះអាងថា ការធ្លាក់បាក់ឌុប មិនមែនជាចុងបញ្ចប់នោះឡើយ។ លោកលើកទឹកចិត្តដល់យុវជនដែលមិនទទួលជោគជ័យនៅឆ្នាំនេះ កុំបាក់ទឹកចិត្ត ត្រូវខិតខំសិក្សាប្រឡងយកជ័យលាភី នៅឆ្នាំក្រោយ ឬក៏សិក្សាជំនាញបច្ចេកទេស។

យុវជន វ៉ាន សែនវ៉ា បេក្ខជននិទ្ទេស Aថា «ខ្ញុំចង់លើកទឹកចិត្តដល់អ្នកធ្លាក់បាក់ឌុបជាពិសេស ការធ្លាក់នេះមិនមែនជាការកំណត់ឱ្យជីវិតយើងត្រូវបញ្ចប់ទេ ពីព្រោះបញ្ហាជីវិតវាច្រើន និងធ្ងន់ធ្ងរទៀត បើយើងចុះចាញត្រឹមធ្លាក់បាក់ឌុប យើងមិនអាចយកឈ្នះបញ្ហាខាងមុខទៀតបានទេ។ ខ្ញុំសូមលើកទឹកចិត្ត យើងធ្លាក់តែនៅមានឱកាសខំប្រឹងរៀនប្រឡងយកនិទ្ទេសល្អនៅឆ្នាំក្រោយទៀត។ ហើយបើគិតថា មិនចង់រៀនទៀត អាចជ្រើសរើសរៀនបច្ចេកទេស តែបើចង់បានសញ្ញាបត្របាក់ឌុប ហើយនិទ្ទេសល្អដូចខ្ញុំ ដាក់ពាក្យចូលរៀនទៀត»។

យុវជន វ៉ាន សែនវ៉ា កើតនៅស្រុកមេសាង ខេត្តព្រៃវែង។ លោកបានផ្ទេរសាលាពីខេត្តព្រៃវែង មកសិក្សានៅ វិទ្យាល័យចំណេះទូទៅ និងបច្ចេកទេស ហ៊ុន សែន ជម្ពូវ័ន ក្នុងរាជធានីភ្នំពេញ កាលពីចុងឆ្នាំ២០២៥ បន្ទាប់ពីធ្លាក់បាក់ឌុប។ យុវជនរូបនេះ បញ្ជាក់ថា ការផ្ទេរមកវិទ្យាល័យថ្មីនេះ បានដាក់ក្ដីរំពឹងខ្ពស់ក្នុងប្រឡងយកនិទ្ទេសល្អ ហើយទីបំផុតការប្ដេជ្ញាចិត្ត បូករួមនិងការខិតខំ លោកក៏ទទួលបាននិទ្ទេស A ដូចបំណង។

សូមជម្រាបជូនថា នៅក្នុងឆ្នាំ២០២៦នេះ សិស្សប្រឡងជាប់ សញ្ញាបត្រមធ្យមសិក្សាទុតិយភូមិ (បាក់ឌុប) ជាង ១២ម៉ឺន ៥ពាន់នាក់ ក្នុងចំណោមបេក្ខជនប្រឡងជាង ១៥ម៉ឺននាក់។ នៅក្នុងចំណោមសិស្សប្រឡងជាប់ជាង ១២ម៉ឺននាក់នេះ សិស្សប្រឡងជាប់និទ្ទេស A មានចំនួន ២,០២២នាក់។ រាជធានីភ្នំពេញ ឈរនៅលំដាប់ទី១ ដែលមានសិស្សនិទ្ទេស A ច្រើនជាងគេ ខេត្តកណ្ដាល នៅលេខរៀងទី២ និងខេត្តសៀមរាប ឈរនៅលំដាប់លេខរៀងទី៣៕ អត្ថបទ៖ លៀ ស៊ីណា