កងរាជអាវុធហត្ថរាជធានីភ្នំពេញ រួមទាំងវត្តមាន ក្រុមយុវជន នៅថ្ងៃទី ៥ ខែកញ្ញា ឆ្នាំ ២០២៦​នេះ ក្រុមយុវជន បានបន្តមកជួយវេចខ្ចប់សម្ភារជាអំណោយសម្រាប់ផ្តល់ជូន អ្នកភូមិរង់ចាំ។ ការ​វេច​ខ្ចប់នេះ​រៀបចំឡើងរយៈពេលពីរថ្ងៃ គឺថ្ងៃទី ៤ និងថ្ងៃទី ៥ ខែកញ្ញា ឆ្នាំ ២០២៦នៅអាគារ KAMPUS។

ខ្មែរជួយខ្មែរ ខ្មែរគាំទ្រគ្នា អ្នកជួរក្រោយរង់ចាំគាំទ្រអ្នកជួរមុខគ្រប់វេលា។ នេះជាទឹកចិត្ត របស់​ប្រជា​ពលរដ្ឋខ្មែរគ្រប់រូប ហើយម្នាក់ៗតែងចូលរួមជួយជាធនធាន ជាកម្លាំង ទៅតាម​លទ្ធភាព​រៀង​ខ្លួន​។

ជាក់ស្តែងនៅថ្ងៃទី ៥ ខែកញ្ញានេះ វត្តមានកងរាជអាវុធហត្ថរាជធានីភ្នំពេញ និង ក្រុម​យុវជន​បាន​ចូល​រួម​វេចខ្ចប់ជាសម្ភារអំណោយ សម្រាប់ផ្តល់ជូនអ្នកភូមិ រង់ចាំ ពិសេសជាសម្ភារសិក្សា ជា​ការ​លើក​ទឹក​ចិត្តដល់កុមារនៅទីតាំងនោះឱ្យខិតខំប្រឹងប្រែងរៀនសូត្រ។ សម្ភារទាំងនេះ ជា​ការ​ចូល​រួម​របស់​សប្បុរសជននៅជួរក្រោយ។

ជាការចាប់អារម្មណ៍ យុវជនមួយចំនួន បានចូលរួមវេចខ្ចប់សម្ភារតាំងពីម្សិលម៉ិញ យុវជន​ខ្លះ​ទើប​បាន​ចូល​រួមនៅថ្ងៃនេះ។ កងរាជអាវុធហត្ថរាជធានីភ្នំពេញ ក៏ដូចជាក្រុមយុវជនលើកឡើងជារួមថា ក្នុង​នាមជាជាតិសាសន៍ខ្មែរ គឺមិនដែលភ្លេច ពួកគាត់ជាពលរដ្ឋរងគ្រោះនៅជួរមុខនោះទេ។ ពួក​គាត់​ជា​ជួរ​ក្រោយរង់ចាំគាំទ្រជួយជានិច្ច ហើយក៏លើក​ទឹក​ចិត្ត​ដល់​កុមារ​នៅ​ទីតាំង​នោះ​ត្រូវខិត​ខំ​សិក្សា ​និងសូមជូនអ្នករស់នៅភូមិ រង់ចាំទាំងអស់ មានសុខភាពល្អ ជួបតែរឿងល្អ។

ក្រោយ​វេច​ខ្ចប់សម្ភារអំណោយទាំងនេះរួចរាល់ ក្រុមការងារ ស.ស.យ.ក នឹងនាំយកទៅជូន ពលរដ្ឋ​ភូមិ​រង់ចាំ នៅថ្ងៃ ទី ១២ ថ្ងៃទី ១៣ ខែកញ្ញា ខាងមុខ។ ការ​នាំយ​កសម្ភារ​អំណោយ​ទៅ​ជូន​នេះ ​ធ្វើឡើងក្រោមការដឹកនាំដោយ ឯក ឧត្តម ហ៊ុន ម៉ានី ប្រធាន​សហភាព​សហព័ន្ធ​យុវជន​កម្ពុជា​៕ អត្ថបទ៖ គឹម ហុក