ដើម្បីពង្រីកចំណេះដឹងជាក់ស្ដែងក្រៅពីទ្រឹស្ដីក្នុងថ្នាក់រៀន ក្រុមនិស្សិតនៃវិទ្យាស្ថានខ្មែរជំនាន់ថ្មី បានធ្វើដំណើរបេសកកម្មសិក្សាស្រាវជ្រាវរយៈពេល ៣ថ្ងៃ លើទឹកដីខេត្តមណ្ឌលគិរី ចាប់ពីថ្ងៃទី៤ ដល់ថ្ងៃទី៦ ខែកញ្ញា ឆ្នាំ២០២៦ លើប្រធានបទ ជាតិពន្ទុវិទ្យា តម្លៃសិល្បៈ និងវប្បធម៌ជនជាតិភាគតិច ។ ដំណើរបេសកកម្មនេះ ផ្ដោតសំខាន់លើការស្វែងយល់ពីជីវភាពរស់នៅ ទំនៀមទម្លាប់ និងវប្បធម៌ប្រពៃណីរបស់បងប្អូនជនជាតិដើមភាគតិច ព្រមទាំងការកម្សាន្តនៅតាមតំបន់ធម្មជាតិនានាក្នុងខេត្ត។

អ្នកគ្រូ ឱក សម្ភស្ស មកពីវិទ្យាស្ថានខ្មែរជំនាន់ថ្មី បានរៀបរាប់ឱ្យដឹងថា ការចុះមកដល់មូលដ្ឋានផ្ទាល់បែបនេះ បានផ្ដល់ឱកាសឱ្យក្រុមការងារ ក៏ដូចជាប្អូនៗនិស្សិត បានដឹងកាន់តែច្បាស់អំពីប្រភពដើម ការប្រកបរបរចិញ្ចឹមជីវិត និងការរស់នៅប្រចាំថ្ងៃរបស់បងប្អូនជនជាតិដើមភាគតិច។ អ្នកគ្រូបានបញ្ជាក់ថា បទពិសោធន៍ជាក់ស្ដែងដែលទទួលបាននៅពេលនេះ គឺមានសារៈសំខាន់ខ្លាំងណាស់ ក្នុងការយកទៅចែករំលែកបន្តដល់ប្អូនៗសិស្ស-និស្សិតជំនាន់ក្រោយ ដើម្បីឱ្យពួកគាត់បានស្គាល់ និងយល់ដឹងកាន់តែទូលំទូលាយពីតម្លៃវប្បធម៌របស់បងប្អូនជនជាតិដើមភាគតិចយើង។  

អ្នកគ្រូ ឱក សម្ភស្ស ក៏បានបង្ហាញនូវចំណាប់អារម្មណ៍រីករាយចំពោះដំណើរកម្សាន្តនេះផងដែរ ដោយក្រុមការងារបានទៅទស្សនាតំបន់ទេសចរណ៍សំខាន់ៗជាច្រើន ដូចជា សមុទ្រឈើ ភ្នំដោះក្រមុំ ភ្នំណាំលៀរ និងរមណីយដ្ឋានទឹកធ្លាក់ប៊ូស្រា។ អ្នកគ្រូបានលើកឡើងថា ទោះបីជាពេលនេះស្ថិតក្នុងរដូវវស្សា និងមានភ្លៀងធ្លាក់ខ្លះក៏ដោយ ក៏ទេសភាពធម្មជាតិបៃតងខ្ចី អមជាមួយអាកាសធាតុត្រជាក់ស្រស់ស្រាយ បានធ្វើឱ្យដំណើរសិក្សានេះកាន់តែមានភាពទាក់ទាញ និងមិនមានផលលំបាកអ្វីឡើយ។

អ្នកគ្រូបានបង្ហាញនូវក្តីសង្ឃឹមថា រូបភាព និងចំណេះដឹងដែលទទួលបានពីដំណើរទស្សនកិច្ចនេះ នឹងក្លាយជាចំណែកមួយជួយផ្សព្វផ្សាយពីសម្រស់ធម្មជាតិ និងវប្បធម៌ដ៏សម្បូរបែបរបស់ខេត្តមណ្ឌលគិរី ឱ្យសាធារណជនទូទាំងប្រទេសបានស្គាល់ និងចាប់អារម្មណ៍មកកម្សាន្តកាន់តែច្រើនឡើង។

គួរកត់សម្គាល់ថា សក្តានុពលទាំងផ្នែកធម្មជាតិ និងវប្បធម៌ដ៏សម្បូរបែបនេះហើយ ដែលធ្វើឱ្យមណ្ឌលគិរីក្លាយជាគោលដៅដ៏ទាក់ទាញបំផុត មិនត្រឹមតែសម្រាប់ភ្ញៀវទេសចរមកលំហែកម្សាន្តនោះទេ ប៉ុន្តែក៏ជាទីតាំងដ៏ស័ក្តិសមបំផុតសម្រាប់សិស្ស និស្សិត និងអ្នកស្រាវជ្រាវ ចុះមកដកស្រង់បទពិសោធន៍ផ្ទាល់ពីជីវភាពសហគមន៍ជាក់ស្តែងផងដែរ ៕ អ៊ិត ភីរុណ