នារសៀលថ្ងៃទី០៤ ខែកញ្ញា ឆ្នាំ២០២៦ ឯកឧត្តម នួន ផារ័ត្ន អភិបាលខេត្តកំពង់ធំ អញ្ជើញជួបសំណេះសំណាល និងអបអរសាទរសិស្សានុសិស្សខេត្តកំពង់ធំ ជ័យលាភីនិទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦ នាសម័យប្រឡងថ្ងៃទី១០ ខែសីហា ឆ្នាំ២០២៦ ។ ក្នុងឱកាសនោះ លោក តាន់ ប៊ុនហុង ប្រធានមន្ទីរអប់រំ យុវជន និងកីឡាខេត្តកំពង់ធំ ធ្វើរបាយការណ៍ដោយលើកឡើងថា សម័យប្រឡងថ្ងៃទី១០ ខែសីហា ឆ្នាំ២០២៦កន្លងទៅនេះ សម្រាប់ខេត្តកំពង់ធំ មានបេក្ខជនប្រឡងសរុបប្រមាណ ៥៥៦៣នាក់ ស្រីប្រមាណ ៣២៥៤នាក់ ក្នុងនោះថ្នាក់វិទ្យាសាស្ត្រ ១១៨៤នាក់ និងថ្នាក់សាស្ត្រសង្គម ចំនួន ៤៣៧៩នាក់ បេក្ខជនប្រឡងជាប់ ៥១៦៤នាក់ ស្រីចំនួន ៣១៣៧ នាក់ ភាគរយសរុប ស្មើរ ៨៣.២៣% ក្នុងនោះសិស្សជាប់និទ្ទេសA ចំនួន ៥២នាក់ ស្រី២៦ នាក់។

ជាមួយគ្នានេះ ឯកឧត្តម នួន ផារ័ត្ន អភិបាលខេត្តកំពង់ធំ មាមប្រសាស្ត្រលើកឡើងថា ការទទួលបានជ័យលាភីនិទ្ទេស A នាពេលនេះ គឺជាសមិទ្ធផលដ៏ថ្លៃថ្លា និងគួរឱ្យមោទនភាព ដែលកើតចេញពីការខិតខំប្រឹងប្រែងសិក្សារៀនសូត្ររបស់សិស្សានុសិស្ស ការយកចិត្តទុកដាក់បង្ហាត់បង្រៀនរបស់លោកគ្រូ អ្នកគ្រូ ព្រមទាំងការគាំទ្រលើកទឹកចិត្តពីឪពុកម្តាយ អាណាព្យាបាល និងសង្គមទាំងមូល។ ជ័យលាភីនេះ មិនត្រឹមតែជាកិត្តិយសសម្រាប់សិស្សានុសិស្ស និងក្រុមគ្រួសារប៉ុណ្ណោះទេ ប៉ុន្តែថែមទាំងជាមោទនភាពរបស់សាលារៀន និងខេត្តផងដែរ។ ឯកឧត្តមបន្តថា ក្រោយពីការប្រកាសជាផ្លូវការ នៃលទ្ធប្រឡងសញ្ញាបត្រមធ្យមសិក្សាទុតិយភូមិរួច ប្អូនៗទាំងអស់ ទាំងអ្នកប្រឡងជាប់ និងប្រឡងធ្លាក់ក្តី ត្រូវបន្តការសិក្សារៀនសូត្របន្ថែមទៀត ។ ទន្ទឹមនេះ ការសិក្សារៀនជំនាញ មិនត្រឹមតែផ្តល់ចំណេះដឹងសម្រាប់ប្រកបអាជីពប៉ុណ្ណោះទេ ប៉ុន្តែថែមទាំងជាការរៀនសូត្រមេរៀនជីវិត ដែលជួយឱ្យយើងចេះគិត ចេះដោះស្រាយបញ្ហា មានការទទួលខុសត្រូវ អត់ធ្មត់ និងមានសមត្ថភាពប្រឈមមុខនឹងបញ្ហាប្រឈមនានា។ ចំណេះដឹង ជំនាញ និងបទពិសោធន៍ដែលទទួលបាន នឹងក្លាយជាមូលដ្ឋានដ៏សំខាន់សម្រាប់កសាងអនាគត និងរួមចំណែកអភិវឌ្ឍគ្រួសារ សង្គម និងប្រទេសជាតិ។ ក្នុងពិធីជួបសំណេះសំណាលនេះ ឯកឧត្តមអភិបាលខេត្ត បានផ្តល់រង្វាន់លើកទឹកចិត្តដល់ប្អូនៗសិស្សានុសិស្សជ័យលាភី និទ្ទេស A ទាំង ៥២នាក់ ទទួលបានប័ណ្ណសរសើរ និងថវិកា ៤០ ម៉ឺនរៀលក្នុងម្នាក់ៗ ផងដែរ៕