​បាល់ទាត់៖ អង្គការ​ផ្កាយ​សមុទ្រ​កម្ពុជា (ISF) និង​ក្រុមហ៊ុន AIA Cambodia បាន​សហការគ្នា​បង្កើត​ព្រឹត្តិការណ៍​បាល់ទាត់​កុមារ និង​យុវជនដោយ​ប្រសិទ្ធិ​នាម​ថា AIA - ISF Youth League នៅ​ក្រុង​សៀមរាបនៅ​ទីលាន​បាល់ទាត់​ហនុមានដើម្បី​ផ្តល់ឱកាស​ដល់​កុមារ និង​យុវជន​នៅតាម​បណ្តា​ខេត្ត​ទទួលបាន​ឱកាស​ប្រកួតប្រជែង​គ្នា​ បញ្ចេញ​នូវ​ទេពកោសល្យ​អភិវឌ្ឍ​ខ្លួន​ក្លាយជា​កីឡាករ​កីឡាការិនី​ជំនាញ​ផ្នែក​បាល់ទាត់​នៅពេល​អនាគត​។​

​លោក យិន សាម​ឌី ប្រធាន​រៀប​គ្រប់គ្រង​កម្មវិធី​បាល់ទាត់ ​របស់​អង្គការ​ផ្កាយ​សមុទ្រ​កម្ពុជាបាន​បញ្ជាក់ថា ការប្រកួត​បាល់ទាត់​កុមារ និង​យុវជន AIA - ISF គឺជា​ព្រឹត្តិការណ៍​ប្រកួត​វិលជុំ​ថ្នាក់​សហគមន៍​ដ៏​ធំ​បង្អស់​មួយ​នៅ​កម្ពុជា ដែល ផ្តល់ឱកាស​ដល់​កុមារា កុមារី និង​យុវជន​ក្រីក្រ ក្នុង​ការលេង​បាល់ទាត់​ក្នុង​បរិស្ថាន​មួយដែលមាន​សុវត្ថិភាព។ ​ឆ្នាំ​២០២២ គឺជា​ឆ្នាំ​ដំបូងបង្អស់​ហើយដែល​អង្គការ​ផ្កាយ​សមុទ្រ​កម្ពុជា និង​ក្រុមហ៊ុន AIA Cambodia រៀបចំ​ព្រឹត្តិការណ៍​ប្រកួត​វិលជុំ​ចំនួន​ប្រាំ​លើក​ទូទាំង​ខេត្តទាំង​បួន ដែល​នាំយក​ឱកាស​ចូលរួម​លេងកីឡា​ទៅដល់​កុមារ និង​យុវជន​ជិត ២,០០០​នាក់​នៅ​រាជធានី​ភ្នំពេញ ក្រុង​កំពត ក្រុង​សៀមរាប និង​ខេត្តកំពង់ស្ពឺ​ជាដើម។​

​អង្គការ​ផ្កាយ​សមុទ្រ​កម្ពុជា​គឺជា​អង្គការក្រៅរដ្ឋាភិបាល​នៅ​កម្ពុ​ជាមួយ ដែល​ប្តេជ្ញាចិត្ត​ជួយ​កសាងអនាគត​ល្អប្រសើរ​សម្រាប់​កុមារ និង​យុវជនដែល​ជួបប្រទះ​វិសមភាព​យេនឌ័រ ភាពក្រីក្រ និង​ពិការភាពដោយ​ផ្តល់​ឲ្យ​ពួកគេ​នូវ​ការអប់រំ សេវា​ថែទាំ​សុខភាព និង​កីឡា។ ស្របគ្នា​នេះដែរអង្គការ​ផ្កាយ​សមុទ្រ​កម្ពុជា និង​ក្រុមហ៊ុន AIA Cambodia នឹង​ទទួល​ស្វាគមន៍​វត្តមាន​កុមារ និង​យុវជន ២៦០​នាក់មក​ចូលរួម​ព្រឹត្តិការណ៍​បាល់ទាត់​នៅ​ថ្ងៃអាទិត្យ​ខាងមុខនេះ។ ក្រុមដែល​ឈ្នះ​ក្នុងការ​ប្រកួតរយៈពេល​ ៩​សប្តាហ៍​នេះ​នឹងត្រូវ​មក​ចូលរួម​ប្រកួតប្រជែង​ក្នុង​វគ្គ​ផ្តាច់ព្រ័ត្រ AIA - ISF Grand Championship League នៅ​ថ្ងៃអាទិត្យ ទី​១៤ ខែសីហា នៅ​ទីលាន​បាល់ទាត់​អង្គការ​ផ្កាយ​សមុទ្រ​កម្ពុជានៅ​រាជធានី​ភ្នំពេញ៕

អត្ថបទ៖ លី ឈុនឡា