ភ្នំពេញ៖ គិតត្រឹមត្រីមាសទី១ និងត្រីមាសទី២ ឆ្នាំ ២០២៦ អាកាសយានដ្ឋានអន្តរជាតិតេជោ (TIA) បានទទួលអ្នកដំណើរប្រមាណ ២.៤ លាននាក់។ ទន្ទឹមនឹងនេះ ប្រព័ន្ធ​អេកូឡូស៊ី​អាកាសចរណ៍​នៅ​អាកាសយានដ្ឋានអន្តរជាតិតេជោ (TIA) ក៏បានបន្តពង្រីកសេវាកម្ម​ថែទាំ​យន្ត​ហោះ ​តាមរយៈក្រុមហ៊ុន TIA Engineering Services រួមជាមួយនឹងសេវាកម្មដីគោក (Ground handling) ការ ដឹកជញ្ជូនទំនិញ សុវត្ថិភាព និងសន្តិសុខ។ នេះបើយោងតាមរបាយការណ៍ គម្រប់​ខួប​១ឆ្នាំនៃការដាក់ឱ្យដំណើរការ អាកាសយានដ្ឋានអន្តរជាតិតេជោ (TIA) និងសមិទ្ធ​ផល​សំខាន់​ៗ ​ចេញផ្សាយនៅថ្ងៃទី៨ ខែកញ្ញា ឆ្នាំ២០២៦នេះ។

តាមរបាយការណ៍ បានបញ្ជាក់ថា ក្នុងនោះសមិទ្ធផល និងព្រឹត្តិការណ៍សំខាន់ៗ ក្នុង​រយៈ​ពេល​១​ឆ្នាំ ​របស់អាកាសយានដ្ឋានអន្តរជាតិតេជោ (TIA) រួមាន ការផ្ទេរប្រតិបត្តិការដោយរលូន ខណៈ​នៅ​ថ្ងៃ​ទី៩ ខែកញ្ញា ឆ្នាំ២០២៥ ប្រតិបត្តិការដឹកជញ្ជូនតាមផ្លូវអាកាស សម្រាប់រាជធានី​ភ្នំពេញ​ត្រូវ​បាន​ផ្ទេរ​មកអាកាសយានដ្ឋានអន្តរជាតិតេជោ (TIA) ដោយជោគជ័យ ដែលចាប់ផ្តើមជើង​ហោះហើ​រ​ដំបូង​ដោយក្រុមហ៊ុនអាកាសចរណ៍ជាតិកម្ពុជា Air Cambodia (K6611)។

ចំណែក សមត្ថភាព និងស្តង់ដាអន្តរជាតិ អាកាសយានដ្ឋានអន្តរជាតិតេជោ (TIA) ត្រូវបាន​អភិវឌ្ឍ​លើ​ផ្ទៃដីប្រ មាណ ២,៦០០ហិកតា ជាមួយទុនវិនិយោគប្រមាណ ២.៣ ពាន់​លាន​ដុល្លារ​អាមេរិក និងជាអាកាសយានដ្ឋាន កម្រិត ICAO Code 4F ដែលអាចទទួលយន្តហោះខ្នាតធំ ដូចជា Airbus A380 និង Boeing 747។ ដំណាក់កាល ទី១ មានសមត្ថភាព​ទទួល​អ្នក​ដំណើរ​ប្រមាណ ១៣-១៥ លាននាក់ក្នុងមួយឆ្នាំ និងអាចពង្រីកសមត្ថភាពជាបន្ត បន្ទាប់ដល់ ៣០ លាន​នាក់ និង ៥០ លាននាក់ តាមដំណាក់កាលនៃការអភិវឌ្ឍ។

ចំពោះ​សមត្ថភាពគ្រប់គ្រងស្ថានការណ៍បន្ទាន់/អាសន្ន៖ ក្នុងអំឡុងព្យុះទីហ្វុង Ragasa ចាប់​ពី​ថ្ងៃ​ទី​២៣ ដល់ ថ្ងៃទី២៥ ខែកញ្ញា ឆ្នាំ២០២៥ TIA បានគាំទ្រការបង្វែរជើងហោះហើរ និងទទួល​ចត​បណ្តោះ​អាសន្ន​យន្តហោះ Cathay Pacific ចំនួន ១៣ គ្រឿង ដែលសមត្ថភាព​នេះបាន​បង្ហាញ​ពី​ការ​ត្រៀម​ខ្លួន​រួចរាល់ផ្នែកប្រតិបត្តិការ សមត្ថភាព តំបន់ប្រតិបត្តិការយន្តហោះ និងស្តង់ដា​សុវត្ថិភាព​ ព្រមទាំងសមត្ថភាពក្នុងការគ្រប់គ្រងស្ថានការណ៍បន្ទាន់ទ្រង់ ទ្រាយធំរបស់​ក្រុមហ៊ុន​អាកាសចរណ៍​។

ក្រៅពីនេះ អាកាសយានដ្ឋានអន្តរជាតិតេជោ (TIA) បានពង្រីកបណ្តាញតភ្ជាប់អន្តរជាតិ៖ ក្រុមហ៊ុន​អាកាសចរណ៍ Etihad Airways បានបើកជើងហោះហើរ ត្រង់រវាង Abu Dhabi និង Phnom Penh នៅខែតុលា ២០២៥ និងក្រុមហ៊ុនអាកាសចរណ៍ Turkish Airlines បាន​បើក​ជើង​ហោះ​ហើរ​រវាង Istanbul និង Phnom Penh នៅខែធ្នូ ២០២៥។ ជាមួយគ្នានេះ ក្រុមហ៊ុនអាកាសចរ ណ៍ជាតិកម្ពុជា Air Cambodia (K6) បានបន្តពង្រីក​បណ្តាញ​ជើង​ហោះ​ហើរ​ពី ​TIA រួមមានការតភ្ជាប់ទៅ Tokyo តាមរយៈ Fuzhou, Dara Sakor, Da Nang និង Phu Quoc។

ក្នុងមួយឆ្នាំនេះ កំណើនប្រតិបត្តិការ និងប្រព័ន្ធអេកូឡូស៊ីអាកាសចរណ៍របស់ អាកាស​យាន​ដ្ឋាន​អន្តរជាតិ​តេជោ (TIA) គិតត្រឹមត្រីមាសទី១ និងត្រីមាសទី២ ឆ្នាំ ២០២៦ អាកាសយាន​ដ្ឋាន​អន្តរជាតិ​តេជោ ​(TIA) បានទទួលអ្នកដំណើរប្រមាណ ២.៤ លាននាក់។ ទន្ទឹមនឹងនេះ ប្រព័ន្ធ​អេកូឡូស៊ី​អាកាសចរណ៍នៅអាកាសយានដ្ឋានអន្តរជាតិតេជោ (TIA) ក៏បានបន្តពង្រីក​សេវាកម្ម​ថែ​ទាំយន្តហោះ តាមរយៈ ក្រុមហ៊ុន TIA Engineering Services រួមជាមួយនឹងសេវាកម្មដីគោក (Ground handling) ការ ដឹកជញ្ជូនទំនិញ សុវត្ថិភាព និងសន្តិសុខ។

ចំពោះការ អភិវឌ្ឍកងយន្តហោះ និងការតភ្ជាប់ក្នុងស្រុក/តំបន់៖ នៅថ្ងៃទី១០ ខែមិថុនា ឆ្នាំ​២០២៦ ក្រុមហ៊ុន អាកាសចរណ៍ Cambodia Airways បាននាំចូលយន្តហោះ ATR72-600 ថ្មី​មួយ​គ្រឿង​នៅអាកាសយានដ្ឋានអន្តរជាតិ តេជោ (TIA) ដើម្បីគាំទ្រដល់​ការ​ពង្រីក​បណ្តាញ​ជើង​ហោះហើ​រ និងការតភ្ជាប់រវាងភ្នំពេញ សៀមរាប និងព្រះសីហនុ។

អាកាសយានដ្ឋានអន្តរជាតិតេជោ (TIA) ក៏ទទួលបានការស្គាល់ជាអន្តរជាតិ ដោយបានជាប់​ចំណាត់​ថ្នាក់​លេខ ៥ លើពិភពលោកក្នុងចំណោម World's Best New Airport Terminals 2026 របស់ Skytrax World Airport Awards។ ជាមួយគ្នានេះ TIA ក៏ត្រូវបាន Prix Versailles ជ្រើស​រើស​ជាអាកាសយានដ្ឋានមួយក្នុងចំណោម World's Most Beautiful Airports 2026 ដែល​ជា​ការ​ទទួលស្គាល់ចំពោះគុណភាព បទពិសោធន៍អ្នកដំណើរ ស្ថាបត្យកម្ម និងការរួម​បញ្ចូល​អត្ត​សញ្ញាណ​វប្បធម៌ខ្មែរ។

បើតាមរបាយការណ៍ដដែលបានបញ្ជាក់ថា ពេលនេះ អាកាសយានដ្ឋានអន្តរជាតិតេជោ (TIA) កំពុង​បន្ត​ការងារ និងអាទិភាពឆ្នាំទី២ ដោយស្ថានីយទំនិញថ្មីមានទំហំប្រមាណ ៤ ហិកតា ដែល​រំពឹង​ថា​នឹង​មានសមត្ថភាពប្រមាណពីរដងនៃស្ថានីយបច្ចុប្បន្ន និងស្ថានីយ VVIP ថ្មី កំពុង​ឈាន​ដល់​ការ​បញ្ចប់​ការសាងសង់ និងគ្រោងដាក់ឱ្យដំណើរការនៅ ខែវិច្ឆិកា ឆ្នាំ ២០២៦ ខាងមុខនេះ។

ក្នុងឆ្នាំទី២ អាទិភាពសំខាន់ៗនឹងផ្តោតលើការពង្រីកបណ្តាញជើងហោះហើរ ការពង្រឹង ភស្តុភារ និង​ការដឹកជញ្ជូនទំនិញតាមផ្លូវអាកាស បង្កើនការតភ្ជាប់ពហុមធ្យោបាយ និងជំរុញ​សមាហរណ​កម្ម ជាមួយវិស័យទេសចរណ៍ ពាណិជ្ជកម្ម វិនិយោគ និងការអភិវឌ្ឍសេដ្ឋកិច្ចជាតិ។ ការ​វាយ​តម្លៃ​មួយ​ចំនួនក្នុងវិស័យ ឧស្សាហកម្មបង្ហាញថា អាកាសយានដ្ឋានអន្តរជាតិតេជោ (TIA) និងគម្រោង​អភិវឌ្ឍទីក្រុងរណបជុំវិញអាកាស យានដ្ឋាន អាចរួមចំណែករហូតដល់ ៥% ដល់កំណើន GDP ប្រចាំឆ្នាំរបស់កម្ពុជា។

ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសស៊ីវិល បានថ្លែងថា «សមិទ្ធផលដ៏សំខាន់ក្នុងឆ្នាំដំបូង មិនមែនត្រឹម​តែ​ការ​បើក​អាកាស​យាន​ដ្ឋាន​ថ្មី​ប៉ុណ្ណោះទេ​ ​ប៉ុន្តែជាការបង្កើតដោយ ជោគជ័យនូវច្រកចេញចូ​ល​តាម​ផ្លូវ​អាកាស​ដែល​មាន​សុវត្ថិភាព ទំនើប និងទទួលស្គាល់ជាអន្តរជាតិ សម្រាប់ព្រះ រាជាណាចក្រកម្ពុជា។ ជំហានបន្ទាប់ គឺ​ប្រើប្រាស់សមត្ថភាពនេះឱ្យបានពេញលេញ ដើម្បីភ្ជាប់កម្ពុជាទៅកាន់ទីក្រុង ទីផ្សារ ភ្ញៀវទេសចរ វិនិយោគិន និងឱកាសសេដ្ឋកិច្ចកាន់តែច្រើន»៕