ភ្នំពេញ៖ អ្នកជំនាញសេដ្ឋកិច្ចថា សេដ្ឋកិច្ចនៅកម្ពុជានឹងមានការលូតលាស់ខ្លាំង ជាពិសេសលំហូរវិនិយោគពីក្រៅប្រទេស នឹងការទទួលបានភ្ញៀវទេសចរណ៍ឡើងវិញ ប្រសិនស្ថានភាពជំងឺកូវីដ ១៩ នៅកម្ពុជា គ្មានការកើតឡើងនូវរលកថ្មី។

ឯកឧត្តមបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា ថ្លែងប្រាប់​ភ្នាក់ងារ​អ្នក​យកព័ត៌មាន BTV ស្តីពីស្ថានភាពនៃការ​ចាកចេញ​ពីវិបត្តិជំងឺ​កូវីដ១៩របស់កម្ពុជា នៅថ្ងៃទី១៣ ខែ ឧសភាឆ្នាំ២០២២នេះថា វិបត្តិនៃជម្ងឺកូវីដ ១៩ បច្ចុប្បន្នពិភពលោកនៅតែប្រយុទ្ធប្រឆាំង និង​ទប់ស្កាត់ក្នុងនោះកម្ពុជា​គឺប្រទេសមួយ​ ដែល​បានយកចិត្តទុកដាក់ខ្ពស់ ​ក្រោមរបស់ប្រមុខ​រាជ​រដ្ឋាភិបាល ​បច្ចុប្បន្នកម្ពុជាបានកំពុងចាកចេញពីវិបត្តិជម្ងឺកូវីដ ១៩ នេះ ខណៈប្រទេសជាច្រើន​កំពុង​ញុំាញី​ដោយសារជម្ងឺ ១៩។

ឯកឧត្តមបណ្ឌិត បន្តថា ទាក់ទងសេដ្ឋកិច្ច និងសង្គមវិញ ​ប្រសិនស្ថានភាពជម្ងឺកូវីដ ១៩ គ្មានមេរោគ​បំប្លែង​ថ្មី ​ឬគ្មានរលកថ្មីកើតឡើងជាបន្តទៀត ​សេដ្ឋកិច្ចកម្ពុជា ​នឹងអាចរីកលូតលាស់​យ៉ាងខ្លាំង ជា​ពិសេស​លំហូរវិនិយោគពីក្រៅប្រទេស ​ខណៈប្រទេសជាច្រើនបានកំពុងជួបនៃវិបត្តិនេះ ហើយ​ជាងនេះទៀត ​កម្ពុជានឹងទទួលបានភ្ញៀវទេសចរណ៍ងើបឡើង​ល្អប្រសើរវិញ ស្របពេលវិស័យ​សង្គម ​ការរស់នៅរបស់ប្រជាពលរដ្ឋនៅក្រោមម្លប់សន្តិភាព គឺជាកត្តាជម្រុញកំណើន​ប្រកដោយ​និរន្តភាព។

ចំណែក លោក ធឿន វុទ្ធី នាយកក្រុមហ៊ុនមរតកអៅដ័រ ថ្លែងនូវការសាទរចំពោះរាជ​រដ្ឋាភិបាល​កម្ពុជា ដែលបានចាកចេញពីវិបត្តិជម្ងឺកូវីដ១៩ ដែលការចាកចេញនេះ ប្រសិនគ្មានរីករាលជម្ងឺកូវីដ ១៩ ឡើងវិញនោះទេ វិស័យទាំងអស់នៅកម្ពុជានឹងដំណើរល្អឡើងវិញ, ជាពិសេសវិស័យ​ទេសចរណ៍ ​ដោយវិស័យបានកំពុងងើបវិញជាបណ្តើរៗ​។

សូមបញ្ជាក់ថា នៅក្នុងការីករាលដាលជម្ងឺកូវីដ ១៩ រាជរដ្ឋាភិបាលបានដាក់ចេញផែនការសកម្មភាព​សំខាន់ៗជាច្រើនរួមមាន៖ ​ ការដាក់ចេញការគោលនយោបាយអន្តរាគមន៍ ជំនួយសង្គ្រោះបន្ទាន់​ដល់ជនរងគ្រោះ, ការបញ្ចេញកញ្ចប់​ថវិកាដើម្បីទ្រទ្រង់សេដ្ឋកិច្ច, ​ការអនុគ្រោះពន្ធ, ការផ្តល់​ជំនួយ​ជាថវិកា​ដល់អ្នកធ្វើការលើវិស័យដែលរងគ្រោះខ្លាំងជាងគេ, ​ការ​បន្ធូរបន្ថយ​ពន្ធ ដើម្បី​រក្សាឲ្យ​បាន​នូវលទ្ធភាពទិញរបស់ប្រជាជននៅក្នុងសេដ្ឋកិច្ច ​និង​ដើម្បីពង្រឹងតម្រូវការក្នុងស្រុក ​និង​ផលិតកម្ម ដើម្បី​ជំរុញសកម្មភាពសេដ្ឋកិច្ចឡើងវិញ​ ជា​ពិសេស​រាជរដ្ឋាភិបាល​បាន​ដាក់​ចេញនូវក្រប​ខណ្ឌយុទ្ធសាស្ត្រ ​និងកម្មវិធីស្តារ ​និងជំរុញកំណើនសេដ្ឋកិច្ច ​កម្ពុជា​ក្នុងការរស់នៅជាមួយកូវីដ-១៩ តាម​គន្លងប្រក្រតីភាពថ្មី ​សម្រាប់ឆ្នាំ ២០២១-២០២៣ជាដើម ​និង​មាន​វិធាន​ជាច្រើនផ្សេងទៀត ក្នុងការ​ប្រយុទ្ធប្រឆាំង​ និងជម្ងឺកូវីដ១៩នេះ៕អត្ថបទ៖ សុន រ៉ាឌី