ភ្នំពេញ៖ ដើម្បីបង្កើនអង់ទីគ័រទប់ទល់នឹងការវាយលុកពីជំងឺកូវីដ-១៩ កម្មករ-កម្មការិនីនៅភ្នំពេញសម្រុកទៅចាក់វ៉ាក់សាំងកូវីដដូសមូលដ្ឋាន និងដូសជំរុញ ខណៈក្រុមគ្រូពេទ្យកងទ័ពចុះចាក់ដល់រោងចក្រ។
ឧត្តមសេនីយ៍ទោ សៅ ខាន់ មេបញ្ជាការរងកងពលតូចលេខ៧០ នៃកងទ័ពជើងគោក ក្រសួងការពារជាតិ នៅរសៀលថ្ងៃទី១៣ ខែឧសភានេះ បន្តដឹកនាំក្រុមគ្រូពេទ្យកងពលតូចលេខ៧០ ចុះចាក់វ៉ាក់សាំងកូវីដ ជូនកម្មករ-កម្មករិនី ទាំងដូសមូលដ្ឋាន និងដូសជំរុញ នៅតាមរោងចក្រ សហគ្រាសមួយចំនួនក្នុងរាជធានីភ្នំពេញ។
នៅក្នុងឱកាសខាងលើនោះ ឧត្តមសេនីយ៍ទោ សៅ ខាន់ មានប្រសាសន៍ប្រាប់BTVថា ការចុះចាក់វ៉ាក់សាំងនៅតាមរោងចក្រនេះ គឺមានសហការជាមួយក្រសួងការងារ និងថៅកែរោងចក្រ ដើម្បីផ្តល់ភាពងាយស្រួលដល់កម្មករ-កម្មការិនី ទទួលបានការចាក់វ៉ាក់សាំងកូវីដគ្រប់គ្នាៗ ជាពិសេសដូសជំរុញ ដើម្បីបង្កើនភាពសាំបន្ថែមទៀតក្នុងសហគមន៍ ស្របតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា។
ក្រៅពីនេះ ឧត្តមសេនីយ៍ទោ បានអំពាវនាវដល់ថៅកែរោងចក្រ សហគ្រាស បន្តសហការជាមួយក្រុមគ្រូពេទ្យ ដើម្បីពន្លឿនដំណើរការចាក់វ៉ាក់សាំងកូវីដ។
សហជីព និងកម្មករ-កម្មការិនី បានលើកឡើងដែរថា ការចាក់វ៉ាក់សាំងកូវីដ ជាពិសេសដូសជំរុញ ពិតជាមានសារៈសំខាន់ ព្រោះអាចទប់ស្កាត់ការវាយលុកពីជំងឺកូវីដ-១៩ និងការកាត់បន្ថយការព្រួយបារម្ភឆ្លងជំងឺកូវីដ-១៩ ។ក្រៅពីនេះ ពួកគាត់អគុណដល់រាជរដ្ឋាភិបាលដែលស្វះស្វែងរកវ៉ាក់សាំងចាក់ជូនដល់ពួកគាត់ ចាប់ពីដូសមូលដ្ឋានដល់ដូសជំរុញ ។
បច្ចុប្បន្នប្រទេសកម្ពុជា បើកដំណើរការសេដ្ឋកិច្ចធម្មតា ជាមួយវត្តមានជំងឺកូវីដ-១៩ ខណៈការចាក់វ៉ាក់សាំងកូវីដ ស្រោចលើប្រជាពលរដ្ឋ ត្រូវបានរាជរដ្ឋាភិបាល ចាត់ទុកជាយុទ្ធសាស្រ្តចម្បងមួយ ដើម្បីទប់ស្កាត់ការរីករាលដាលជំងឺកូវីដ-១៩ និងធានានិរន្តរភាព ការរស់នៅតាមបែបធម្មតា៕
អត្ថបទ៖ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
