អគ្គនាយកអគ្គនាយករដ្ឋាន ភស្តុភារ ហិរញ្ញវត្ថុក្រសួងការពារជាតិឯកឧត្តម ម៉ឹង ពន្លក បាន​ថ្លែង​ថា ​ធនធាន​ហិរញ្ញវត្ថុ គឺជាសរសៃឈាមរត់យ៉ាងសំខាន់មិនងាចខ្វះបាន ក្នុងការ​ទ្រទ្រង់​កម្លាំង​ប្រយុទ្ធ​ហើយ​ទាំងប្រាក់​បៀវត្ស និងគោលរបបផ្សេងៗត្រូវតែបើកផ្តល់​ជូន​ឲ្យដ​ល់ដៃ ដល់​មាត់​ចំពោះ​គ្រប់​យោធិន​ទាំងអស់។

ថ្លែង​នៅក្នុងពិធីបិទវគ្គហ្វឹកហ្វឺនបំប៉នជំនាញហិរញ្ញវត្ថុ ថ្នាក់មធ្យមជំនាន់ទី៦ ឆ្នាំ២០២៦ នា​ព្រឹក​ថ្ងៃទី១១ ខែកញ្ញា ឆ្នាំ២០២៦នេះ ឯកឧត្តម ឧត្តមសេនីយ៍ឯក ម៉ឹង ពន្លក បានគូសបញ្ជាក់ថា នៅ​ក្នុង​បរិបទ សន្តិសុខសកលលោក និងតំបន់ ដែលកំពុងមានការប្រែប្រួលយ៉ាងស្មុគស្មាញ គួប​ផ្សំ​នឹង​ការ​វិវត្តនៃបច្ចេក វិទ្យាយ៉ាងទំនើប សមរភូមិមុខ​មិន​មែន​សំដៅ​តែ​លើ​ការ​កាន់​អាវុធ​ប្រយុទ្ធ​គ្នានៅ​លើ​សមរភូមិជាក់ស្តែងនោះ ទេ ដោយសមរភូមិ​មុខ​នា​ពេល​នេះ​រាប់​បញ្ចូល​ទាំង​ការ​ត្រៀម​លក្ខណៈ​សម្បត្តិគ្រប់បែបយ៉ាង ទាំងស្មារតី យុទ្ធោបករណ៍ ស្បៀងអាហារ ប្រេងឥន្ធនៈ ផ្នែក​សុខាភិបាល មន្ទីរពេទ្យ-គិលានដ្ឋាន ការដឹកជញ្ជូននិងជា ពិសេសគឺ«ធនធានហិរញ្ញវត្ថុ» ដែល​ជា​សរសៃ​ឈាម​រត់យ៉ាងសំខាន់មិនអាចខ្វះបានក្នុងការទ្រទ្រង់កម្លាំងប្រយុទ្ធ។ សភាពការណ៍ថ្មីនៅតាមបន្ទាត់ព្រំដែន និងការត្រៀមលក្ខណៈការពារជាតិ តម្រូវ​ឲ្យ​កង​យោធ​ពល​ខេមរ​ភូមិន្ទ​មានភាពម្ចាស់ការខ្ពស់ ឆ្លើយតបបានទាន់ពេលវេលា និងមានប្រសិទ្ធភាពបំផុត។

ត្រង់​ន័យ​នេះ ឯកឧត្តមឧត្តមសេនីយ៍ឯក ម៉ឹង ពន្លក បានលើកឡើងថា ប្រសិនបើយើងគ្មានការ គ្រប់​គ្រងហិរញ្ញវត្ថុដ៏រឹងមាំ គ្មានការបែងចែកថវិកាចំគោលដៅ និងគ្មាន​តម្លាភាព​ក្នុង​ការ​ប្រើប្រា​ស់​កញ្ចប់​ថវិកា​ជាតិទេនោះ វានឹងជះឥទ្ធិពលផ្ទាល់ដល់ជីវភាពរស់នៅ សុខភាព សេរីភាពហិរញ្ញវត្ថុ និង​ស្មារតី​ប្រយុទ្ធ របស់បងប្អូនកងទ័ពនៅសមរភូមិមុខ។ ដូច្នេះ ការធានាឲ្យ​បាន​នូវ​ការ​បើ​ក​ផ្តល់​ប្រាក់​បៀវត្ស ​របបឧត្ថម្ភ ផ្សេងៗ ស្បៀងអាហារ សម្ភារៈយោធា និងការផ្គត់ផ្គង់​ភស្តុភារ​បាន​ដល់​ដៃ​យោធិន​គ្រប់ៗ​រូ​ប គឺជាយុទ្ធសាស្រ្តដ៏សំខាន់ក្នុងការរក្សានិងបង្កើនប្រៀបឈ្នះរបស់កងទ័ពយើង។

នៅក្នុងឱកាសនោះដែរ ឧត្តមសេនីយ៍ឯកម៉ឹង ពន្លក ក៏បានលើកឡើងផងដែរថា ការងារហិរញ្ញវត្ថុ ក្នុងកងយោធពលខេមរភូមិន្ទ បានដើរតួនាទីយ៉ាងសំខាន់ ក្នុងការគិតគូរប្រាក់បៀវត្ស និងប្រាក់ចំណាយ ផ្សេងៗរបស់កងទ័ព។ ដូច្នេះវាមានសារៈសំខាន់ណាស់ ដែលទាមទារឲ្យនាយទាហានហិរញ្ញវត្ថុមានកម្រិត យល់ដឹងផ្នែកជំនាញច្បាស់លាស់ ដើម្បីអនុវត្តត្រឹមត្រូវតាមគោលរបបកំណត់សំដៅបើកផ្តល់ឲ្យដល់ដៃ ដល់មាត់ របស់យោធិនគ្រប់រូប និងចៀសវាងឲ្យបាននូវបាតុភាពខុសឆ្គងនានាដូចការបើកចែកមិនត្រឹមត្រូវ តាមគោលរបប ការចំណាយខ្ជះខ្ជាយគ្មានការគិតគូរច្បាស់លាស់ និងធ្វេសប្រហែសក្នុងការគ្របគ្រងប្រាក់ ធ្វើឲ្យបាត់បង់ជាដើម៕ អត្ថបទ៖ បាន ចក់