អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃសុក្របាននិយាយថា កិច្ចពិភាក្សាកំពុងបន្តទាក់ទងនឹងការជម្លៀសក្រុមគ្រូពេទ្យយោធា និងអ្នកប្រយុទ្ធដែលរងរបួសធ្ងន់ចេញពីរោងចក្រដែកថែប Azovstal នៅទីក្រុង Mariupol។
លោក Zelenskyy បាននិយាយថា អ្នកសម្រុះសម្រួលរបស់លោកកំពុងធ្វើអ្វីៗគ្រប់យ៉ាង ដើម្បីធានាបាននូវការឆ្លងកាត់ដោយសុវត្ថិភាពសម្រាប់អ្នកដែលនៅតែជាប់នៅខាងក្នុងរោងចក្រដែកថែប ជាទីតាំងការពារចុងក្រោយនៃការតស៊ូរបស់អ៊ុយក្រែននៅក្នុងទីក្រុងកំពង់ផែភាគខាងត្បូងដែលរងការបំផ្លាញ។ មេបញ្ជាការរងនៃកងវរសេនាធំ Azov ជាអង្គភាពកងទ័ពអ៊ុយក្រែននៅក្នុងរោងចក្រនេះបាននិយាយកាលពីថ្ងៃសុក្រថា កងទ័ពរបស់លោកនឹងទប់ទល់ជាមួយកងកម្លាំងរបស់ទីក្រុងមូស្គូ ដរាបណាពួកគេនៅតែអាចធ្វើបាន ទោះបីជាមានការខ្វះខាតគ្រាប់រំសេវ អាហារ ទឹក និងថ្នាំពេទ្យក៏ដោយ។
ជនស៊ីវិលមួយចំនួនដែលបានជាប់គាំងអស់រយៈពេលជាច្រើនសប្តាហ៍ នៅខាងក្នុងទីតាំងរោចក្រត្រូវបានជម្លៀសចេញក្រោមប្រតិបត្តិការថ្មីៗ ដែលធ្វើឡើងដោយកាកបាទក្រហម និងអង្គការសហប្រជាជាតិ ប៉ុន្តែមនុស្សជាច្រើនទៀតនៅតែនៅខាងក្នុង។ លោក Zelenskyy បាននិយាយអំពីការកើនឡើង នៃតំបន់ដែលកងកម្លាំងអ៊ុយក្រែន ដណ្តើមបានការកាន់កាប់មកវិញ ប៉ុន្តែមិនបានបញ្ជាក់ច្បាស់អំពីទាហានរុស្ស៊ីដែលត្រូវបានសម្លាប់នៅក្នុងការប្រយុទ្ធ និងការខូចខាតសម្ភារៈយោធានោះទេ។ លោក Zelenskyy បានទទួលស្គាល់ថា ការបិទការនាំចេញរបស់អ៊ុយក្រែននឹងប៉ះពាល់ខ្លាំងដល់ការផ្គត់ផ្គង់ស្បៀងអាហារសកល ហើយអាចបង្កើតឱ្យមានគ្រោះទុរ្ភិក្ស៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
