ភ្នំពេញ៖ បច្ចុប្បន្នវត្តមានជនបរទេស ដើរកំសាន្តនៅកម្ពុជាចាប់ផ្ដើមមានជាថ្មី ក្រោយកម្ពុជា បើកទូលាយទទួលភ្ញៀវទេសចរ។ ខណៈពេលនេះ ជនបរទេស កំពុងសម្រាកកំសាន្តនៅក្នុងរាជធានីភ្នំពេញ ក៏បានលើកឡើងកោតសសើរ​ចំពោះរាជរដ្ឋាភិបាលកម្ពុជា ដែលគ្រប់គ្រងស្ថានការណ៍កូវីដ-១៩ បានយ៉ាងល្អប្រសើរ។

កម្ពុជាកន្លងទៅបានបើកទូលាយទទួលភ្ញៀវទេសចរ ហើយថ្មីៗនេះ ក៏បានប្រកាសដកចេញកាតព្វកិច្ចពាក់ម៉ាសទូទាំងប្រទេសកម្ពុជាផងដែរ ក្រោយស្ថានការណ៍កូវីដ-១៩ នៅកម្ពុជាកាន់តែមានភាពល្អប្រសើរ។ ពាក់ព័ន្ធនឹងចំណុចនេះ ជនបរទេសកំពុងស្នាក់នៅកម្ពុជា មើលឃើញថារាជរដ្ឋាភិបាលកម្ពុជា គ្រប់គ្រងស្ថានការណ៍បានល្អប្រសើរ។

ខណៈកំពុងហាត់ប្រាណនៅចំណុចមាត់ទន្លេនាពេលល្ងាច លោក Michael ដែលធ្វើដំណើរមកពីប្រទេស អាមេរិក លើកឡើងថាកន្លងទៅលោកបានមកប្រទេសកម្ពុជា ជាច្រើនដងមកហើយ ជាពិសេសក្នុងស្ថានការណ៍មុនបិទខ្ទប់។ លោករៀបរាប់ថាស្ថានភាពពេលនោះ គឺមានភាពតានតឹង ច្របូកច្របល់ ដែលរូបលោក ត្រូវត្រឡប់ទៅ ប្រទេសអាមេរិកវិញភ្លាមៗ។ ចំពោះស្ថានភាពពេលនេះ លោកមើលឃើញពីប្រសើរជាច្រើន ដែលគ្រប់យ៉ាងបានវិលត្រឡប់មកសភាពដើម ដែលអាចអនុញ្ញាតឱ្យលោកមកកំសាន្តនៅកម្ពុជា ក្នុងរយៈយូរបាន ដោយមិនមានការព្រួយបារម្ភ។

លើកឡើងស្រដៀងគ្នាផងដែរ លោក Soenke Witt ជាជនបរទេស ដែលធ្វើដំណើរមកពីប្រទេស ប្រទេសអាឡឺម៉ង់ លើកឡើងដែរថា ប្រទេសកម្ពុជានៅពេលនេះ គឺមានភាពស្ងប់ស្ងាត់ មានសុវត្ថិភាពពីកូវីដ ងាយស្រួលធ្វើដំណើរមកកំសាន្ត ហើយក៏អាចស្នើសុំទិដ្ឋាការពេលមកដល់កម្ពុជាផងដែរ។ លោកបន្តថា កម្ពុជាមានការគ្រប់គ្រងស្ថានការណ៍បានល្អប្រសើរ ជាប្រទេសល្អសម្រាប់ការមកធ្វើជំនួញ។

ស្ថានភាពកូវីដ-១៩នៅកម្ពុជា ជាក់ស្ដែងចាប់ពីថ្ងៃទី ៧ ខែឧសភា រហូតដល់ថ្ងៃទី ១២ខែឧសភា ឆ្នាំ ២០២២ គឺពុំមានការរកឃើញករណីឆ្លងកូវីដ-១៩ នោះទេ។

ទន្ទឹមនឹងគ្មានករណីឆ្លងនេះ ក្រុមគ្រូពេទ្យក៏នៅតែបន្តសកម្មភាពចុះចាក់វ៉ាក់សាំងយ៉ាងសកម្មផងដែរ ដោយក្រុមគ្រូពេទ្យបានយកវ៉ាក់សាំង ចុះដល់ទីតាំងរោងចក្រ សាលារៀន ការដ្ឋានសំណង់ តាមផ្សារ តាមខ្នងផ្ទះ និងទីតាំងជាច្រើនទៀត។ អត្ថបទ៖ គឹមហុក